آج آرائش گیسوئے دوتا ہوتی ہے — اکبر اللہ آبادی
شاعر
آج آرائش گیسوئے دوتا ہوتی ہے
آج آرائش گیسوئے دوتا ہوتی ہے
پھر مری جان گرفتار بلا ہوتی ہے
شوق پابوسیٔ جاناں مجھے باقی ہے ہنوز
گھاس جو اگتی ہے تربت پہ حنا ہوتی ہے
پھر کسی کام کا باقی نہیں رہتا انساں
سچ تو یہ ہے کہ محبت بھی بلا ہوتی ہے
جو زمیں کوچۂ قاتل میں نکلتی ہے نئی
وقف وہ بہر مزار شہدا ہوتی ہے
جس نے دیکھی ہو وہ چتون کوئی اس سے پوچھے
جان کیوں کر ہدف تیر قضا ہوتی ہے
نزع کا وقت برا وقت ہے خالق کی پناہ
ہے وہ ساعت کہ قیامت سے سوا ہوتی ہے
روح تو ایک طرف ہوتی ہے رخصت تن سے
آرزو ایک طرف دل سے جدا ہوتی ہے
خود سمجھتا ہوں کہ رونے سے بھلا کیا حاصل
پر کروں کیا یوں ہی تسکین ذرا ہوتی ہے
روندتے پھرتے ہیں وہ مجمع اغیار کے ساتھ
خوب توقیر مزار شہدا ہوتی ہے
مرغ بسمل کی طرح لوٹ گیا دل میرا
نگہ ناز کی تاثیر بھی کیا ہوتی ہے
نالہ کر لینے دیں للہ نہ چھیڑیں احباب
ضبط کرتا ہوں تو تکلیف سوا ہوتی ہے
جسم تو خاک میں مل جاتے ہوئے دیکھتے ہیں
روح کیا جانے کدھر جاتی ہے کیا ہوتی ہے
ہوں فریب ستم یار کا قائل اکبرؔ
مرتے مرتے نہ کھلا یہ کہ جفا ہوتی ہے
Aaj aaraish gaisu-e-dota hoti hai
Aaj aaraish gaisu-e-dota hoti hai
Phir meri jaan giriftar-e-bala hoti hai
Shauq-e-pabosi-e-jaanaan mujhe baaqi hai hanuz
Ghaas jo ugti hai turbat pe hina hoti hai
Phir kisi kaam ka baaqi nahin rahta insaan
Sach to yeh hai ki mohabbat bhi bala hoti hai
Jo zameen kuucha-e-qaatil mein nikalti hai nai
Waqf woh bahar mazaar-e-shuhada hoti hai
Jis ne dekhi ho woh chitvan koi us se puuchhe
Jaan kyuun kar hadaf-e-teer-e-qaza hoti hai
Naza ka waqt bura waqt hai, khaaliq ki panah
Hai woh sa'at ki qayamat se siwa hoti hai
Rooh to ek taraf hoti hai rukhsat tan se
Aarzu ek taraf dil se juda hoti hai
Khud samajhta hun ki rone se bhala kya haasil
Par karun kya yuun hi taskeen zara hoti hai
Raundte phirte hain woh majma'-e-aghyaar ke saath
Khoob tauqeer-e-mazar-e-shuhada hoti hai
Murgh-e-bismil ki tarah loot gaya dil mera
Nigah-e-naz ki taseer bhi kya hoti hai
Nala kar lene dein lillah na chheedein ahbab
Zabt karta hun to takleef siwa hoti hai
Jism to khaak mein mil jaate hue dekhte hain
Rooh kya jaane kidhar jaati hai, kya hoti hai
Hoon fareb-e-sitam-e-yaar ka qail Akbaar
Marte marte na khula yeh ki jafa hoti hai
شاعر کے بارے میں
سید اکبر حسین الہ ابادی 16 نومبر 1846ء کو ضلع الہ اباد کے قصبہ بارہ میں پیدا ہوئے۔والد تفضل حسین نائب تحصیلدار تھے۔ اکبر کی ابتدائی تعلیم گھر پر ہو...
مکمل تعارف پڑھیں