کسی کا یوں تو ہوا کون عمر بھر پھر بھی — فراق گورکھپوری
شاعر
کسی کا یوں تو ہوا کون عمر بھر پھر بھی
کسی کا یوں تو ہوا کون عمر بھر پھر بھی
یہ حسن و عشق تو دھوکا ہے سب مگر پھر بھی
ہزار بار زمانہ ادھر سے گزرا ہے
نئی نئی سی ہے کچھ تیری رہ گزر پھر بھی
کہوں یہ کیسے ادھر دیکھ یا نہ دیکھ ادھر
کہ درد درد ہے پھر بھی نظر نظر پھر بھی
خوشا اشارۂ پیہم زہے سکوت نظر
دراز ہو کے فسانہ ہے مختصر پھر بھی
جھپک رہی ہیں زمان و مکاں کی بھی آنکھیں
مگر ہے قافلہ آمادۂ سفر پھر بھی
شب فراق سے آگے ہے آج میری نظر
کہ کٹ ہی جائے گی یہ شام بے سحر پھر بھی
کہیں یہی تو نہیں کاشف حیات و ممات
یہ حسن و عشق بظاہر ہیں بے خبر پھر بھی
پلٹ رہے ہیں غریب الوطن پلٹنا تھا
وہ کوچہ روکش جنت ہو گھر ہے گھر پھر بھی
لٹا ہوا چمن عشق ہے نگاہوں کو
دکھا گیا وہی کیا کیا گل و ثمر پھر بھی
خراب ہو کے بھی سوچا کیے ترے مہجور
یہی کہ تیری نظر ہے تری نظر پھر بھی
ہو بے نیاز اثر بھی کبھی تری مٹی
وہ کیمیا ہی سہی رہ گئی کسر پھر بھی
لپٹ گیا ترا دیوانہ گرچہ منزل سے
اڑی اڑی سی ہے یہ خاک رہ گزر پھر بھی
تری نگاہ سے بچنے میں عمر گزری ہے
اتر گیا رگ جاں میں یہ نیشتر پھر بھی
غم فراق کے کشتوں کا حشر کیا ہوگا
یہ شام ہجر تو ہو جائے گی سحر پھر بھی
فنا بھی ہو کے گراں باریٔ حیات نہ پوچھ
اٹھائے اٹھ نہیں سکتا یہ درد سر پھر بھی
ستم کے رنگ ہیں ہر التفات پنہاں میں
کرم نما ہیں ترے جور سر بسر پھر بھی
خطا معاف ترا عفو بھی ہے مثل سزا
تری سزا میں ہے اک شان در گزر پھر بھی
اگرچہ بے خودیٔ عشق کو زمانہ ہوا
فراقؔ کرتی رہی کام وہ نظر پھر بھی
Kisi ka yoon to hua kaun umr bhar phir bhi
Kisi ka yoon to hua kaun umr bhar phir bhi
Yeh husn-o-ishq to dhoka hai sab magar phir bhi
Hazaar baar zamana idhar se guzra hai
Nayi nayi si hai kuchh teri rah-guzar phir bhi
Kahoon yeh kaise idhar dekh ya na dekh idhar
Ke dard dard hai phir bhi nazar nazar phir bhi
Khusha ishara-e-paiham zahe sukoot-e-nazar
Daraaz ho ke fasana hai mukhtasar phir bhi
Jhapak rahi hain zamaan-o-makaan ki bhi aankhein
Magar hai qafla aamada-e-safar phir bhi
Shab-e-firaq se aage hai aaj meri nazar
Ke kat hi jaayegi yeh sham-e-be-sehar phir bhi
Kahin yehi to nahin kashif-e-hayat-o-mamaat
Yeh husn-o-ishq ba-zahir hain be-khabar phir bhi
Palat rahe hain ghareeb-ul-watan palatna tha
Wo koocha-e-rukash-e-jannat ho ghar hai ghar phir bhi
Luta hua chaman-e-ishq hai nigahon ko
Dikha gaya wahi kya kya gul-o-samar phir bhi
Kharab ho ke bhi socha kiye tere mehjoor
Yehi ke teri nazar hai teri nazar phir bhi
Ho be-niyaaz-e-asar bhi kabhi teri mitti
Wo keemiya hi sahi reh gayi kasar phir bhi
Lipat gaya tera deewana garche manzil se
Udi udi si hai yeh khaak-e-rah-guzar phir bhi
Teri nigah se bachne mein umr guzri hai
Utar gaya rag-e-jaan mein yeh neshtar phir bhi
Gham-e-firaq ke kushton ka hashr kya hoga
Yeh sham-e-hijr to ho jaayegi sehar phir bhi
Fana bhi ho ke giran-bari-e-hayat na poochh
Uthaye uth nahin sakta yeh dard-e-sar phir bhi
Sitam ke rang hain har iltefaat-e-pinhan mein
Karam-numa hain tere jaur sar-ba-sar phir bhi
Khata muaaf tera afv bhi hai misl-e-saza
Teri saza mein hai ek shaan-e-dar-guzar phir bhi
Agarche be-khudi-e-ishq ko zamana hua
Firaq! karti rahi kaam wo nazar phir bhi