جہان غنچۂ دل کا فقط چٹکنا تھا — فراق گورکھپوری
شاعر
جہان غنچۂ دل کا فقط چٹکنا تھا
جہان غنچۂ دل کا فقط چٹکنا تھا
اسی کی بوئے پریشاں وجود دنیا تھا
یہ کہہ کے کل کوئی بے اختیار روتا تھا
وہ اک نگاہ سہی کیوں کسی کو دیکھا تھا
طنابیں کوچۂ قاتل کی کھنچتی جاتی تھیں
شہید تیغ ادا میں بھی زور کتنا تھا
بس اک جھلک نظر آئی اڑے کلیم کے ہوش
بس اک نگاہ ہوئی خاک طور سینا تھا
ہر اک کے ہاتھ فقط غفلتیں تھیں ہوش نما
کہ اپنے آپ سے بیگانہ وار جینا تھا
یہی ہوا کہ فریب امید و یاس مٹے
وہ پا گئے ترے ہاتھوں ہمیں جو پانا تھا
چمن میں غنچۂ گل کھلکھلا کے مرجھائے
یہی وہ تھے جنہیں ہنس ہنس کے جان دینا تھا
نگاہ مہر میں جس کی ہیں صد پیام فنا
اسی کا عالم ایجاد و ناز بے جا تھا
جہاں تو جلوہ نما تھا لرزتی تھی دنیا
ترے جمال سے کیسا جلال پیدا تھا
حیات و مرگ کے کچھ راز کھل گئے ہوں گے
فسانۂ شب غم ورنہ دوستو کیا تھا
شب عدم کا فسانہ گداز شمع حیات
سوائے کیف فنا میرا ماجرا کیا تھا
کچھ ایسی بات نہ تھی تیرا دور ہو جانا
یہ اور بات کہ رہ رہ کے درد اٹھتا تھا
نہ پوچھ سود و زیاں کاروبار الفت کے
وگرنہ یوں تو نہ پانا تھا کچھ نہ کھوتا تھا
لگاوٹیں وہ ترے حسن بے نیاز کی آہ
میں تیری بزم سے جب ناامید اٹھا تھا
تجھے ہم اے دل درد آشنا کہاں ڈھونڈیں
ہم اپنے ہوش میں کب تھے کوئی جب اٹھا تھا
عدم کا راز صدائے شکست ساز حیات
حجاب زیست بھی کتنا لطیف پردا تھا
یہ اضطراب و سکوں بھی تھی اک فریب حیات
کہ اپنے حال سے بیگانہ وار جینا تھا
کہاں پہ چوک ہوئی تیرے بے قراروں سے
زمانہ دوسری کروٹ بدلنے والا تھا
یہ کوئی یاد ہے یہ بھی ہے کوئی محویت
ترے خیال میں تجھ کو بھی بھول جانا تھا
کہاں کی چوٹ ابھر آئی حسن تاباں میں
دم نظارہ وہ رخ درد سا چمکتا تھا
نہ پوچھ رمز و کنایات چشم ساقی کے
بس ایک حشر خموش انجمن میں برپا تھا
چمن چمن تھی گل داغ عشق سے ہستی
اسی کی نکہت برباد کا زمانہ تھا
وہ تھا مرا دل خوں گشتہ جس کے مٹنے سے
بہار باغ جناں تھی وجود دنیا تھا
قسم ہے بادہ کشو چشم مست ساقی کی
بتاؤ ہاتھ سے کیا جام مے سنبھلتا تھا
وصال اس سے میں چاہوں کہاں یہ دل میرا
یہ رو رہا ہوں کہ کیوں اس کو میں نے دیکھا تھا
امید یاس بنی یاس پھر امید بنی
اس اک نظر میں فریب نگاہ کتنا تھا
یہ سوز و ساز نہاں تھا وہ سوز و ساز عیاں
وصال و ہجر میں بس فرق تھا تو اتنا تھا
شکست ساز چمن تھی بہار لالہ و گل
خزاں مچلتی تھی غنچہ جہاں چٹکتا تھا
ہر ایک سانس ہے تجدید یاد ایامے
گزر گیا وہ زمانہ جسے گزرنا تھا
نہ کوئی وعدہ نہ کوئی یقیں نہ کوئی امید
مگر ہمیں تو ترا انتظار کرنا تھا
کسی کے صبر نے بے صبر دیا سب کو
فراقؔ نزع میں کروٹ کوئی بدلتا تھا
Jahan ghuncha-e-dil ka faqat chatakna tha
Jahan ghuncha-e-dil ka faqat chatakna tha
Usi ki boo-e-pareshan wujood-e-duniya tha
Yeh keh ke kal koi be-ikhtiyar rota tha
Wo ek nigah sahi kyun kisi ko dekha tha
Tanabein koocha-e-qatil ki kheenchti jaati theen
