دل سے تری نگاہ جگر تک اتر گئی — مرزا غالب
شاعر
دل سے تری نگاہ جگر تک اتر گئی
دل سے تری نگاہ جگر تک اتر گئی
دونوں کو اک ادا میں رضامند کر گئی
شق ہو گیا ہے سینہ خوشا لذت فراغ
تکلیف پردہ داری زخم جگر گئی
وہ بادۂ شبانہ کی سرمستیاں کہاں
اٹھیے بس اب کہ لذت خواب سحر گئی
اڑتی پھرے ہے خاک مری کوئے یار میں
بارے اب اے ہوا ہوس بال و پر گئی
دیکھو تو دل فریبی انداز نقش پا
موج خرام یار بھی کیا گل کتر گئی
ہر بوالہوس نے حسن پرستی شعار کی
اب آبروئے شیوۂ اہل نظر گئی
نظارہ نے بھی کام کیا واں نقاب کا
مستی سے ہر نگہ ترے رخ پر بکھر گئی
فردا و دی کا تفرقہ یک بار مٹ گیا
کل تم گئے کہ ہم پہ قیامت گزر گئی
مارا زمانہ نے اسداللہ خاں تمہیں
وہ ولولے کہاں وہ جوانی کدھر گئی
Dil se teri nigah jigar tak utar gayi
Dil se teri nigah jigar tak utar gayi
Donon ko ek ada mein raza-mand kar gayi
Shaqq ho gaya hai seena khusha lazzat-e-faragh
Takleef-e-parda-dari-e-zakhm-e-jigar gayi
Woh baada-e-shabana ki sarmastiyan kahan
Uthiye bas ab ke lazzat-e-khwab-e-sahar gayi
Udti phire hai khaak meri koo-e-yaar mein
Baare ab ae hawa hawas-e-baal-o-par gayi
Dekho to dil-farebi-e-andaaz-e-naqsh-e-pa
Mauj-e-kharam-e-yaar bhi kya gul katar gayi
Har ba-hawas ne husn-parasti shi'ar ki
Ab aabroo-e-shiwa-e-ahl-e-nazar gayi
Nazzara ne bhi kaam kiya wan naqab ka
Masti se har nigah tere rukh par bikhar gayi
Farda-o-di ka tafraqa yak baar mit gaya
Kal tum gaye ke hum pe qayamat guzar gayi
Mara zamane ne Asadullah Khan tumhein
Woh walwale kahan woh jawani kidhar gayi
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں