عجیب قصہ ہے — جاوید اختر

Ajeeb Qissa Hai

Ajeeb qissa hai
Jab ye duniya samajh rahi thi
Tum apni duniya mein jee rahi ho
Main apni duniya mein jee raha hoon
To hum ne saari nigahon se door
Ek duniya basayi thi
Jo ke meri bhi thi
Tumhari bhi thi
Jahan fizaon mein
Donon ke khwab jaagte the
Jahan hawaon mein
Donon ki sargoshiyan ghuli thin
Jahan ke phoolon mein
Donon ki aarzoo ke sab rang
Khil rahe the
Jahan pe donon ki jurraton ke
Hazaar chashme ubal rahe the
Na waswase the na ranj-o-gham the
Sukoon ka gehra ik samundar tha
Aur hum the
Ajeeb qissa hai
Saari duniya ne
Jab ye jaana
Ke hum ne saari nigahon se door
Ek duniya basayi hai to
Har ek abroo ne jaise hum par kamaan taani
Tamaam peshaniyon pe ubharin
Gham aur ghusse ki gehri shikanen
Kisi ke lahje se talkhi chhalki
Kisi ki baaton mein turshi aayi
Kisi ne chaha
Ke koi deewar hi utha de
Kisi ne chaha
Hamari duniya hi woh mita de
Magar zamane ko haarna tha
Zamana haara
Ye saari duniya ko manna hi pada
Hamare khayal ki ek si zameen hai
Hamare khwabon ka ek jaisa hi aasmaan hai
Magar purani ye daastaan hai
Ke hum pe duniya
Ab ek arse se mehrban hai
Ajeeb qissa hai
Jab ke duniya ne
Kab ka tasleem kar liya hai
Hum ek duniya ke rahne wale hain
Sach to ye hai
Tum apni duniya mein jee rahi ho
Main apni duniya mein jee raha hoon!