اک روز ہوئے تھے کچھ اشارات خفی سے — فراق گورکھپوری
شاعر
اک روز ہوئے تھے کچھ اشارات خفی سے
اک روز ہوئے تھے کچھ اشارات خفی سے
عاشق ہیں ہم اس نرگس رعنا کے جبھی سے
کرنے کو ہیں دور آج تو تو یہ روگ ہی جی سے
اب رکھیں گے ہم پیار نہ تم سے نہ کسی سے
احباب سے رکھتا ہوں کچھ امید شرافت
رہتے ہیں خفا مجھ سے بہت لوگ اسی سے
کہتا ہوں اسے میں تو خصوصیت پنہاں
کچھ تم کو شکایت ہے کسی سے تو مجھی سے
اشعار نہیں ہیں یہ مری روح کی ہے پیاس
جاری ہوئے سرچشمے مری تشنہ لبی سے
آنسو کو مرے کھیل تماشا نہ سمجھنا
کٹ جاتا ہے پتھر اسی ہیرے کی کنی سے
یاد لب جاناں ہے چراغ دل رنجور
روشن ہے یہ گھر آج اسی لعل یمنی سے
افلاک کی محراب ہے آئی ہوئی انگڑائی
بے کیف کچھ آفاق کی اعضا شکنی سے
کچھ زیر لب الفاظ کھنکتے ہیں فضا میں
گونجی ہوئی ہے بزم تری کم سخنی سے
آج انجمن عشق نہیں انجمن عشق
کس درجہ کمی بزم میں ہے تیری کمی سے
اس وادئ ویراں میں ہے سر چشمۂ دل بھی
ہستی مری سیراب ہے آنکھوں کی نمی سے
خود مجھ کو بھی تا دیر خبر ہو نہیں پائی
آج آئی تری یاد اس آہستہ روی سے
وہ ڈھونڈھنے نکلی ہے تری نکہت گیسو
اک روز ملا تھا میں نسیم سحری سے
سب کچھ وہ دلا دے مجھے سب کچھ وہ بنا دے
اے دوست نہیں دور تری کم نگہی سے
میعاد دوام و ابد اک نیند ہے اس کی
ہم منتہیٔ جلوۂ جاناں ہیں ابھی سے
اک دل کے سوا پاس ہمارے نہیں کچھ بھی
جو کام ہو لے لیتے ہیں ہم لوگ اسی سے
معلوم ہوا اور ہے اک عالم اسرار
آئینۂ ہستی کی پریشاں نظری سے
اس سے تو کہیں بیٹھ رہے توڑ کے اب پاؤں
مل جائے نجات عشق کو اس در بدری سے
رہتا ہوں فراقؔ اس لئے وارفتہ کہ دنیا
کچھ ہوش میں آ جائے مری بے خبری سے
Ek roz hue the kuchh isharaat-e-khafi se
Ek roz hue the kuchh isharaat-e-khafi se
Aashiq hain hum us nargis-e-ra'ana ke jabhi se
Karne ko hain door aaj tu to yeh rog hi ji se
Ab rakhenge hum pyar na tum se na kisi se
Ahbaab se rakhta hoon kuchh umeed-e-sharafat
Rehte hain khafa mujh se bahut log isi se
Kehta hoon usay main to khusoosiyat-e-pinhan
Kuchh tum ko shikayat hai kisi se to mujhi se
Ash'aar nahin hain yeh meri rooh ki hai pyaas
Jaari hue sar-chashme meri tishna-labi se
Aansoo ko mere khel tamasha na samajhna
Kat jaata hai patthar isi heere ki kani se
Yaad-e-lab-e-jaanan hai chiragh-e-dil-e-ranjoor
Roshan hai yeh ghar aaj isi laal-e-yamani se
Aflak ki mehrab hai aai hui angdaai
Be-kaif kuchh aafaq ki a'za-shikani se
Kuchh zer-e-lab alfaz khanakte hain fiza mein
Goonji hui hai bazm teri kam-sukhani se
Aaj anjuman-e-ishq nahin anjuman-e-ishq
Kis darja kami bazm mein hai teri kami se
Is wadi-e-veeran mein hai sar-chashma-e-dil bhi
Hasti meri seraab hai aankhon ki nami se
Khud mujh ko bhi ta dair khabar ho nahin paayi
Aaj aayi teri yaad us aahista-ravi se
Wo dhoondhne nikli hai teri nikhat-e-gesu
Ek roz mila tha main naseem-e-sehri se
Sab kuchh wo dila de mujhe sab kuchh wo bana de
Aye dost nahin door teri kam-nigahi se
Mi'aad-e-dawaam-o-abad ek neend hai uski
Hum muntahi-e-jalwa-e-jaanan hain abhi se
Ek dil ke siwa paas hamare nahin kuchh bhi
Jo kaam ho le lete hain hum log isi se
Maaloom hua aur hai ek aalam-e-israr
Aayine-e-hasti ki pareshan-nazari se
Is se to kaheen baith rahe tod ke ab paaon
Mil jaaye nijaat ishq ko is dar-ba-dari se
Rehta hoon Firaq! is liye waarifta ke duniya
Kuchh hosh mein aa jaaye meri be-khabari se