اے صنم جس نے تجھے چاند سی صورت دی ہے — حیدر علی آتش
شاعر
اے صنم جس نے تجھے چاند سی صورت دی ہے
اے صنم جس نے تجھے چاند سی صورت دی ہے
اسی اللہ نے مجھ کو بھی محبت دی ہے
تیغ بے آب ہے نے بازوئے قاتل کمزور
کچھ گراں جانی ہے کچھ موت نے فرصت دی ہے
اس قدر کس کے لیے یہ جنگ و جدل اے گردوں
نہ نشاں مجھ کو دیا ہے نہ تو نوبت دی ہے
سانپ کے کاٹے کی لہریں ہیں شب و روز آتیں
کاکل یار کے سودے نے اذیت دی ہے
آئی اکسیر غنی دل نہیں رکھتی ایسا
خاکساری نہیں دی ہے مجھے دولت دی ہے
شمع کا اپنے فتیلہ نہیں کس رات جلا
عمل حب کی بہت ہم نے بھی دعوت دی ہے
جسم کو زیر زمیں بھی وہی پہونچا دے گا
روح کو جس نے فلک سیر کی طاقت دی ہے
فرقت یار میں رو رو کے بسر کرتا ہوں
زندگانی مجھے کیا دی ہے مصیبت دی ہے
یاد محبوب فراموش نہ ہووے اے دل
حسن نیت نے مجھے عشق سے نعمت دی ہے
گوش پیدا کیے سننے کو ترا ذکر جمال
دیکھنے کو ترے، آنکھوں میں بصارت دی ہے
لطف دل بستگیٔ عاشق شیدا کو نہ پوچھ
دو جہاں سے اس اسیری نے فراغت دی ہے
کمر یار کے مضمون کو باندھو آتشؔ
زلف خوباں سی رسا تم کو طبیعت دی ہے
Ae sanam jis ne tujhe chand si soorat di hai
Ae sanam jis ne tujhe chand si soorat di hai
Usi Allah ne mujh ko bhi mohabbat di hai
Tegh-e-be-aab hai ne bazoo-e-qatil kamzor
Kuchh giran-jani hai kuchh maut ne fursat di hai
Is qadar kis ke liye ye jang-o-jadal ae gardoon
Na nishaan mujh ko diya hai na to naubat di hai
Saanp ke kaate ki lahrein hain shab-o-roz aatein
Kakul-e-yaar ke saude ne aziyat di hai
Aayi ikseer ghani dil nahin rakhti aisa
Khaksari nahin di hai mujhe daulat di hai
Shama ka apne fateela nahin kis raat jala
Amal-e-hubb ki bahut hum ne bhi dawat di hai
Jism ko zer-e-zameen bhi wahi pahuncha dega
Rooh ko jis ne falak-sair ki taaqat di hai
Furqat-e-yaar mein ro ro ke basar karta hoon
Zindagani mujhe kya di hai museebat di hai
Yaad-e-mahboob faramosh na howe ae dil
Husn-e-niyat ne mujhe ishq se nemat di hai
Gosh paida kiye sunne ko tera zikr-e-jamal
Dekhne ko tere, aankhon mein basarat di hai
Lutf-e-dil-bastagi aashiq-e-shaida ko na poochh
Do jahan se is aseeri ne faraghat di hai
Kamar-e-yaar ke mazmoon ko baandho Atish!
Zulf-e-khooban si rasa tum ko tabiyat di hai
شاعر کے بارے میں
خواجہ حیدر علی آتش اردو کے کلاسیکی دور کے نامور شاعر اور دبستانِ لکھنؤ کے اہم نمائندہ تھے۔ ان کی پیدائش 1778ء (بعض تذکروں کے مطابق 1764ء یا 1767ء) ...
مکمل تعارف پڑھیں