شکوہ — علامہ اقبال

شکوہ

Kyun ziyan-kaar banoon sood faramoosh rahoon
Fikr-e-farda na karoon mahw-e-gham-e-dosh rahoon
Naale bulbul ke sunoon aur hama tan gosh rahoon
Hamnawa main bhi koi gul hoon ke khamoosh rahoon
Jur'at aamoz meri taab-e-sukhan hai mujh ko
Shikwa Allah se khaakam ba-dahan hai mujh ko
Hai baja shewa-e-tasleem mein mashhoor hain hum
Qissa-e-dard sunate hain ke majboor hain hum
Saaz khamoosh hain faryaad se mamoor hain hum
Nala aata hai agar lab pe toh ma'zoor hain hum
Aye Khuda shikwa-e-arbab-e-wafa bhi sun le
Khuugar-e-hamd se thoda sa gila bhi sun le
Thi toh maujood azal se hi teri zaat-e-qadeem
Phool tha zeb-e-chaman par na pareshan thi shamim
Shart-e-insaf hai aye sahib-ul-altaaf-e-ameem
Boo-e-gul phailti kis tarah jo hoti na naseem
Hum ko jam'iyyat-e-khatir yeh pareshani thi
Warna ummat tere mehboob ki deewani thi
Hum se pehle tha ajab tere jahan ka manzar
Kahin masjood the patthar kahin ma'abood shajar
Khuugar-e-paikar-e-mehsoos thi insaan ki nazar
Maanta phir koi un dekhe Khuda ko kyun kar
Tujh ko ma'aloom hai leta tha koi naam tera
Quwwat-e-bazoo-e-Muslim ne kiya kaam tera
Bas rahe the yahin Saljooq bhi Toorani bhi
Ahl-e-Cheen Cheen mein Iran mein Sasani bhi
Isi ma'amoore mein aabaad the Yunanani bhi
Isi duniya mein Yahoodi bhi the Nasrani bhi
Par tere naam pe talwar uthai kis ne
Baat jo bigdi hui thi woh banai kis ne
The hama tan ek tere ma'arka-aaraon mein
Khushkiyon mein kabhi ladte kabhi daryaon mein
Deen azanein kabhi Europe ke kalisaon mein
Kabhi Africa ke tapte hue sehraon mein
Shaan aankhon mein na jachti thi jahandaaron ki
Kalma padhte the hama chhhaon mein talwaron ki
Hum jo jeete the toh jangon ki museebat ke liye
Aur marte the tere naam ki azmat ke liye
Thi na kuch tegh-zani apni hukoomat ke liye
Sar ba-kaf phirte the kya dehr mein daulat ke liye
Qaum apni jo zar o maal-e-jahan par marti
But faroshi ke iwaz but shikani kyun karti
Tal na sakte the agar jang mein ud jaate the
Paaon sheroun ke bhi maidan se ukhad jaate the
Tujh se sarkash hua koi toh bigad jaate the
Tegh kya cheez hai hum top se lad jaate the
Naqsh-e-tauheed ka har dil pe bithaya hum ne
Zair-e-khanjar bhi yeh paigham sunaya hum ne
Tu hi keh de ke ukhaada dar-e-Khaibar kis ne
Shehr-e-Qaisar ka jo tha us ko kiya sar kis ne
Tode makhlooq-e-Khuda-wandon ke paikar kis ne
Kaat kar rakh diye kuffar ke lashkar kis ne
Kis ne thanda kiya aatishkada-e-Iran ko
Kis ne phir zinda kiya tazkira-e-Yazdan ko
Kaun si qaum faqat teri talab-gaar hui
Aur tere liye zehmat-kash-e-paikar hui
Kis ki shamshir-e-jahan-geer jahan-daar hui
Kis ki takbeer se duniya teri bedaar hui
Kis ki haibat se sanam sehme hue rehte the
Munh ke bal gir ke ho Allah Ahad kehte the
Aa gaya ain ladai mein agar waqt-e-namaz
Qibla-rau ho ke zameen-bos hui qaum-e-Hejaz
