رات بھی نیند بھی کہانی بھی — فراق گورکھپوری
شاعر
رات بھی نیند بھی کہانی بھی
رات بھی نیند بھی کہانی بھی
ہائے کیا چیز ہے جوانی بھی
ایک پیغام زندگانی بھی
عاشقی مرگ ناگہانی بھی
اس ادا کا تری جواب نہیں
مہربانی بھی سرگرانی بھی
دل کو اپنے بھی غم تھے دنیا میں
کچھ بلائیں تھیں آسمانی بھی
منصب دل خوشی لٹانا ہے
غم پنہاں کی پاسبانی بھی
دل کو شعلوں سے کرتی ہے سیراب
زندگی آگ بھی ہے پانی بھی
شاد کاموں کو یہ نہیں توفیق
دل غمگیں کی شادمانی بھی
لاکھ حسن یقیں سے بڑھ کر ہے
ان نگاہوں کی بد گمانی بھی
تنگنائے دل ملول میں ہے
بحر ہستی کی بے کرانی بھی
عشق ناکام کی ہے پرچھائیں
شادمانی بھی کامرانی بھی
دیکھ دل کے نگار خانے میں
زخم پنہاں کی ہے نشانی بھی
خلق کیا کیا مجھے نہیں کہتی
کچھ سنوں میں تری زبانی بھی
آئے تاریخ عشق میں سو بار
موت کے دور درمیانی بھی
اپنی معصومیت کے پردے میں
ہو گئی وہ نظر سیانی بھی
دن کو سورج مکھی ہے وہ نو گل
رات کو ہے وہ رات رانی بھی
دل بد نام تیرے بارے میں
لوگ کہتے ہیں اک کہانی بھی
وضع کرتے کوئی نئی دنیا
کہ یہ دنیا ہوئی پرانی بھی
دل کو آداب بندگی بھی نہ آئے
کر گئے لوگ حکمرانی بھی
جور کم کم کا شکریہ بس ہے
آپ کی اتنی مہربانی بھی
دل میں اک ہوک بھی اٹھی اے دوست
یاد آئی تری جوانی بھی
سر سے پا تک سپردگی کی ادا
ایک انداز ترکمانی بھی
پاس رہنا کسی کا رات کی رات
میہمانی بھی میزبانی بھی
ہو نہ عکس جبین ناز کہ ہے
دل میں اک نور کہکشانی بھی
زندگی عین دید یار فراقؔ
زندگی ہجر کی کہانی بھی
Raat bhi neend bhi kahani bhi
Raat bhi neend bhi kahani bhi
Haaye kya cheez hai jawani bhi
Ek payam-e-zindagani bhi
Aashiqi marg-e-nagahani bhi
Is ada ka teri jawab nahin
Meharbani bhi sargirani bhi
Dil ko apne bhi gham the duniya mein
Kuchh balaein theen aasmaani bhi
Mansab-e-dil khushi lutana hai
Gham-e-pinhan ki pasbani bhi
Dil ko sholon se karti hai seraab
Zindagi aag bhi hai paani bhi
Shaad kaamon ko yeh nahin taufeeq
Dil-e-ghamgeen ki shadmani bhi
Lakh husn-e-yaqeen se badh kar hai
Un nigahon ki bad-gumani bhi
Tang-na-e-dil-e-malool mein hai
Bahr-e-hasti ki be-karani bhi
Ishq-e-nakaam ki hai parchhaiyan
Shadmani bhi kaamrani bhi
Dekh dil ke nigar-khane mein
Zakhm-e-pinhan ki hai nishani bhi
Khalq kya kya mujhe nahin kehti
Kuchh sunoon main teri zabani bhi
Aaye tareekh-e-ishq mein sau baar
Maut ke daur-e-darmiyani bhi
Apni masoomiyat ke parde mein
Ho gayi wo nazar siyani bhi
Din ko suraj-mukhi hai wo nau-gul
Raat ko hai wo raat-rani bhi
Dil badnaam tere baare mein
Log kehte hain ek kahani bhi
Waza karte koi nayi duniya
Ke yeh duniya hui purani bhi
Dil ko aadaab-e-bandagi bhi na aaye
Kar gaye log hukmarani bhi
Jaur-e-kam kam ka shukriya bas hai
Aap ki itni meharbani bhi
Dil mein ek hook bhi uthi aye dost
Yaad aayi teri jawani bhi
Sar se pa tak supardagi ki ada
Ek andaaz-e-turkmana bhi
Paas rehna kisi ka raat ki raat
Mehmaani bhi mezbaani bhi
Ho na aks-e-jabeen-e-naaz ke hai
Dil mein ek noor-e-kehkashani bhi
Zindagi ain-e-deed-e-yar Firaq!
Zindagi hijr ki kahani bhi