آئی ہے کچھ نہ پوچھ قیامت کہاں کہاں — فراق گورکھپوری
شاعر
آئی ہے کچھ نہ پوچھ قیامت کہاں کہاں
آئی ہے کچھ نہ پوچھ قیامت کہاں کہاں
اف لے گئی ہے مجھ کو محبت کہاں کہاں
بیتابی و سکوں کی ہوئیں منزلیں تمام
بہلائیں تجھ سے چھٹ کے طبیعت کہاں کہاں
فرقت ہو یا وصال وہی اضطراب ہے
تیرا اثر ہے اے غم فرقت کہاں کہاں
ہر جنبش نگاہ میں صد کیف بے خودی
بھرتی پھرے گی حسن کی نیت کہاں کہاں
راہ طلب میں چھوڑ دیا دل کا ساتھ بھی
پھرتے لیے ہوئے یہ مصیبت کہاں کہاں
دل کے افق تک اب تو ہیں پرچھائیاں تری
لے جائے اب تو دیکھ یہ وحشت کہاں کہاں
اے نرگس سیاہ بتا دے ترے نثار
کس کس کو ہے یہ ہوش یہ غفلت کہاں کہاں
نیرنگ عشق کی ہے کوئی انتہا کہ یہ
یہ غم کہاں کہاں یہ مسرت کہاں کہاں
بیگانگی پر اس کی زمانے سے احتراز
در پردہ اس ادا کی شکایت کہاں کہاں
فرق آ گیا تھا دور حیات و ممات میں
آئی ہے آج یاد وہ صورت کہاں کہاں
جیسے فنا بقا میں بھی کوئی کمی سی ہو
مجھ کو پڑی ہے تیری ضرورت کہاں کہاں
دنیا سے اے دل اتنی طبیعت بھری نہ تھی
تیرے لئے اٹھائی ندامت کہاں کہاں
اب امتیاز عشق و ہوس بھی نہیں رہا
ہوتی ہے تیری چشم عنایت کہاں کہاں
ہر گام پر طریق محبت میں موت تھی
اس راہ میں کھلے در رحمت کہاں کہاں
ہوش و جنوں بھی اب تو بس اک بات ہیں فراقؔ
ہوتی ہے اس نظر کی شرارت کہاں کہاں
Aai Hai Kuchh Na Poochh Qayamat Kahan Kahan
Aai hai kuchh na poochh qayamat kahan kahan
Uff le gayi hai mujh ko mohabbat kahan kahan
Betaabi o sukoon ki huin manzilain tamam
Behlain tujh se chhut ke tabiyat kahan kahan
Furqat ho ya visal wohi iztirab hai
Tera asar hai ae gham-e-furqat kahan kahan
Har jumbish-e-nigah mein sad kaif-e-be-khudi
Bharti phiregi husn ki niyat kahan kahan
Raah-e-talab mein chhod diya dil ka saath bhi
Phirate liye hue yeh museebat kahan kahan
Dil ke ufuq tak ab to hain parchhaiyan teri
Le jaaye ab to dekh yeh vahshat kahan kahan
Ae nargis-e-siyah bata de tere nisar
Kis kis ko hai yeh hosh yeh ghaflat kahan kahan
Nairang-e-ishq ki hai koi intiha ke yeh
Yeh gham kahan kahan yeh musarrat kahan kahan
Beganagi par us ki zamane se ehtiraz
Dar-parda us ada ki shikayat kahan kahan
Farq aa gaya tha daur-e-hayat o mamat mein
Aai hai aaj yaad woh soorat kahan kahan
Jaise fana baqa mein bhi koi kami si ho
Mujh ko padi hai teri zaroorat kahan kahan
Dunya se ae dil itni tabiyat bhari na thi
Tere liye uthai nadamat kahan kahan
Ab imtiyaz-e-ishq o havas bhi nahin raha
Hoti hai teri chashm-e-inayat kahan kahan
Har gaam par tareeq-e-mohabbat mein maut thi
Is raah mein khule dar-e-rehmat kahan kahan
Hosh o junoon bhi ab to bas ek baat hain Firaq
Hoti hai is nazar ki shararat kahan kahan