ارتقا — میراجی
شاعر
ارتقا
قدم قدم پر جنازے رکھے ہوئے ہیں ان کو اٹھاؤ جاؤ
یہ دیکھتے کیا ہو کام میرا نہیں تمہارا یہ کام ہے آج اور کل کا
تم آج میں محو ہو کے شاید یہ سوچتے ہو
نہ بیتا کل اور نہ آنے والا تمہارا کل ہے
مگر یوں ہی سوچ میں جو ڈوبے تو کچھ نہ ہوگا
جنازے رکھے ہوئے ہیں ان کو اٹھاؤ جاؤ
چلو جنازوں کو اب اٹھاؤ
یہ بہتے آنسو بہیں گے کب تک اٹھو اور اب ان کو پونچھ ڈالو
یہ راستا کب ہے اک لحد ہے
لحد کے اندر تو اک جنازہ ہی بار پائے گا یہ بھی سوچو
تو کیا مشیت کے فیصلے سے ہٹے ہٹے رینگتے رہوگے
جنازے رکھے ہوئے ہیں ان کو اٹھاؤ جاؤ
لحد کھلی ہے
لحد ہے ایسے کہ جیسے بھوکے کا لالچی کا منہ کھلا ہوا ہو
مگر کوئی تازہ اور تازہ نہ ہو میسر تو باسی لقمہ بھی اس کے
اندر نہ جانے پائے
کھلا دہن یوں کھلا رہے جیسے اک خلا ہو
اٹھاؤ جلدی اٹھاؤ آنکھوں کے سامنے کچھ جنازے رکھے
ہوئے ہیں ان کو اٹھاؤ جاؤ
لحد میں ان کو ابد کی اک گہری نیند میں غرق کر کے آؤ
اگر یہ مردے لحد کے اندر گئے تو شاید
تمہاری مردہ حیات بھی آج جاگ اٹھے
Irtiqa
Qadam qadam par janaze rakhe hue hain in ko uthaao jaao
Ye dekhte kya ho kaam mera nahin tumhara ye kaam hai aaj aur kal ka
Tum aaj mein mahv ho ke shayad ye sochte ho
Na beeta kal aur na aane wala tumhara kal hai
Magar yunhi soch mein jo doobe to kuch na hoga
Janaze rakhe hue hain in ko uthaao jaao
Chalo janazon ko ab uthaao
Ye behte aansu bahenge kab tak utho aur ab in ko poonch dalo
Ye raasta kab hai ek lahad hai
Lahad ke andar to ek janaza hi baar paayega ye bhi socho
To kya mashiyat ke faisle se hate hate reengte rahoge
Janaze rakhe hue hain in ko uthaao jaao
Lahad khuli hai
Lahad hai aise ke jaise bhooke ka lalchi ka munh khula hua ho
Magar koi taza aur taza na ho muyassar to baasi luqma bhi us ke
Andar na jaane paaye
Khula dehan yun khula rahe jaise ek khala ho
Uthaao jaldi uthaao aankhon ke samne kuch janaze rakhe
Hue hain in ko uthaao jaao
Lahad mein in ko abad ki ek gehri neend mein gharq kar ke aao
Agar ye murde lahad ke andar gaye to shayad
Tumhari murda hayaat bhi aaj jaag uthe
شاعر کے بارے میں
میرا جی اردو ادب کے اُن چند منفرد اور اثر انگیز شعرا میں شمار ہوتے ہیں جنہوں نے بیسویں صدی میں اردو نظم کو ایک بالکل نیا شعور، نیا لہجہ اور نئی فکر...
مکمل تعارف پڑھیں