دیتے ہیں جام شہادت مجھے معلوم نہ تھا — فراق گورکھپوری
شاعر
دیتے ہیں جام شہادت مجھے معلوم نہ تھا
دیتے ہیں جام شہادت مجھے معلوم نہ تھا
ہے یہ آئین محبت مجھے معلوم نہ تھا
مطلب چشم مروت مجھے معلوم نہ تھا
تجھ کو مجھ سے تھی شکایت مجھے معلوم نہ تھا
چشم خاموش کی بابت مجھے معلوم نہ تھا
یہ بھی ہے حرف و حکایت مجھے معلوم نہ تھا
عشق بس میں ہے مشیت کے عقیدہ تھا مرا
اس کے بس میں ہے مشیت مجھے معلوم نہ تھا
ہفت خواں جس نے کئے طے سر راہ تسلیم
ٹوٹ جاتی ہے وہ ہمت مجھے معلوم نہ تھا
آج ہر قطرۂ مے بن گیا اک چنگاری
تھی یہ ساقی کی شرارت مجھے معلوم نہ تھا
نگہ مست نے تلوار اٹھا لی سر بزم
یوں بدل جاتی ہے نیت مجھے معلوم نہ تھا
غم ہستی سے جو بیزار رہا میں اک عمر
تجھ سے بھی تھی اسے نسبت مجھے معلوم نہ تھا
عشق بھی اہل طریقت میں ہے ایسا تھا خیال
عشق ہے پیر طریقت مجھے معلوم نہ تھا
پوچھ مت شرح کرم ہائے عزیزاں ہمدم
ان میں اتنی تھی شرافت مجھے معلوم نہ تھا
جب سے دیکھا ہے تجھے مجھ سے ہے میری ان بن
حسن کا رنگ سیاست مجھے معلوم نہ تھا
شکل انسان کی ہو چال بھی انسان کی ہو
یوں بھی آتی ہے قیامت مجھے معلوم نہ تھا
سر معمورۂ عالم یہ دل خانہ خراب
مٹ گیا تیری بدولت مجھے معلوم نہ تھا
پردۂ عرض وفا میں بھی رہا ہوں کرتا
تجھ سے میں اپنی ہی غیبت مجھے معلوم نہ تھا
نقد جاں کیا ہے زمانے میں محبت ہمدم
نہیں ملتی کسی قیمت مجھے معلوم نہ تھا
ہو گیا آج رفیقوں سے گلے مل کے جدا
اپنا خود عشق صداقت مجھے معلوم نہ تھا
درد دل کیا ہے کھلا آج ترے لڑنے پر
تجھ سے اتنی تھی محبت مجھے معلوم نہ تھا
دم نکل جائے مگر دل نہ لگائے کوئی
عشق کی یہ تھی وصیت مجھے معلوم نہ تھا
حسن والوں کو بہت سہل سمجھ رکھا تھا
تجھ پہ آئے گی طبیعت مجھے معلوم نہ تھا
کتنی خلاق ہے یہ نیستئ عشق فراقؔ
اس سے ہستی ہے عبارت مجھے معلوم نہ تھا
Dete Hain Jaam-e-Shahadat Mujhe Ma'aloom Na Tha
Dete hain jaam-e-shahadat mujhe ma'aloom na tha
Hai yeh aayin-e-mohabbat mujhe ma'aloom na tha
Matlab-e-chashm-e-murawwat mujhe ma'aloom na tha
Tujh ko mujh se thi shikayat mujhe ma'aloom na tha
Chashm-e-khamosh ki baabat mujhe ma'aloom na tha
Yeh bhi hai harf-o-hikayat mujhe ma'aloom na tha
Ishq bas mein hai mashiyat ke aqeeda tha mera
Us ke bas mein hai mashiyat mujhe ma'aloom na tha
Haft-khwan jis ne kiye tai sar-e-rah-e-tasleem
Toot jaati hai woh himmat mujhe ma'aloom na tha
Aaj har qatra-e-mai ban gaya ek chingari
Thi yeh saaqi ki shararat mujhe ma'aloom na tha
Nigah-e-mast ne talwar utha li sar-e-bazm
Yun badal jaati hai niyat mujhe ma'aloom na tha
Gham-e-hasti se jo bezaar raha main ek umr
Tujh se bhi thi use nisbat mujhe ma'aloom na tha
Ishq bhi ahl-e-tareeqat mein hai aisa tha khayal
Ishq hai peer-e-tareeqat mujhe ma'aloom na tha
Poochh mat sharh-e-karam-haye-azizan-e-humdam
In mein itni thi sharafat mujhe ma'aloom na tha
Jab se dekha hai tujhe mujh se hai meri un-ban
Husn ka rang-e-siyasat mujhe ma'aloom na tha
Shakl insan ki ho chaal bhi insan ki ho
Yun bhi aati hai qayamat mujhe ma'aloom na tha
Sar-e-ma'amoora-e-alam yeh dil-e-khana-kharab
Mit gaya teri badolat mujhe ma'aloom na tha
Parda-e-arz-e-wafa mein bhi raha hoon karta
Tujh se main apni hi ghaibat mujhe ma'aloom na tha
Naqd-e-jaan kya hai zamane mein mohabbat humdam
Nahin milti kisi qeemat mujhe ma'aloom na tha
Ho gaya aaj rafeeqon se gale mil ke juda
Apna khud ishq-e-sadaqat mujhe ma'aloom na tha
Dard-e-dil kya hai khula aaj tere ladne par
Tujh se itni thi mohabbat mujhe ma'aloom na tha
Dam nikal jaaye magar dil na lagaye koi
Ishq ki yeh thi wasiyat mujhe ma'aloom na tha
Husn walon ko bahut sehal samajh rakha tha
Tujh pe aayegi tabiyat mujhe ma'aloom na tha
Kitni khallaq hai yeh neesti-e-ishq Firaq
Is se hasti hai ibarat mujhe ma'aloom na tha