گر نہ اندوہ شب فرقت بیاں ہو جائے گا — مرزا غالب
شاعر
گر نہ اندوہ شب فرقت بیاں ہو جائے گا
گر نہ اندوہ شب فرقت بیاں ہو جائے گا
بے تکلف داغ مہ مہر دہاں ہو جائے گا
زہرہ گر ایسا ہی شام ہجر میں ہوتا ہے آب
پرتو مہتاب سیل خانماں ہو جائے گا
لے تو لوں سوتے میں اس کے پانو کا بوسہ مگر
ایسی باتوں سے وہ کافر بد گماں ہو جائے گا
دل کو ہم صرف وفا سمجھے تھے کیا معلوم تھا
یعنی یہ پہلے ہی نذر امتحاں ہو جائے گا
سب کے دل میں ہے جگہ تیری جو تو راضی ہوا
مجھ پہ گویا اک زمانہ مہرباں ہو جائے گا
گر نگاہ گرم فرماتی رہی تعلیم ضبط
شعلہ خس میں جیسے خوں رگ میں نہاں ہو جائے گا
باغ میں مجھ کو نہ لے جا ورنہ میرے حال پر
ہر گل تر ایک چشم خوں فشاں ہو جائے گا
واے گر میرا ترا انصاف محشر میں نہ ہو
اب تلک تو یہ توقع ہے کہ واں ہو جائے گا
فائدہ کیا سوچ آخر تو بھی دانا ہے اسدؔ
دوستی ناداں کی ہے جی کا زیاں ہو جائے گا
گر وہ مست ناز دیوے گا صلائے عرض حال
خار گل بہر دہان گل زباں ہوجائے گا
گر شہادت آرزو ہے نشے میں گستاخ ہو
بال شیشے کا رگ سنگ فساں ہوجائے گا
Gar na andooh-e-shab-e-furqat bayan ho ja'e ga
Gar na andooh-e-shab-e-furqat bayan ho ja'e ga
Be-takalluf dagh-e-mah mehr-e-dahan ho ja'e ga
Zuhra gar aisa hi sham-e-hijr mein hota hai aab
Partaw-e-mahtab sail-e-khanman ho ja'e ga
Le to loon sote mein us ke panv ka bosa magar
Aisi baton se woh kaafir bad-guman ho ja'e ga
Dil ko hum sirf-e-wafa samjhe the kya ma'loom tha
Ya'ni ye pehle hi nazr-e-imtehan ho ja'e ga
Sab ke dil mein hai jagah teri jo tu raazi hua
Mujh pe goya ek zamana mehrban ho ja'e ga
Gar nigah-e-garm farmati rahi ta'leem-e-zabt
Shola-e-khas mein jaise khoon rag mein nihan ho ja'e ga
Bagh mein mujh ko na le ja warnah mere haal par
Har gul-e-tar ek chashm-e-khoon-fishan ho ja'e ga
Waaye gar mera tera insaaf mahshar mein na ho
Ab talak to ye tawaqqa hai ke wan ho ja'e ga
Fa'eda kya soch akhir tu bhi dana hai Asad
Dosti naadan ki hai ji ka ziyan ho ja'e ga
Gar woh mast-e-naz dewe ga sila-e-arz-e-haal
Khar-e-gul ba-har-e-dahan-e-gul zaban ho ja'e ga
Gar shahadat aarzoo hai nashe mein gustakh ho
Baal-e-shishe ka rag-e-sang-e-fasan ho ja'e ga
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں