غم ترا جلوہ گہہ کون و مکاں ہے کہ جو تھا — فراق گورکھپوری
شاعر
غم ترا جلوہ گہہ کون و مکاں ہے کہ جو تھا
غم ترا جلوہ گہہ کون و مکاں ہے کہ جو تھا
یعنی انسان وہی شعلہ بجاں ہے کہ جو تھا
پھر وہی رنگ تکلم نگہ ناز میں ہے
وہی انداز وہی حسن بیاں ہے کہ جو تھا
کب ہے انکار ترے لطف و کرم سے لیکن
تو وہی دشمن دل دشمن جاں ہے کہ جو تھا
عشق افسردہ نہیں آج بھی افسردہ بہت
وہی کم کم اثر سوز نہاں ہے کہ جو تھا
قرب ہی کم ہے نہ دوری ہی زیادہ لیکن
آج وہ ربط کا احساس کہاں ہے کہ جو تھا
نظر آ جاتے ہیں تم کو تو بہت نازک بال
دل مرا کیا وہی اے شیشہ گراں ہے کہ جو تھا
جان دے بیٹھے تھے اک بار ہوس والے بھی
پھر وہی مرحلۂ سود و زیاں ہے کہ جو تھا
حسن کو کھینچ تو لیتا ہے ابھی تک لیکن
وہ اثر جذب محبت میں کہاں ہے کہ جو تھا
آج بھی صید گہ عشق میں حسن سفاک
لئے ابرو کی لچکتی سی کماں ہے کہ جو تھا
پھر تری چشم سخن سنج نے چھیڑی کوئی بات
وہی جادو ہے وہی حسن بیاں ہے کہ جو تھا
پھر سر میکدۂ عشق ہے اک بارش نور
چھلکے جاموں سے چراغاں کا سماں ہے کہ جو تھا
پھر وہی خیر نگاہی ہے ترے جلووں سے
وہی عالم ترا اے برق دماں ہے کہ جو تھا
آج بھی آگ دبی ہے دل انساں میں فراقؔ
آج بھی سینوں سے اٹھتا وہ دھواں ہے کہ جو تھا
Gham tera jalwa-gah-e kaun-o-makaan hai ke jo tha
Gham tera jalwa-gah-e kaun-o-makaan hai ke jo tha
Ya'ni insaan wahi shola-ba-jaan hai ke jo tha
Phir wahi rang-e-takallum nigah-e-naaz mein hai
Wahi andaaz wahi husn-e-bayaan hai ke jo tha
Kab hai inkar tere lutf-o-karam se lekin
Tu wahi dushman-e-dil dushman-e-jaan hai ke jo tha
Ishq afsurda nahin aaj bhi afsurda bahut
Wahi kam kam asar-e-soz-e-nihaan hai ke jo tha
Qurb hi kam hai na doori hi zyada lekin
Aaj wo rabt ka ehsaas kahan hai ke jo tha
Nazar aa jaate hain tum ko to bahut nazuk baal
Dil mera kya wahi aye shisha-garaan hai ke jo tha
Jaan de baithe the ek baar hawas wale bhi
Phir wahi marhala-e-sud-o-ziyan hai ke jo tha
Husn ko kheench to leta hai abhi tak lekin
Wo asar-e-jazb-e-mohabbat mein kahan hai ke jo tha
Aaj bhi said-gah-e-ishq mein husn-e-saffak
Liye abroo ki lachakti si kamaan hai ke jo tha
Phir teri chashm-e-sukhan-sanj ne chhedi koi baat
Wahi jaadu hai wahi husn-e-bayaan hai ke jo tha
Phir sar-e-maikada-e-ishq hai ek barish-e-noor
Chhalkein jaamon se chiraghaan ka samaan hai ke jo tha
Phir wahi khair-nigahi hai tere jalwon se
Wahi aalam tera aye barq-e-damaan hai ke jo tha
Aaj bhi aag dabi hai dil-e-insaan mein Firaq!
Aaj bhi seenaon se uthta wo dhuaan hai ke jo tha