بنجارہ — جاوید اختر

Banjara

Main Banjara
Waqt ke kitne shehron se guzra hoon
Lekin
Waqt ke is ek shehr se jaate jaate mud ke dekh raha hoon
Soch raha hoon
Tum se mera yeh naata bhi toot raha hai
Tum ne mujh ko chhoda tha jis shehr mein aa kar
Waqt ka ab woh shehr bhi mujh se chhoot raha hai
Mujh ko vidaa karne aaye hain
Is nagri ke saare baasi
Woh saare din
Jin ke kandhe par soti hai
Ab bhi tumhari zulf ki khushboo
Saare lamhe
Jin ke maathe par roshan
Ab bhi tumhare lams ka teeka
Nam aankhon se
Gum sum mujh ko dekh rahe hain
Mujh ko un ke dukh ka pata hai
Un ko mere gham ki khabar hai
Lekin mujh ko hukm-e-safar hai
Jaana hoga
Waqt ke agle shehr mujhe ab jaana hoga
Waqt ke agle shehr ke saare baashinde
Sab din sab raatein
Jo tum se nawaaqif honge
Woh kab meri baat sunenge
Mujh se kahenge
Jao apni raah lo raahi
Hum ko kitne kaam pade hain
Jo beeti so beet gayi
Ab woh baatein kyun dohrate ho
Kandhe par yeh jholi rakhe
Kyun phirte ho kya paate ho
Main bechaara
Ek banjara
Aawara phirte phirte jab thak jaunga
Tanhai ke teele par ja kar baithunga
Phir jaise pehchan ke mujh ko
Ek banjara jaan ke mujh ko
Waqt ke agle shehr ke saare nanhe munne bhoole lamhe
Nange paaon
Daude daude bhaage bhaage aa jayenge
Mujh ko gher ke baithenge
Aur mujh se kahenge
Kyun banjare
Tum toh waqt ke kitne shehron se guzre ho
In shehron ki koi kahani hamein sunaao
Un se kahunga
Nanhe lamho!
Ek thi rani
Sun ke kahani
Saare nanhe lamhe
Ghamgeen ho kar mujh se yeh poochhenge
Tum kyun un ke shehr na aayein
Lekin un ko behla loonga
Un se kahunga
Yeh mat poocho
Aankhein moondo
Aur yeh socho
Tum hotin toh kaisa hota
Tum yeh kahteen
Tum woh kahteen
Tum is baat pe hairaan hotin
Tum is baat pe kitni hansti
Tum hotin toh aisa hota
Tum hotin toh waisa hota
Dheere dheere
Mere saare nanhe lamhe
So jayenge
Aur main
Phir haule se uth kar
Apni yaadon ki jholi kandhe par rakh kar
Phir chal doonga
Waqt ke agle shehr ki jaanib
Nanhe lamhon ko samjhane
Bhoole lamhon ko behlane
Yehi kahani phir dohrane
Tum hotin toh aisa hota
Tum hotin toh waisa hota