سر میں سودا بھی نہیں دل میں تمنا بھی نہیں — فراق گورکھپوری
شاعر
سر میں سودا بھی نہیں دل میں تمنا بھی نہیں
سر میں سودا بھی نہیں دل میں تمنا بھی نہیں
لیکن اس ترک محبت کا بھروسا بھی نہیں
دل کی گنتی نہ یگانوں میں نہ بیگانوں میں
لیکن اس جلوہ گہہ ناز سے اٹھتا بھی نہیں
مہربانی کو محبت نہیں کہتے اے دوست
آہ اب مجھ سے تری رنجش بے جا بھی نہیں
ایک مدت سے تری یاد بھی آئی نہ ہمیں
اور ہم بھول گئے ہوں تجھے ایسا بھی نہیں
آج غفلت بھی ان آنکھوں میں ہے پہلے سے سوا
آج ہی خاطر بیمار شکیبا بھی نہیں
بات یہ ہے کہ سکون دل وحشی کا مقام
کنج زنداں بھی نہیں وسعت صحرا بھی نہیں
ارے صیاد ہمیں گل ہیں ہمیں بلبل ہیں
تو نے کچھ آہ سنا بھی نہیں دیکھا بھی نہیں
آہ یہ مجمع احباب یہ بزم خاموش
آج محفل میں فراقؔ سخن آرا بھی نہیں
یہ بھی سچ ہے کہ محبت پہ نہیں میں مجبور
یہ بھی سچ ہے کہ ترا حسن کچھ ایسا بھی نہیں
یوں تو ہنگامے اٹھاتے نہیں دیوانۂ عشق
مگر اے دوست کچھ ایسوں کا ٹھکانا بھی نہیں
فطرت حسن تو معلوم ہے تجھ کو ہمدم
چارہ ہی کیا ہے بجز صبر سو ہوتا بھی نہیں
منہ سے ہم اپنے برا تو نہیں کہتے کہ فراقؔ
ہے ترا دوست مگر آدمی اچھا بھی نہیں
Sar mein sauda bhi nahin dil mein tamanna bhi nahin
Sar mein sauda bhi nahin dil mein tamanna bhi nahin
Lekin is tark-e-mohabbat ka bharosa bhi nahin
Dil ki ginti na yaganon mein na beganon mein
Lekin is jalwa-gah-e-naaz se uthta bhi nahin
Meharbani ko mohabbat nahin kehte aye dost
Aah ab mujh se teri ranjish-e-be-ja bhi nahin
Ek muddat se teri yaad bhi aayi na hamein
Aur hum bhool gaye hon tujhe aisa bhi nahin
Aaj ghaflat bhi un aankhon mein hai pehle se siwa
Aaj hi khatir-e-bemaar-e-shakeba bhi nahin
Baat yeh hai ke sukoon-e-dil-e-wahshi ka muqam
Kunj-e-zindan bhi nahin wus'at-e-sahra bhi nahin
Are sayyad hamein gul hain hamein bulbul hain
Tu ne kuchh aah suna bhi nahin dekha bhi nahin
Aah yeh majma-e-ahbab yeh bazm-e-khamosh
Aaj mehfil mein Firaq! sukhan-aara bhi nahin
Yeh bhi sach hai ke mohabbat pe nahin main majboor
Yeh bhi sach hai ke tera husn kuchh aisa bhi nahin
Yoon to hangame uthate nahin deewane-e-ishq
Magar aye dost kuchh aison ka thikana bhi nahin
Fitrat-e-husn to maloom hai tujh ko hamdam
Chara hi kya hai bajuz sabr so hota bhi nahin
Munh se hum apne bura to nahin kehte ke Firaq!
Hai tera dost magar aadmi achha bhi nahin