دیکھنا قسمت کہ آپ اپنے پہ رشک آ جائے ہے — مرزا غالب
شاعر
دیکھنا قسمت کہ آپ اپنے پہ رشک آ جائے ہے
دیکھنا قسمت کہ آپ اپنے پہ رشک آ جائے ہے
میں اسے دیکھوں بھلا کب مجھ سے دیکھا جائے ہے
ہاتھ دھو دل سے یہی گرمی گر اندیشے میں ہے
آبگینہ تندی صہبا سے پگھلا جائے ہے
غیر کو یا رب وہ کیونکر منع گستاخی کرے
گر حیا بھی اس کو آتی ہے تو شرما جائے ہے
شوق کو یہ لت کہ ہر دم نالہ کھینچے جائیے
دل کی وہ حالت کہ دم لینے سے گھبرا جائے ہے
دور چشم بد تری بزم طرب سے واہ واہ
نغمہ ہو جاتا ہے واں گر نالہ میرا جائے ہے
گرچہ ہے طرز تغافل پردہ دار راز عشق
پر ہم ایسے کھوے جاتے ہیں کہ وہ پا جائے ہے
اس کی بزم آرائیاں سن کر دل رنجور یاں
مثل نقش مدعائے غیر بیٹھا جائے ہے
ہو کے عاشق وہ پری رخ اور نازک بن گیا
رنگ کھلتا جاے ہے جتنا کہ اڑتا جائے ہے
نقش کو اس کے مصور پر بھی کیا کیا ناز ہیں
کھینچتا ہے جس قدر اتنا ہی کھنچتا جائے ہے
سایہ میرا مجھ سے مثل دود بھاگے ہے اسدؔ
پاس مجھ آتش بجاں کے کس سے ٹھہرا جائے ہے
Dekhna qismat ke aap apne pe rashk aa ja'e hai
Dekhna qismat ke aap apne pe rashk aa ja'e hai
Main use dekhun bhala kab mujh se dekha ja'e hai
Haath dho dil se yehi garmi gar andeshe mein hai
Aabgina tundi-e-sahba se pighla ja'e hai
Ghair ko ya Rab woh kyunkar man'a gustakhi kare
Gar haya bhi us ko aati hai to sharma ja'e hai
Shauq ko ye lat ke har dam naala khinche ja'iye
Dil ki woh haalat ke dam lene se ghabra ja'e hai
Dur chashm-e-bad teri bazm-e-tarab se wah wah
Naghma ho jata hai wan gar naala mera ja'e hai
Garche hai tarz-e-taghaful parda-dar-e-raz-e-ishq
Par hum aise khoye jaate hain ke woh pa ja'e hai
Us ki bazm-aara'iyan sun kar dil ranjoor yan
Misal-e-naqsh-e-mudda'a-e-ghair baitha ja'e hai
Hu ke aashiq woh pari-rukh aur nazuk ban gaya
Rang khulta ja'e hai jitna ke udta ja'e hai
Naqsh ko us ke musawwir par bhi kya kya naz hain
Khinachta hai jis qadar itna hi khincha ja'e hai
Sayah mera mujh se misal-e-dood bhage hai Asad
Paas mujh aatish-bajaan ke kis se thahra ja'e hai
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں