وہ ہوا نہ رہی وہ چمن نہ رہا وہ گلی نہ رہی وہ حسیں نہ رہے — اکبر اللہ آبادی
شاعر
وہ ہوا نہ رہی وہ چمن نہ رہا وہ گلی نہ رہی وہ حسیں نہ رہے
وہ ہوا نہ رہی وہ چمن نہ رہا وہ گلی نہ رہی وہ حسیں نہ رہے
وہ فلک نہ رہا وہ سماں نہ رہا وہ مکاں نہ رہے وہ مکیں نہ رہے
وہ گلوں میں گلوں کی سی بو نہ رہی وہ عزیزوں میں لطف کی خو نہ رہی
وہ حسینوں میں رنگ وفا نہ رہا کہیں اور کی کیا وہ ہمیں نہ رہے
نہ وہ آن رہی نہ امنگ رہی نہ وہ رندی و زہد کی جنگ رہی
سوئے قبلہ نگاہوں کے رخ نہ رہے اور در پہ نقش جبیں نہ رہے
نہ وہ جام رہے نہ وہ مست رہے نہ فدائی عہد الست رہے
وہ طریقۂ کار جہاں نہ رہا وہ مشاغل رونق دیں نہ رہے
ہمیں لاکھ زمانہ لبھائے تو کیا نئے رنگ جو چرخ دکھائے تو کیا
یہ محال ہے اہل وفا کے لیے غم ملت و الفت دیں نہ رہے
ترے کوچۂ زلف میں دل ہے مرا اب اسے میں سمجھتا ہوں دام بلا
یہ عجیب ستم ہے عجیب جفا کہ یہاں نہ رہے تو کہیں نہ رہے
یہ تمہارے ہی دم سے ہے بزم طرب ابھی جاؤ نہ تم نہ کرو یہ غضب
کوئی بیٹھ کے لطف اٹھائے گا کیا کہ جو رونق بزم تمہیں نہ رہے
جو تھیں چشم فلک کی بھی نور نظر وہی جن پہ نثار تھے شمس و قمر
سو اب ایسی مٹی ہیں وہ انجمنیں کہ نشان بھی ان کے کہیں نہ رہے
وہی صورتیں رہ گئیں پیش نظر جو زمانہ کو پھیریں ادھر سے ادھر
مگر ایسے جمال جہاں آرا جو تھے رونق روئے زمیں نہ رہے
غم و رنج میں اکبرؔ اگر ہے گھرا تو سمجھ لے کہ رنج کو بھی ہے فنا
کسی شے کو نہیں ہے جہاں میں بقا وہ زیادہ ملول و حزیں نہ رہے
Woh hawā na rahī woh chaman na rahā woh galī na rahī woh hasīñ na rahe
Woh hawā na rahī woh chaman na rahā woh galī na rahī woh hasīñ na rahe
Woh falak na rahā woh samāñ na rahā woh makāñ na rahe woh makīñ na rahe
Woh guloñ meñ guloñ kī sī bū na rahī woh azīzoñ meñ lutf kī khoo na rahī
Woh hasīnoñ meñ rang-e-wafā na rahā kahīñ aur kī kyā woh hameñ na rahe
Na woh ān rahī na umang rahī na woh rindī o zuhd kī jang rahī
Su-e-qiblah nigāhoñ ke rukh na rahe aur dar pe naqsh-e-jabīñ na rahe
Na woh jām rahe na woh mast rahe na fidā'ī ahd-e-alast rahe
Woh tarīqa-e-kār jahāñ na rahā woh mashāghil raunaq-e-dīñ na rahe
Hameñ lākh zamānah lubhāye to kyā na'e rang jo charkh dikhāye to kyā
Ye muhāl hai ahl-e-wafā ke li'e gham-e-millat o ulfat-e-dīñ na rahe
Tere kūcha-e-zulf meñ dil hai merā ab ise maiñ samajhtā hūñ dām-e-balā
Ye ajīb sitam hai ajīb jafā ke yahāñ na rahe to kahīñ na rahe
Ye tumhāre hī dam se hai bazm-e-tarab abhī jāo na tum na karo ye ghazab
Koī baiṭh ke lutf uṭhāye gā kyā ke jo raunaq-e-bazm tumhīñ na rahe
Jo thīñ chashm-e-falak kī bhī nūr-e-nazar wohī jin pe nisār the shams o qamar
So ab aisī miṭṭī haiñ woh anjumaneñ ke nishān bhī un ke kahīñ na rahe
Wohī soorateñ rah ga'īñ pesh-e-nazar jo zamānah ko phereñ idhar se udhar
Magar aise jamāl-e-jahāñ-ārā jo the raunaq-e-rū-e-zamīñ na rahe
Gham o ranj meñ Akbar agar hai ghirā to samajh le ke ranj ko bhī hai fanā
Kisī shai ko nahīñ hai jahāñ meñ baqā woh ziyādah malool o hazīñ na rahe
شاعر کے بارے میں
سید اکبر حسین الہ ابادی 16 نومبر 1846ء کو ضلع الہ اباد کے قصبہ بارہ میں پیدا ہوئے۔والد تفضل حسین نائب تحصیلدار تھے۔ اکبر کی ابتدائی تعلیم گھر پر ہو...
مکمل تعارف پڑھیں