دور آغاز جفا دل کا سہارا نکلا — فراق گورکھپوری
شاعر
دور آغاز جفا دل کا سہارا نکلا
دور آغاز جفا دل کا سہارا نکلا
حوصلہ کچھ نہ ہمارا نہ تمہارا نکلا
تیرا نام آتے ہی سکتے کا تھا عالم مجھ پر
جانے کس طرح یہ مذکور دوبارا نکلا
ہوش جاتا ہے جگر جاتا ہے دل جاتا ہے
پردے ہی پردے میں کیا تیرا اشارا نکلا
ہے ترے کشف و کرامات کی دنیا قائل
تجھ سے اے دل نہ مگر کام ہمارا نکلا
کتنے سفاک سر قتل گہہ عالم تھے
لاکھوں میں بس وہی اللہ کا پیارا نکلا
عبرت انگیز ہے کیا اس کی جواں مرگی بھی
ہائے وہ دل جو ہمارا نہ تمہارا نکلا
عشق کی لو سے فرشتوں کے بھی پر جلتے ہیں
رشک خورشید قیامت یہ شرارا نکلا
سر بہ سر بے سر و ساماں جسے سمجھے تھے وہ دل
رشک جمشید و کے و خسرو و دارا نکلا
رونے والے ہوئے چپ ہجر کی دنیا بدلی
شمع بے نور ہوئی صبح کا تارا نکلا
انگلیاں اٹھیں فراقؔ وطن آوارہ پر
آج جس سمت سے وہ درد کا مارا نکلا
Daur-e-Aaghaz-e-Jafa Dil Ka Sahara Nikla
Daur-e-aaghaz-e-jafa dil ka sahara nikla
Hausla kuchh na hamara na tumhara nikla
Tera naam aate hi sakta ka tha alam mujh par
Jaane kis tarah yeh mazkoor dobara nikla
Hosh jaata hai jigar jaata hai dil jaata hai
Parde hi parde mein kya tera ishara nikla
Hai tere kashf-o-karamaat ki dunya qail
Tujh se ae dil na magar kaam hamara nikla
Kitne saffak sar-e-qatl-gah-e-alam the
Lakhon mein bas wohi Allah ka pyara nikla
Ibrat-angez hai kya is ki jawan-margi bhi
Haaye woh dil jo hamara na tumhara nikla
Ishq ki lau se farishton ke bhi par jalte hain
Rashk-e-khurshid-e-qayamat yeh sharara nikla
Sar ba sar be-sar o saman jise samjhe the woh dil
Rashk-e-Jamshid o Key o Khusro o Dara nikla
Rone wale hue chup hijr ki dunya badli
Shama-e-be-noor hui subh ka tara nikla
Ungliyan uthin Firaq-e-watan-e-awara par
Aaj jis simt se woh dard ka mara nikla