Shaheed-e-tegh-e-ada mein bhi zor kitna tha
Bas ek jhalak nazar aayi ude Kaleem ke hosh
Bas ek nigah hui khaak-e-toor-e-seena tha
Har ek ke haath faqat ghaflatain theen hosh-numa
Ke apne aap se begana-waar jeena tha
Yehi hua ke fareb-e-umeed-o-yaas mite
Wo pa gaye tere haathon hamein jo paana tha
Chaman mein ghuncha-e-gul khilkhila ke murjhaye
Yehi wo the jinhein hans hans ke jaan dena tha
Nigah-e-mehr mein jiski hain sad payam-e-fana
Usi ka aalam-e-eejad-o-naaz-e-beja tha
Jahan tu jalwa-numa tha larazti thi duniya
Tere jamaal se kaisa jalaal paida tha
Hayat-o-marg ke kuchh raaz khul gaye honge
Fasana-e-shab-e-gham warna dosto kya tha
Shab-e-adam ka fasana-e-gudaz-e-shama-e-hayat
Siwa-e-kaif-e-fana mera maajra kya tha
Kuchh aisi baat na thi tera door ho jaana
Yeh aur baat ke reh reh ke dard uthta tha
Na poochh sud-o-ziyan karobar-e-ulfat ke
Wagarna yoon to na paana tha kuchh na khota tha
Lagawatein wo tere husn-e-be-niyaaz ki aah
Main teri bazm se jab naa-umeed utha tha
Tujhe hum aye dil-e-dard-aashna kahan dhoondhein
Hum apne hosh mein kab the koi jab utha tha
Adam ka raaz sada-e-shikast-e-saaz-e-hayat
Hijab-e-zeest bhi kitna lateef parda tha
Yeh izteraab-o-sukoon bhi thi ek fareb-e-hayat
Ke apne haal se begana-waar jeena tha
Kahan pe chook hui tere be-qararon se
Zamana doosri karwat badalne wala tha
Yeh koi yaad hai yeh bhi hai koi mehviyat
Tere khayal mein tujh ko bhi bhool jaana tha
Kahan ki chot ubhar aayi husn-e-taaban mein
Dam-e-nazzara wo rukh dard sa chamakta tha
Na poochh ramz-o-kinayaat-e-chashm-e-saqi ke
Bas ek hashr-e-khamosh anjuman mein barpa tha
Chaman chaman thi gul-e-dagh-e-ishq se hasti
Usi ki nikhat-e-barbaad ka zamana tha
Wo tha mera dil-e-khoon-gushta jiske mitne se
Bahar-e-bagh-e-jinaan thi wujood-e-duniya tha
Qasam hai bada-kusho chashm-e-mast-e-saqi ki
Batao haath se kya jaam-e-may sambhalta tha
Wisaal us se main chahoon kahan yeh dil mera
Yeh ro raha hoon ke kyun usko main ne dekha tha
Umeed yaas bani yaas phir umeed bani
Is ek nazar mein fareb-e-nigah kitna tha
Yeh soz-o-saaz-e-nihaan tha wo soz-o-saaz-e-ayyan
Wisaal-o-hijr mein bas farq tha to itna tha
Shikast-e-saaz-e-chaman thi bahar-e-lala-o-gul
Khizaan machalti thi ghuncha jahan chatakta tha
Har ek saans hai tajdeed-e-yaad-e-ayyaame
Guzar gaya wo zamana jise guzarna tha
Na koi waada na koi yaqeen na koi umeed
Magar hamein to tera intezar karna tha
Kisi ke sabr ne be-sabr diya sab ko
Firaq! naz'a mein karwat koi badalta tha