کچھ نہ کچھ عشق کی تاثیر کا اقرار تو ہے — فراق گورکھپوری
شاعر
کچھ نہ کچھ عشق کی تاثیر کا اقرار تو ہے
کچھ نہ کچھ عشق کی تاثیر کا اقرار تو ہے
اس کا الزام تغافل پہ کچھ انکار تو ہے
ہر فریب غم دنیا سے خبردار تو ہے
تیرا دیوانہ کسی کام میں ہشیار تو ہے
دیکھ لیتے ہیں سبھی کچھ ترے مشتاق جمال
خیر دیدار نہ ہو حسرت دیدار تو ہے
معرکے سر ہوں اسی برق نظر سے اے حسن
یہ چمکتی ہوئی چلتی ہوئی تلوار تو ہے
سر پٹکنے کو پٹکتا ہے مگر رک رک کر
تیرے وحشی کو خیال در و دیوار تو ہے
عشق کا شکوۂ بے جا بھی نہ بے کار گیا
نہ سہی جور مگر جور کا اقرار تو ہے
تجھ سے ہمت تو پڑی عشق کو کچھ کہنے کی
خیر شکوہ نہ سہی شکر کا اظہار تو ہے
اس میں بھی رابطۂ خاص کی ملتی ہے جھلک
خیر اقرار محبت نہ ہو انکار تو ہے
کیوں جھپک جاتی ہے رہ رہ کے تری برق نگاہ
یہ جھجک کس لئے اک کشتۂ دیدار تو ہے
کئی عنوان ہیں ممنون کرم کرنے کے
عشق میں کچھ نہ سہی زندگی بیکار تو ہے
سحر و شام سر انجمن ناز نہ ہو
جلوۂ حسن تو ہے عشق سیہ کار تو ہے
چونک اٹھتے ہیں فراقؔ آتے ہی اس شوخ کا نام
کچھ سراسیمگیٔ عشق کا اقرار تو ہے
Kuchh na kuchh ishq ki taseer ka iqrar to hai
Kuchh na kuchh ishq ki taseer ka iqrar to hai
Uska ilzaam-e-taghaful pe kuchh inkar to hai
Har fareb-e-gham-e-duniya se khabardar to hai
Tera deewana kisi kaam mein hoshiyar to hai
Dekh lete hain sabhi kuchh tere mushtaq-e-jamaal
Khair deedar na ho hasrat-e-deedar to hai
Ma'arke sar hon isi barq-e-nazar se aye husn
Yeh chamakti hui chalti hui talwar to hai
Sar patakne ko patakta hai magar ruk ruk kar
Tere wahshi ko khayal-e-dar-o-deewar to hai
Ishq ka shikwa-e-be-ja bhi na be-kaar gaya
Na sahi jaur magar jaur ka iqrar to hai
Tujh se himmat to padi ishq ko kuchh kehne ki
Khair shikwa na sahi shukr ka izhar to hai
Is mein bhi rabita-e-khaas ki milti hai jhalak
Khair iqrar-e-mohabbat na ho inkar to hai
Kyun jhapak jaati hai reh reh ke teri barq-e-nigah
Yeh jhijhak kis liye ek kushta-e-deedar to hai
Kai unwan hain mamnoon-e-karam karne ke
Ishq mein kuchh na sahi zindagi be-kaar to hai
Sehar-o-shaam sar-e-anjuman-e-naaz na ho
Jalwa-e-husn to hai ishq-e-siyah-kaar to hai
Chaunk uthte hain Firaq! aate hi us shokh ka naam
Kuchh sarasimegi-e-ishq ka iqrar to hai