ہے بسکہ ہر اک ان کے اشارے میں نشاں اور — مرزا غالب
شاعر
ہے بسکہ ہر اک ان کے اشارے میں نشاں اور
ہے بسکہ ہر اک ان کے اشارے میں نشاں اور
کرتے ہیں محبت تو گزرتا ہے گماں اور
یارب وہ نہ سمجھے ہیں نہ سمجھیں گے مری بات
دے اور دل ان کو جو نہ دے مجھ کو زباں اور
ابرو سے ہے کیا اس نگہ ناز کو پیوند
ہے تیر مقرر مگر اس کی ہے کماں اور
تم شہر میں ہو تو ہمیں کیا غم جب اٹھیں گے
لے آئیں گے بازار سے جا کر دل و جاں اور
ہر چند سبک دست ہوئے بت شکنی میں
ہم ہیں تو ابھی راہ میں ہے سنگ گراں اور
ہے خون جگر جوش میں دل کھول کے روتا
ہوتے جو کئی دیدۂ خوں نابہ فشاں اور
مرتا ہوں اس آواز پہ ہر چند سر اڑ جائے
جلاد کو لیکن وہ کہے جائیں کہ ہاں اور
لوگوں کو ہے خورشید جہاں تاب کا دھوکا
ہر روز دکھاتا ہوں میں اک داغ نہاں اور
لیتا نہ اگر دل تمہیں دیتا کوئی دم چین
کرتا جو نہ مرتا کوئی دن آہ و فغاں اور
پاتے نہیں جب راہ تو چڑھ جاتے ہیں نالے
رکتی ہے مری طبع تو ہوتی ہے رواں اور
ہیں اور بھی دنیا میں سخن ور بہت اچھے
کہتے ہیں کہ غالبؔ کا ہے انداز بیاں اور
Hai bas-ke har ik un ke ishāre mein nishāñ aur
Hai bas-ke har ik un ke ishāre mein nishāñ aur
Karte hain muhabbat to guzartā hai gumāñ aur
Yā-rab vo na samjhe hain na samjheñ ge merī baat
De aur dil un ko jo na de mujh ko zabāñ aur
Abrū se hai kyā us nigeh-e nāz ko paivand
Hai tīr muqarrar magar us kī hai kamāñ aur
Tum shahr mein ho to hameñ kyā ġham jab uṭheñ ge
Le ā_eñ ge bāzār se jā kar dil-o-jāñ aur
Har chand subuk-dast hue but-shikanī mein
Ham hain to abhī rāh mein hai sang-e girāñ aur
Hai KHūn-e jigar josh mein dil khol ke rotā
Hote jo ka_ī dīda-e KHūñ-nāba-fishāñ aur
Martā huun us āvāz pe har chand sar uṛ jaa_e
Jallād ko lekin vo kahe jaa_eñ ke haan aur
Logoñ ko hai KHurshīd-e jahāñ-tāb kā dhokā
Har roz dikhātā huun main ik dāġh-e nihāñ aur
Letā na agar dil tumheñ detā ko_ī dam chain
Kartā jo na martā ko_ī din āh-o-faġhāñ aur
Pāte nahīñ jab rāh to chaṛh jaate hain nāle
Ruktī hai merī tab_a to hotī hai ravāñ aur
Hain aur bhī duniyā mein suKHan-var bahut achchhe
Kahte hain ke Ghalibؔ kā hai andāz-e bayāñ aur
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں