شکوے کے نام سے بے مہر خفا ہوتا ہے — مرزا غالب
شاعر
شکوے کے نام سے بے مہر خفا ہوتا ہے
شکوے کے نام سے بے مہر خفا ہوتا ہے
یہ بھی مت کہہ کہ جو کہیے تو گلہ ہوتا ہے
پر ہوں میں شکوے سے یوں راگ سے جیسے باجا
اک ذرا چھیڑئیے پھر دیکھیے کیا ہوتا ہے
گو سمجھتا نہیں پر حسن تلافی دیکھو
شکوۂ جور سے سرگرم جفا ہوتا ہے
عشق کی راہ میں ہے چرخ مکوکب کی وہ چال
سست رو جیسے کوئی آبلہ پا ہوتا ہے
کیوں نہ ٹھہریں ہدف ناوک بیداد کہ ہم
آپ اٹھا لاتے ہیں گر تیر خطا ہوتا ہے
خوب تھا پہلے سے ہوتے جو ہم اپنے بد خواہ
کہ بھلا چاہتے ہیں اور برا ہوتا ہے
نالہ جاتا تھا پرے عرش سے میرا اور اب
لب تک آتا ہے جو ایسا ہی رسا ہوتا ہے
خامہ میرا کہ وہ ہے باربد بزم سخن
شاہ کی مدح میں یوں نغمہ سرا ہوتا ہے
اے شہنشاہ کواکب سپہ و مہر علم
تیرے اکرام کا حق کس سے ادا ہوتا ہے
سات اقلیم کا حاصل جو فراہم کیجے
تو وہ لشکر کا ترے نعل بہا ہوتا ہے
ہر مہینے میں جو یہ بدر سے ہوتا ہے ہلال
آستاں پر ترے مہ ناصیہ سا ہوتا ہے
میں جو گستاخ ہوں آئین غزل خوانی میں
یہ بھی تیرا ہی کرم ذوق فزا ہوتا ہے
رکھیو غالبؔ مجھے اس تلخ نوائی میں معاف
آج کچھ درد مرے دل میں سوا ہوتا ہے
Shikwe ke naam se be-mehr khafa hota hai
Shikwe ke naam se be-mehr khafa hota hai
Ye bhi mat kah ke jo kahiye to gila hota hai
Pur hoon main shikwe se yun rag se jaise baja
Ek zara chhediye phir dekhiye kya hota hai
Go samajhta nahin par husn-e-talafi dekho
Shikwa-e-jaur se sargarm-e-jafa hota hai
Ishq ki rah mein hai charakh-e-mukawkab ki wo chal
Sust-rau jaise koi aabla-pa hota hai
Kyun na thahrein hadaf-e-nawak-e-bedad ke ham
Aap utha late hain gar teer khata hota hai
Khoob tha pahle se hote jo ham apne bad-khwah
Ke bhala chahte hain aur bura hota hai
Nala jata tha pare arsh se mera aur ab
Lab tak aata hai jo aisa hi rasa hota hai
Khama mera ke wo hai Barbad-e-bazm-e-sukhan
Shah ki madh mein yun naghma-sara hota hai
Aye Shahanshah-e-kawakab-sipa-o-mehr-e-alam
Tere ikram ka haq kis se ada hota hai
Saat aqleem ka hasil jo faraham kijiye
To wo lashkar ka tere na'al-baha hota hai
Har mahine mein jo ye badr se hota hai hilal
Astan par tere mah-e-nasiya-sa hota hai
Main jo gustaakh hoon aaeen-e-ghazal-khwani mein
Ye bhi tera hi karam zauq-faza hota hai
Rakhiyo Ghalib mujhe is talkh-nawai mein maaf
Aaj kuchh dard mere dil mein siwa hota hai
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں