جس بزم میں تو ناز سے گفتار میں آوے — مرزا غالب
شاعر
جس بزم میں تو ناز سے گفتار میں آوے
جس بزم میں تو ناز سے گفتار میں آوے
جاں کالبد صورت دیوار میں آوے
سایہ کی طرح ساتھ پھریں سرو و صنوبر
تو اس قد دل کش سے جو گلزار میں آوے
تب ناز گراں مایگی اشک بجا ہے
جب لخت جگر دیدۂ خوں بار میں آوے
دے مجھ کو شکایت کی اجازت کہ ستم گر
کچھ تجھ کو مزا بھی مرے آزار میں آوے
اس چشم فسوں گر کا اگر پائے اشارہ
طوطی کی طرح آئینہ گفتار میں آوے
کانٹوں کی زباں سوکھ گئی پیاس سے یا رب
اک آبلہ پا وادی پر خار میں آوے
مر جاؤں نہ کیوں رشک سے جب وہ تن نازک
آغوش خم حلقۂ زنار میں آوے
غارت گر ناموس نہ ہو گر ہوس زر
کیوں شاہد گل باغ سے بازار میں آوے
تب چاک گریباں کا مزا ہے دل نالاں
جب اک نفس الجھا ہوا ہر تار میں آوے
آتشکدہ ہے سینہ مرا راز نہاں سے
اے واے اگر معرض اظہار میں آوے
گنجینۂ معنی کا طلسم اس کو سمجھیے
جو لفظ کہ غالبؔ مرے اشعار میں آوے
Jis bazm mein tu naaz se guftaar mein aave
Jis bazm mein tu naaz se guftaar mein aave
Jaan kalbad-e-soorat-e-diwaar mein aave
Saya ki tarah saath phiren sarv-o-sanobar
Tu us qadd-e-dilkash se jo gulzar mein aave
Tab naaz-e-giran-maya-gi-e-ashk baja hai
Jab lakht-e-jigar dida-e-khoon-baar mein aave
De mujh ko shikayat ki ijazat ke sitamgar
Kuch tujh ko maza bhi mere aazaar mein aave
Is chashm-e-fasoon-gar ka agar paaye ishara
Tooti ki tarah aaina-e-guftaar mein aave
Kaanton ki zubaan sookh gai pyaas se ya Rab
Ik aabla pa wadi-e-pur-khaar mein aave
Mar jaun na kyun rashk se jab wo tan-e-nazuk
Aaghosh-e-kham-e-halqa-e-zunnar mein aave
Gharat-gar-e-namoos na ho gar havas-e-zar
Kyun shaaahid-e-gul baagh se bazaar mein aave
Tab chak-e-girebaan ka maza hai dil-e-nalaan
Jab ik nafas uljha hua har taar mein aave
Aatish-kada hai seena mera raaz-e-nihan se
Ae waaye agar ma'raz-e-izhar mein aave
Ganjina-e-ma'ni ka tilism us ko samjhiye
Jo lafz ke Ghalibؔ mere ash'ar mein aave
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں