انجم سلیمی

کیسی تکرا ر ِمن و تُو تننا ہا یا ہُو

کیسی تکرا ر ِمن و تُو تننا ہا یا ہُو
ہر طرف عالمِ یکسُو، تننا ہا یا ہُو
تہ بہ تہ ذات سے کرتا ہوں نمودار تجھے
یہ توہّم ہے کہ جادو، تننا ہا یا ہُو
میرے وجدان میں کرتے ہیں قیام اور کلام
کبھی رومی , کبھی باہُو , تننا ہا یا ہُو
گونجتا رہتا ہے دل نعرہ ء مستانہ سے
دما دم دم دما دم ہُو , تننا ہا یا ہُو
ہُو بہ ہُو اپنے گماں پر تجھے دیکھا میں نے
یہی دم خم , یہی خُو بُو , تننا ہا یا ہُو
جبر اور صبر کے معنی نہیں کُھلتے مجھ پر
میں قلندر ہوں نہ سادھو , تننا ہا یا ہُو
محض اتنا ہے حقیقت میں فسانہ میرا
اک ڈھلکتا ہُوا آنسو , تننا ہا یا ہُو

انجم سلیمی