تم اگر سیکھنا چاہو … مجھے بتلا دینا — جواد شیخ
شاعر
تم اگر سیکھنا چاہو … مجھے بتلا دینا
تم اگر سیکھنا چاہو … مجھے بتلا دینا
عام سا فن تو کوئی ہے نہیں تحفہ دینا
ایک ہی شخص ہے جس کو یہ ہنر آتا ہے
روٹھ جانے پہ فضا اور بھی مہکا دینا
بھانپ لینا کہ بہت وقت نہیں اُس کے پاس
اور پھر اُس کو کسی بحث میں الجھا دینا
حُسن دنیا میں اِسی کام کو بھیجا گیا ہے
کہ جہاں آگ لگی ہو .. اُسے بھڑکا دینا
اُن بزرگوں کا یہی کام ہوا کرتا تھا
جہاں خوبی نظر آئی اُسے چمکا دینا
دل بتاتا ہے مجھے عقل کی باتیں کیا کیا
بندہ پوچھے کہ ترا ہے کوئی لینا دینا
اور کہنا کہ دِلوں میں نہیں کوئی سرحد
اپنے بچوں کو نہ قرآن نہ گیتا دینا
اور کچھ یاد نہ رہتا تھا لڑائی میں اُسے
ہاں مگر میرے گزشتہ کا حوالہ دینا
اُس کی فطرت میں نہ تھا ترک ِ تعلق لیکن
دوسرے شخص کو اِس نہج پہ پہنچا دینا
جانتا تھا کہ بہت خاک اڑائے گا مری
کوئی آسان نہیں تھا اُسے رستہ دینا
یہ وہ منصب ہیں جو اپنوں کو دیے جاتے ہیں
یاد کیا رکھنا اُسے اور بھُلا کیا دینا
کیا پتہ خود سے چھڑی جنگ کہاں لے جائے
جب بھی یاد آؤں مری جان کا صدقہ دینا
دل کا سامان کوئی خاک خریدے اُس سے
یاد ہی جس کو نہ رہتا ہو بقایا دینا
بات کرنے سے گریزاں نظر آتے ہیں مگر
ختم ہے حضرت ِ جواد پہ لقمہ دینا
Tum agar sīkhnā chāho … mujhe batlā denā
Tum agar sīkhnā chāho … mujhe batlā denā
Ām sā fan to koi hai nahīñ tohfa denā
Ek hi shakhs hai jis ko yeh hunar ātā hai
Rūṭh jaane pe fizā aur bhi mehkā denā
Bhānp lenā ke bahut waqt nahīñ us ke pās
Aur phir us ko kisi bahas mein uljhā denā
Husn dunyā mein isī kaam ko bhejā gayā hai
Ke jahāñ āg lagī ho .. use bhaṛkā denā
Un buzurgon ka yahī kaam huā kartā thā
Jahāñ khūbī nazar āī use chamkā denā
Dil batātā hai mujhe aql kī bāteñ kya kya
Banda pūchhe ke terā hai koi lenā denā
Aur kahnā ke diloñ mein nahīñ koi sarhad
Apne bacchoñ ko na Qur'ān na Gītā denā
Aur kuch yād na rahtā thā laṛāī mein use
Hāñ magar mere guzāshta ka hawāla denā
Us kī fitrat mein na thā tark-e-ta'alluq lekin
Dūsre shakhs ko is nahaj pe pahuñchā denā
Jāntā thā ke bahut khāk uṛāye ga mirī
Koi āsān nahīñ thā use rasta denā
Yeh woh mansab haiñ jo apnoñ ko diye jaate haiñ
Yād kya rakhnā use aur bhulā kya denā
Kya pata khud se chiṛī jang kahāñ le jaaye
Jab bhi yād āūñ mirī jān ka sadqa denā
Dil ka sāmān koi khāk kharīde us se
Yād hi jis ko na rahtā ho baqāyā denā
Bāt karne se gurezāñ nazar āte haiñ magar
Khatm hai Hazrat-e-Jawād pe luqma denā
شاعر کے بارے میں
جواد شیخ اردو کے معاصر اور نمایاں شاعروں میں سے ایک نامور شاعر ہیں، جن کا اصل نام شیخ جواد حسین ہے۔ وہ 26 مئی 1985 کو بھلوال، ضلع سرگودھا، پنجاب (پ...
مکمل تعارف پڑھیں