جب یاس ہوئی تو آہوں نے سینے سے نکلنا چھوڑ دیا — اکبر اللہ آبادی
شاعر
جب یاس ہوئی تو آہوں نے سینے سے نکلنا چھوڑ دیا
جب یاس ہوئی تو آہوں نے سینے سے نکلنا چھوڑ دیا
اب خشک مزاج آنکھیں بھی ہوئیں دل نے بھی مچلنا چھوڑ دیا
ناوک فگنی سے ظالم کی جنگل میں ہے اک سناٹا سا
مرغان خوش الحاں ہو گئے چپ آہو نے اچھلنا چھوڑ دیا
کیوں کبر و غرور اس دور پہ ہے کیوں دوست فلک کو سمجھا ہے
گردش سے یہ اپنی باز آیا یا رنگ بدلنا چھوڑ دیا
بدلی وہ ہوا گزرا وہ سماں وہ راہ نہیں وہ لوگ نہیں
تفریح کہاں اور سیر کجا گھر سے بھی نکلنا چھوڑ دیا
وہ سوز و گداز اس محفل میں باقی نہ رہا اندھیر ہوا
پروانوں نے جلنا چھوڑ دیا شمعوں نے پگھلنا چھوڑ دیا
ہر گام پہ چند آنکھیں نگراں ہر موڑ پہ اک لیسنس طلب
اس پارک میں آخر اے اکبرؔ میں نے تو ٹہلنا چھوڑ دیا
کیا دین کو قوت دیں یہ جواں جب حوصلہ افزا کوئی نہیں
کیا ہوش سنبھالیں یہ لڑکے خود اس نے سنبھلنا چھوڑ دیا
اقبال مساعد جب نہ رہا رکھے یہ قدم جس منزل میں
اشجار سے سایہ دور ہوا چشموں نے ابلنا چھوڑ دیا
اللہ کی راہ اب تک ہے کھلی آثار و نشاں سب قائم ہیں
اللہ کے بندوں نے لیکن اس راہ میں چلنا چھوڑ دیا
جب سر میں ہوائے طاعت تھی سرسبز شجر امید کا تھا
جب صرصر عصیاں چلنے لگی اس پیڑ نے پھلنا چھوڑ دیا
اس حور لقا کو گھر لائے ہو تم کو مبارک اے اکبرؔ
لیکن یہ قیامت کی تم نے گھر سے جو نکلنا چھوڑ دیا
Jab yaas hui to aahon ne seene se nikalna chhod diya
Jab yaas hui to aahon ne seene se nikalna chhod diya
Ab khushk mizaj aankhein bhi hui dil ne bhi machalna chhod diya
Naawak-figani se zaalim ki jangal mein hai ek sannata sa
Murghan-e-khush-ilhan ho gaye chup aahoo ne uchhalna chhod diya
Kyun kibr-o-ghuroor is daur pe hai kyun dost falak ko samjha hai
Gardish se yeh apni baaz aaya ya rang badalna chhod diya
Badli woh hawa guzra woh samaan woh raah nahin woh log nahin
Tafreeh kahan aur sair kujja ghar se bhi nikalna chhod diya
Woh soz-o-gudaaz is mehfil mein baaqi na raha andher hua
Parwanon ne jalna chhod diya sham'on ne pighalna chhod diya
Har gaam pe chand aankhein nigaaran har mod pe ek licence talab
Is park mein akhir ae Akbarؔ main ne to tehlaana chhod diya
Kya deen ko quwwat dein yeh jawaan jab hausla afza koi nahin
Kya hosh sambhalein yeh ladke khud is ne sambhalna chhod diya
Iqbal masa'id jab na raha rakhe yeh qadam jis manzil mein
Ashjaar se saaya door hua chashmon ne ubalna chhod diya
Allah ki raah ab tak hai khuli aasar-o-nishaan sab qaim hain
Allah ke bandoon ne lekin is raah mein chalna chhod diya
Jab sar mein hawa-e-taa'at thi sarsabz shajar-e-ummeed ka tha
Jab sarsar-e-isyaan chalne lagi is ped ne phalna chhod diya
Us hoor-liqa ko ghar laaye ho tum ko mubarak ae Akbarؔ
Lekin yeh qayamat ki tum ne ghar se jo nikalna chhod diya
شاعر کے بارے میں
سید اکبر حسین الہ ابادی 16 نومبر 1846ء کو ضلع الہ اباد کے قصبہ بارہ میں پیدا ہوئے۔والد تفضل حسین نائب تحصیلدار تھے۔ اکبر کی ابتدائی تعلیم گھر پر ہو...
مکمل تعارف پڑھیں