Ek hi saf mein khade ho gaye Mahmood o Ayaz
Na koi banda raha aur na koi banda nawaz
Banda o sahib o mohtaj o ghani ek hue
Teri sarkar mein pahunche toh sabhi ek hue
Mehfil-e-kaun o makaan mein sehar o shaam phire
May-e-tauheed ko le kar sifat-e-jaam phire
Koh mein dasht mein le kar tera paigham phire
Aur ma'aloom hai tujh ko kabhi nakaam phire
Dasht toh dasht hain darya bhi na chhode hum ne
Behr-e-zulmat mein dauda diye ghode hum ne
Safha-e-dehr se baatil ko mitaya hum ne
Nau-e-insaan ko ghulami se chhudaaya hum ne
Tere Ka'abe ko jabeenon se basaya hum ne
Tere Quran ko seenon se lagaya hum ne
Phir bhi hum se yeh gila hai ke wafadar nahin
Hum wafadar nahin toh bhi toh dildaar nahin
Ummaten aur bhi hain un mein gunahgar bhi hain
Ajez wale bhi hain mast-e-may-e-pindaar bhi hain
In mein kaahil bhi hain ghafil bhi hain hoshiyar bhi hain
Sainkadon hain ke tere naam se bezaar bhi hain
Rehmatein hain teri aghyaar ke kaashanon par
Barq girti hai toh bechare Musalmanon par
But sanam khanon mein kehte hain Musalman gaye
Hai khushi un ko ke Ka'abe ke nigehbaan gaye
Manzil-e-dehr se oonthoun ke hadi khwan gaye
Apni baghlon mein dabaye hue Quran gaye
Khanda zan kufr hai ehsaas tujhe hai ke nahin
Apni tauheed ka kuch paas tujhe hai ke nahin
Yeh shikayat nahin hain un ke khazane mamoor
Nahin mehfil mein jinhein baat bhi karne ka shaoor
Qehar toh yeh hai ke kaafir ko milein hoor o qasoor
Aur bechare Musalman ko faqat wa'ada-e-hoor
Ab woh altaaf nahin hum pe inayat nahin
Baat yeh kya hai ke pehli si mudaarat nahin
Kyun Musalmanon mein hai daulat-e-duniya nayaab
Teri qudrat toh hai woh jis ki na hadd hai na hisaab
Tu jo chahe toh uthe seena-e-sehra se habaab
Reh-rau-e-dasht ho saili zada mauj-e-saraab
Ta'an-e-aghyaar hai ruswai hai nadaari hai
Kya tere naam pe marne ka iwaz khwari hai
Bani aghyaar ki ab chahne wali duniya
Reh gayi apne liye ek khayali duniya
Hum toh rukhsat hue auron ne sambhali duniya
Phir na kehna hui tauheed se khaali duniya
Hum toh jeete hain ke duniya mein tra naam rahe
Kahin mumkin hai ke saaqi na rahe jaam rahe
Teri mehfil bhi gayi chahne wale bhi gaye
Shab ki aahein bhi gayin subah ke naale bhi gaye
Dil tujhe de bhi gaye apna sila le bhi gaye
Aa ke baithe bhi na the aur nikale bhi gaye
Aaye ushshaaq gaye wa'ada-e-farda le kar
Ab unhein dhoond chiragh-e-rukh-e-zeba le kar
Dard-e-Laila bhi wahi Qais ka pehloo bhi wahi
Najd ke dasht o jabal mein ram-e-aahoo bhi wahi
Ishq ka dil bhi wahi husn ka jaadoo bhi wahi
Ummat-e-Ahmad-e-Mursal bhi wahi tu bhi wahi
Phir yeh aarzurdagi-e-ghair sabab kya ma'ani
Apne shaidaon pe yeh chashm-e-ghazab kya ma'ani
Tujh ko chhoda ke Rasool-e-Arabi ko chhoda
But-gari pesha kiya but-shikani ko chhoda
Ishq ko ishq ki aashufta-sari ko chhoda
Rasm-e-Salman o Owais Qarani ko chhoda
