شبنم بہ گل لالہ نہ خالی ز ادا ہے — مرزا غالب
شاعر
شبنم بہ گل لالہ نہ خالی ز ادا ہے
شبنم بہ گل لالہ نہ خالی ز ادا ہے
داغ دل بے درد نظر گاہ حیا ہے
دل خوں شدۂ کشمکش حسرت دیدار
آئینہ بہ دست بت بد مست حنا ہے
شعلے سے نہ ہوتی ہوس شعلہ نے جو کی
جی کس قدر افسردگی دل پہ جلا ہے
تمثال میں تیری ہے وہ شوخی کہ بہ صد ذوق
آئینہ بہ انداز گل آغوش کشا ہے
قمری کف خاکستر و بلبل قفس رنگ
اے نالہ نشان جگر سوختہ کیا ہے
خو نے تری افسردہ کیا وحشت دل کو
معشوقی و بے حوصلگی طرفہ بلا ہے
مجبوری و دعواۓ گرفتاری الفت
دست تۂ سنگ آمدہ پیمان وفا ہے
معلوم ہوا حال شہیدان گزشتہ
تیغ ستم آئینۂ تصویر نما ہے
اے پرتو خورشید جہاں تاب ادھر بھی
سائے کی طرح ہم پہ عجب وقت پڑا ہے
ناکردہ گناہوں کی بھی حسرت کی ملے داد
یا رب اگر ان کردہ گناہوں کی سزا ہے
بیگانگی خلق سے بیدل نہ ہو غالبؔ
کوئی نہیں تیرا تو مری جان خدا ہے
Shabnam ba-gul-e-lala na khali ze ada hai
Shabnam ba-gul-e-lala na khali ze ada hai
Dagh-e-dil-e-be-dard nazar-gah-e-haya hai
Dil khoon-shuda-e-kashmakash-e-hasrat-e-deedar
Aaina ba-dast-e-but-e-bad-mast-e-hinna hai
Shole se na hoti havas shola ne jo ki
Jee kis qadar afsurdagi-e-dil pe jala hai
Timsal mein teri hai wo shokhi ke ba-sad zauq
Aaina ba-andaz-e-gul aaghosh-kusha hai
Qamri kaf-e-khakistar-o-bulbul qafas-e-rang
Aye nala nishan-e-jigar-e-sokhta kya hai
Khu ne teri afsurda kiya wahshat-e-dil ko
Mashooqi-o-be-hauslagi turfa bala hai
Majboori-o-dawa-e-giriftari-e-ulfat
Dast teh sang amada paeeman-e-wafa hai
Maloom hua haal-e-shaheedan-e-guzashta
Tegh-e-sitam aaina-e-tasveer-numa hai
Aye partaw-e-khursheed-e-jahan-tab idhar bhi
Saaye ki tarah ham pe ajab waqt pada hai
Nakarda gunahon ki bhi hasrat ki mile dad
Ya Rab agar in karda gunahon ki saza hai
Begangi-e-khalq se be-dil na ho Ghalib
Koi nahin tera to meri jaan Khuda hai
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں