اونچا مکان — میراجی

Ooncha Makaan

Be shumar aankhon ko chehre mein lagaye hue ustada hai ta'meer ka ik naqsh ajeeb
Ay tamaddun ke naqeeb!
Teri soorat hai muheeb!
Zehn insani ka toofan khada hai goya
Dhal ke lehron mein kai geet sunai mujhe dete hain magar
In mein ik josh hai bedaad ka faryaad ka ik aks daraz
Aur alfaaz mein afsaney hain be khwabi ke
Kya koi rooh-e-hazin
Tere seene mein bhi be taab hai tehzeeb ke rakhshanda nageen
Ghat ke lehren tere geeton ki sunin mujh ko nazar aane laga
Aik talkhaba kisi baada-e-bad rang ka ik toote hue sagar mein
Nasha-e-may se nazar dhundli hui jaati hai
Raat ki teera fiza kyun mujhe ghabrati hai?
Raat ki teera fiza mein teri aankhon ki chamak mujh ko dara sakti nahin hai main toh
Is se bhi badh ke andhere mein raha karta tha
Aur us teergi-e-rooh mein darakhshan the sitarey dukh ke
Aur kabhi bhool mein har najm darakhshan se lapak uthte the sholay sukh ke
Jaise rozan se tere taan lapakti hui phailati hai baazu apne
Jazb kar leta hai phir us ko khala ka daaman
Yaad aane lage tanhai mein behte hue aansoo apne
Wohi aansoo wohi sholay sukh ke
Lekin ik khwab tha ik khwab ki maanind lapak shaalon ki thi
Meri takhayyul ke par taair-e-zakhmi ke paron ke maanind
Phadphadate hue bekaar laraz uthte hain
Mere a'za ka tanav mujhe jeene hi na deta tha tadap kar ek baar
Justaju mujh ko rehai ki hua karti thi
Magar afsos ke jab dard dawa banne laga mujh se woh pabandi hati
Apne a'saab ko aasooda banane ke liye
Bhool kar teergi-e-rooh ko main aa pahuncha
Is bulandi ke qadam mein ne liye
Jis pe tu sainkadon aankhon ko jhapakte hue ustada hai
Tere bare mein suna rakhi thin logon ne mujhe
Kuch hikayaat ajeeb
Main yeh sunta tha tere jism-e-giran bar mein bistar hai bichha
Aur ik nazneen leti hai wahan tanhai
Aik pheeki si thakan ban ke ghusi jaati hai
Zehn mein us ke magar woh betaab
Muntazir us ki hai parda larze
Pairahan ek dhalakta hua badal ban jaaye
Aur dar aaye ik un dekhi anokhi soorat
Kuch gharaz us ko nahin hai is se
Dil ko bhati hai nahin bhati hai
Aane wale ki ada
Is ka hai ek hi maqsood woh ustada kare
Bahr-e-a'saab ki ta'meer ka ik naqsh ajeeb
Jis ki soorat se karahat aaye
Aur woh ban jaaye tera mudd-e-muqabil pal mein
Zehn insani ka toofan khada ho jaaye
Aur woh nazneen be sakhta be laag irade ke baghair
Ek girti hui deewar nazar aane lage
Shab ke be rooh tamashai ko
Bhool kar apni thakan ka naghma
Mukhtasar larzish-e-chashm-e-dar se
Reeg ke qasr ke maanind subuk saar kare
Bahr-e-a'saab ki ta'meer ka ik naqsh ajeeb
Ek girti hui deewar ki maanind lachak kha jaaye
Yeh hikayaat mere zehn mein ik boo-e-kharamaan ban kar
Jab kabhi chahti thin raqs kiya karti thin
Aur ab dekhta hoon sainkadon aankhon mein teri
Ek hi chashm-e-darakhshan mujhe aati hai nazar
Kya isi chashm-e-darakhshan mein hai shola sukh ka?
Haath se apne ab is aankh ko main band kiya chahta hoon