Aag takbeer ki seenon mein dabi rakhte hain
Zindagi misl-e-Bilal Habshi rakhte hain
Ishq ki khair woh pehli si ada bhi na sahi
Jaada paimaai-e-tasleem o raza bhi na sahi
Muztarib dil sifat-e-qibla-numa bhi na sahi
Aur paabandi-e-aayeen-e-wafa bhi na sahi
Kabhi hum se kabhi ghairon se shanasai hai
Baat kehne ki nahin tu bhi toh harjaai hai
Sar-e-Faaraan pe kiya deen ko kamil tu ne
Ik ishaare mein hazaaron ke liye dil tu ne
Aatish-andoz kiya ishq ka haasil tu ne
Phoonk di garmi-e-rukhsaar se mehfil tu ne
Aaj kyun seene hamare sharar aabaad nahin
Hum wahi sokhta samaan hain tujhe yaad nahin
Wadi-e-Najd mein woh shor-e-salasil na raha
Qais deewane nazara-e-mehmil na raha
Hausle woh na rahe hum na rahe dil na raha
Ghar yeh ujda hai ke tu raunaq-e-mehfil na raha
Aye khusha aan roz ke aayi o ba-sad naaz aayi
Be-hijabana soo-e-mehfil-e-maa baaz aayi
Baada-kash ghair hain gulshan mein lab-e-ju baithe
Sunte hain jaam ba-kaf naghma-e-ku ku baithe
Door hangama-e-gulzar se yak-su baithe
Tere deewane bhi hain muntazir ho baithe
Apne parwanon ko phir zauq-e-khud afrozii de
Barq-e-dareena ko farmaan-e-jigar sozii de
Qaum aawara-e-inan taab hai phir soo-e-Hijaz
Le uda bulbul-e-be-par ko mazaaq-e-parwaz
Muztarib bagh ke har ghunche mein hai boo-e-niyaz
Tu zara chhed toh de tishna mizraab hai saaz
Nagme betaab hain taaron se nikalne ke liye
Toor muztar hai isi aag mein jalne ke liye
Mushkilen ummat-e-marhoom ki aasaan kar de
Moor-e-be-maya ko hamdosh-e-Sulaiman kar de
Jins-e-nayamab-e-mohabbat ko phir arzaan kar de
Hind ke dair nasheenon ko Musalman kar de
Joo-e-khoon mi chakad az hasrat-e-deereena-e-maa
Mi tapad nala ba nishtar kadah seena-e-maa
Boo-e-gul le gayi beroon-e-chaman raaz-e-chaman
Kya qayamat hai ke khud phool hain ghammaz-e-chaman
Ahad-e-gul khatm hua toot gaya saaz-e-chaman
Ud gaye daaliyon se zamzama parda az chaman
Ek bulbul hai ke hai mahw-e-taranum ab tak
Us ke seene mein hai naghmon ka talatum ab tak
Qamriyan shakh-e-sanobar se gurezaan bhi hui
Pattiyan phool ki jhad jhad ke pareshan bhi hui
Woh purani rawishen bagh ki veeran bhi hui
Daaliyan pairahan-e-barg se uriyaan bhi hui
Qaid-e-mausam se tabeeyat rahi azaad is ki
Kaash gulshan mein samajhta koi faryaad is ki
Lutf marne mein hai baaqi na maza jeene mein
Kuch maza hai toh yahi khoon-e-jigar peene mein
Kitne betaab hain joher mere aaine mein
Kis qadar jalwe tadapte hain mere seene mein
Is gulistan mein magar dekhne wale hi nahin
Dagh jo seene mein rakhte hon woh laale hi nahin
Chak is bulbul-e-tanha ki nawa se dil hon
Jaagne wale isi baang-e-dara se dil hon
Yaani phir zinda naye ahd-e-wafa se dil hon
Phir isi baada-e-deereena ke pyaase dil hon
Ajami khum hai toh kya may toh Hijazi hai meri
Naghma Hindi hai toh kya lay toh Hijazi hai meri