جنون دل نہ صرف اتنا کہ اک گل پیرہن تک ہے — مجروح سلطانپوری
شاعر
جنون دل نہ صرف اتنا کہ اک گل پیرہن تک ہے
جنون دل نہ صرف اتنا کہ اک گل پیرہن تک ہے
قد و گیسو سے اپنا سلسلہ دار و رسن تک ہے
مگر اے ہم قفس کہتی ہے شوریدہ سری اپنی
یہ رسم قید و زنداں ایک دیوار کہن تک ہے
کہاں بچ کر چلی اے فصل گل مجھ آبلہ پا سے
مرے قدموں کی گل کاری بیاباں سے چمن تک ہے
میں کیا کیا جرعۂ خوں پی گیا پیمانۂ دل میں
بلا نوشی مری کیا اک مئے ساغر شکن تک ہے
نہ آخر کہہ سکا اس سے مرا حال دل سوزاں
مہ تاباں کہ جو اس کا شریک انجمن تک ہے
نوا ہے جاوداں مجروحؔ جس میں روح ساعت ہو
کہا کس نے مرا نغمہ زمانے کے چلن تک ہے
Junoon-e-dil na sirf itna ke ik gul pairahan tak hai
Junoon-e-dil na sirf itna ke ik gul pairahan tak hai
Qad-o-gesu se apna silsila daar-o-rasan tak hai
Magar aye hum qafas kehti hai shureeda-sari apni
Yeh rasm-e-qaid-o-zindan ek deewar-e-kuhan tak hai
Kahan bach kar chali aye fasl-e-gul mujh aabala-pa se
Mere qadmon ki gul-kari bayaban se chaman tak hai
Main kya kya jurra-e-khoon pee gaya paimana-e-dil mein
Bala-noshi meri kya ik mai-e-saaghar-shikan tak hai
Na akhir keh saka us se mera haal-e-dil-e-sozan
Mah-e-taban ke jo us ka shareek-e-anjuman tak hai
Nawa hai jaavedaan Majrooh jis mein rooh-e-sa'at ho
Kaha kis ne mera naghma zamaney ke chalan tak hai
شاعر کے بارے میں
مجروح سلطان پوری بیسویں صدی کے اُن ممتاز اردو شعرا میں شمار ہوتے ہیں جنہوں نے کلاسیکی شعری روایت اور جدید حسیت کو نہایت سلیقے سے ہم آہنگ کیا۔ ان کا...
مکمل تعارف پڑھیں