فراقؔ اک نئی صورت نکل تو سکتی ہے — فراق گورکھپوری
شاعر
فراقؔ اک نئی صورت نکل تو سکتی ہے
فراقؔ اک نئی صورت نکل تو سکتی ہے
بقول اس آنکھ کے دنیا بدل تو سکتی ہے
ترے خیال کو کچھ چپ سی لگ گئی ورنہ
کہانیوں سے شب غم بہل تو سکتی ہے
عروس دہر چلے کھا کے ٹھوکریں لیکن
قدم قدم پہ جوانی ابل تو سکتی ہے
پلٹ پڑے نہ کہیں اس نگاہ کا جادو
کہ ڈوب کر یہ چھری کچھ اچھل تو سکتی ہے
بجھے ہوئے نہیں اتنے بجھے ہوئے دل بھی
فسردگی میں طبیعت مچل تو سکتی ہے
اگر تو چاہے تو غم والے شادماں ہو جائیں
نگاہ یار یہ حسرت نکل تو سکتی ہے
اب اتنی بند نہیں غم کدوں کی بھی راہیں
ہوائے کوچۂ محبوب چل تو سکتی ہے
کڑے ہیں کوس بہت منزل محبت کے
ملے نہ چھاؤں مگر دھوپ ڈھل تو سکتی ہے
حیات لو تہ دامان مرگ دے اٹھی
ہوا کی راہ میں یہ شمع جل تو سکتی ہے
کچھ اور مصلحت جذب عشق ہے ورنہ
کسی سے چھٹ کے طبیعت سنبھل تو سکتی ہے
ازل سے سوئی ہے تقدیر عشق موت کی نیند
اگر جگائیے کروٹ بدل تو سکتی ہے
غم زمانہ و سوز نہاں کی آنچ تو دے
اگر نہ ٹوٹے یہ زنجیر گل تو سکتی ہے
شریک شرم و حیا کچھ ہے بد گمانیٔ حسن
نظر اٹھا یہ جھجک سی نکل تو سکتی ہے
کبھی وہ مل نہ سکے گی میں یہ نہیں کہتا
وہ آنکھ آنکھ میں پڑ کر بدل تو سکتی ہے
بدلتا جائے غم روزگار کا مرکز
یہ چال گردش ایام چل تو سکتی ہے
وہ بے نیاز سہی دل متاع ہیچ سہی
مگر کسی کی جوانی مچل تو سکتی ہے
تری نگاہ سہارا نہ دے تو بات ہے اور
کہ گرتے گرتے بھی دنیا سنبھل تو سکتی ہے
یہ زور و شور سلامت تری جوانی بھی
بقول عشق کے سانچے میں ڈھل تو سکتی ہے
سنا ہے برف کے ٹکڑے ہیں دل حسینوں کے
کچھ آنچ پا کے یہ چاندی پگھل تو سکتی ہے
ہنسی ہنسی میں لہو تھوکتے ہیں دل والے
یہ سر زمین مگر لعل اگل تو سکتی ہے
جو تو نے ترک محبت کو اہل دل سے کہا
ہزار نرم ہو یہ بات کھل تو سکتی ہے
ارے وہ موت ہو یا زندگی محبت پر
نہ کچھ سہی کف افسوس مل تو سکتی ہے
ہیں جس کے بل پہ کھڑے سرکشوں کو وہ دھرتی
اگر کچل نہیں سکتی نگل تو سکتی ہے
ہوئی ہے گرم لہو پی کے عشق کی تلوار
یوں ہی جلائے جا یہ شاخ پھل تو سکتی ہے
گزر رہی ہے دبے پاؤں عشق کی دیوی
سبک روی سے جہاں کو مسل تو سکتی ہے
حیات سے نگہہ واپسیں ہے کچھ مانوس
مرے خیال سے آنکھوں میں پل تو سکتی ہے
نہ بھولنا یہ ہے تاخیر حسن کی تاخیر
فراقؔ آئی ہوئی موت ٹل تو سکتی ہے
Firaq Ek Nai Soorat Nikal To Sakti Hai
Firaq ek nai soorat nikal to sakti hai
Ba-qaul is aankh ke dunya badal to sakti hai
Tere khayal ko kuchh chup si lag gayi warna
Kahaniyon se shab-e-gham behal to sakti hai
Aroos-e-dehar chale kha ke thokerain lekin
Qadam qadam pe jawani ubal to sakti hai
Palat pade na kahin is nigah ka jadoo
Ke doob kar yeh chhuri kuchh uchhal to sakti hai
Bujhe hue nahin itne bujhe hue dil bhi
Fasurdagi mein tabiyat machal to sakti hai
Agar tu chahe to gham wale shadman ho jayen
Nigah-e-yar yeh hasrat nikal to sakti hai
Ab itni band nahin gham-kadon ki bhi rahen
Hawa-e-koocha-e-mehboob chal to sakti hai
Kade hain kos bahut manzil-e-mohabbat ke
Mile na chhaon magar dhoop dhal to sakti hai
Hayat lau teh-e-daaman-e-marg de uthi
Hawa ki raah mein yeh shama' jal to sakti hai
Kuchh aur maslahat-e-jazba-e-ishq hai warna
Kisi se chhut ke tabiyat sambhal to sakti hai
Azal se soi hai taqdeer-e-ishq maut ki neend
Agar jagaiye karwat badal to sakti hai
Gham-e-zamana o soz-e-nihan ki aanch to de
Agar na toote yeh zanjeer gul to sakti hai
Shareek-e-sharm o haya kuchh hai bad-gumani-e-husn
Nazar utha yeh jhijhak si nikal to sakti hai
Kabhi woh mil na sakegi main yeh nahin kehta
Woh aankh aankh mein pad kar badal to sakti hai
Badalta jaaye gham-e-rozgar ka markaz
Yeh chaal gardish-e-ayyam chal to sakti hai
Woh be-niyaz sahi dil mata-e-heech sahi
Magar kisi ki jawani machal to sakti hai
Teri nigah sahara na de to baat hai aur
Ke girte girte bhi dunya sambhal to sakti hai
Yeh zor o shor salamat teri jawani bhi
Ba-qaul-e-ishq ke saanche mein dhal to sakti hai
Suna hai barf ke tukde hain dil haseenon ke
Kuchh aanch pa ke yeh chandi pighal to sakti hai
Hansi hansi mein lahoo thookte hain dil wale
Yeh sar-zameen magar la'al ugal to sakti hai
Jo tu ne tark-e-mohabbat ko ahl-e-dil se kaha
Hazar naram ho yeh baat khul to sakti hai
Are woh maut ho ya zindagi mohabbat par
Na kuchh sahi kaf-e-afsos mil to sakti hai
Hain jis ke bal pe khade sarkashon ko woh dharti
Agar kuchal nahin sakti nigal to sakti hai
Hui hai garm lahoo pee ke ishq ki talwar
Yun hi jalaye ja yeh shakh phal to sakti hai
Guzar rahi hai dabe paon ishq ki devi
Sabuk-ravi se jahan ko masal to sakti hai
Hayat se nigah-e-wapas hai kuchh manoos
Mere khayal se aankhon mein pal to sakti hai
Na bhoolna yeh hai takheer-e-husn ki takheer
Firaq aayi hui maut tal to sakti hai