جور و بے مہری اغماض پہ کیا روتا ہے — فراق گورکھپوری
شاعر
جور و بے مہری اغماض پہ کیا روتا ہے
جور و بے مہری اغماض پہ کیا روتا ہے
مہرباں بھی کوئی ہو جائے گا جلدی کیا ہے
کھو دیا تم کو تو ہم پوچھتے پھرتے ہیں یہی
جس کی تقدیر بگڑ جائے وہ کرتا کیا ہے
دل کا اک کام جو ہوتا نہیں اک مدت سے
تم ذرا ہاتھ لگا دو تو ہوا رکھا ہے
نگۂ شوخ میں اور دل میں ہیں چوٹیں کیا کیا
آج تک ہم نہ سمجھ پائے کہ جھگڑا کیا ہے
عشق سے توبہ بھی ہے حسن سے شکوے بھی ہزار
کہیے تو حضرت دل آپ کا منشا کیا ہے
زینت دوش ترا نامۂ اعمال نہ ہو
تیری دستار سے واعظ یہ لٹکتا کیا ہے
ہاں ابھی وقت کا آئینہ دکھائے کیا کیا
دیکھتے جاؤ زمانہ ابھی دیکھا کیا ہے
نہ یگانے ہیں نہ بیگانے تری محفل میں
نہ کوئی غیر یہاں ہے نہ کوئی اپنا ہے
نگہ مست کو جنبش نہ ہوئی گو سر بزم
کچھ تو اس جام لبا لب سے ابھی چھلکا ہے
رات دن پھرتی ہے پلکوں کے جو سائے سائے
دل مرا اس نگۂ ناز کا دیوانا ہے
ہم جدائی سے بھی کچھ کام تو لے ہی لیں گے
بے نیازانہ تعلق ہی چھٹا اچھا ہے
ان سے بڑھ چڑھ کے تو اے دوست ہیں یادیں ان کی
ناز و انداز و ادا میں تری رکھا کیا ہے
ایسی باتوں سے بدلتی ہے کہیں فطرت حسن
جان بھی دے دے اگر کوئی تو کیا ہوتا ہے
تری آنکھوں کو بھی انکار تری زلف کو بھی
کس نے یہ عشق کو دیوانہ بنا رکھا ہے
دل ترا جان تری آہ تری اشک ترے
جو ہے اے دوست وہ تیرا ہے ہمارا کیا ہے
در دولت پہ دعائیں سی سنی ہیں میں نے
دیکھیے آج فقیروں کا کدھر پھیرا ہے
تجھ کو ہو جائیں گے شیطان کے درشن واعظ
ڈال کر منہ کو گریباں میں کبھی دیکھا ہے
ہم کہے دیتے ہیں چالوں میں نہ آؤ ان کی
ثروت و جاہ کے عشووں سے بچو دھوکا ہے
یہی گر آنکھ میں رہ جائے تو ہے چنگاری
قطرۂ اشک جو بہہ جائے تو اک دریا ہے
زلف شب گوں کے سوا نرگس جادو کے سوا
دل کو کچھ اور بلاؤں نے بھی آ گھیرا ہے
لب اعجاز کی سوگند یہ جھنکار تھی کیا
تیری خاموشی کے مانند ابھی کچھ ٹوٹا ہے
دار پر گاہ نظر گاہ سوئے شہر نگار
کچھ سنیں ہم بھی تو اے عشق ارادہ کیا ہے
آ کہ غربت کدۂ دہر میں جی بہلائیں
اے دل اس جلوہ گہہ ناز میں کیا رکھا ہے
زخم ہی زخم ہوں میں صبح کی مانند فراقؔ
رات بھر ہجر کی لذت سے مزا لوٹا ہے
Jaur-o-be-mehri-e-ighmaz pe kya rota hai
Jaur-o-be-mehri-e-ighmaz pe kya rota hai
Meharbaan bhi koi ho jaaye ga jaldi kya hai
Kho diya tum ko to hum poochhte phirte hain yehi
Jiski taqdeer bigad jaaye wo karta kya hai
Dil ka ek kaam jo hota nahin ek muddat se
Tum zara haath laga do to hua rakha hai
Nigah-e-shokh mein aur dil mein hain chotein kya kya
Aaj tak hum na samajh paaye ke jhagda kya hai
Ishq se tauba bhi hai husn se shikwe bhi hazaar
Kahiye to hazrat-e-dil aap ka mansha kya hai
Zeenat-e-dosh tera nama-e-amaal na ho
Teri dastaar se wa'iz yeh latakta kya hai
Haan abhi waqt ka aayina dikhaye kya kya
Dekhte jaao zamana abhi dekha kya hai
Na yagane hain na begane teri mehfil mein
Na koi ghair yahan hai na koi apna hai
Nigah-e-mast ko junbish na hui go sar-e-bazm
Kuchh to is jaam-e-laba-lab se abhi chhalka hai
Raat din phirti hai palkon ke jo saaye saaye
Dil mera us nigah-e-naaz ka deewana hai
Hum judai se bhi kuchh kaam to le hi lenge
Be-niyaazana ta'alluq hi chhuta achha hai
Un se badh chadh ke to aye dost hain yaadein unki
Naaz-o-andaaz-o-ada mein teri rakha kya hai
Aisi baaton se badalti hai kahin fitrat-e-husn
Jaan bhi de de agar koi to kya hota hai
Teri aankhon ko bhi inkar teri zulf ko bhi
Kis ne yeh ishq ko deewana bana rakha hai
Dil tera jaan teri aah teri ashk tere
Jo hai aye dost wo tera hai hamara kya hai
Dar-e-daulat pe duaaein si suni hain main ne
Dekhiye aaj faqiron ka kidhar phera hai
Tujh ko ho jayenge shaitan ke darshan wa'iz
Daal kar munh ko garebaan mein kabhi dekha hai
Hum kahe dete hain chaalon mein na aao unki
Sarwat-o-jah ke ishvon se bacho dhoka hai
Yehi gar aankh mein reh jaaye to hai chingaari
Qatra-e-ashk jo beh jaaye to ek darya hai
Zulf-e-shab-goon ke siwa nargis-e-jaadu ke siwa
Dil ko kuchh aur balaaon ne bhi aa ghera hai
Lab-e-eejaz ki sogand yeh jhankar thi kya
Teri khamoshi ke maanind abhi kuchh toota hai
Daar par gah nazar gah soo-e-shehr-e-nigar
Kuchh sunein hum bhi to aye ishq irada kya hai
Aa ke ghurbat-kada-e-dehr mein jee behlaein
Aye dil is jalwa-gah-e-naaz mein kya rakha hai
Zakhm hi zakhm hoon main subh ki maanind Firaq!
Raat bhar hijr ki lazzat se maza loota hai