والد کی وفات پر — ندا فاضلی
شاعر
والد کی وفات پر
تمہاری قبر پر
میں فاتحہ پڑھنے نہیں آیا
مجھے معلوم تھا
تم مر نہیں سکتے
تمہاری موت کی سچی خبر جس نے اڑائی تھی
وہ جھوٹا تھا
وہ تم کب تھے
کوئی سوکھا ہوا پتہ ہوا سے مل کے ٹوٹا تھا
مری آنکھیں
تمہارے منظروں میں قید ہیں اب تک
میں جو بھی دیکھتا ہوں
سوچتا ہوں
وہ وہی ہے
جو تمہاری نیک نامی اور بد نامی کی دنیا تھی
کہیں کچھ بھی نہیں بدلا
تمہارے ہاتھ میری انگلیوں میں سانس لیتے ہیں
میں لکھنے کے لیے
جب بھی قلم کاغذ اٹھاتا ہوں
تمہیں بیٹھا ہوا میں اپنی ہی کرسی میں پاتا ہوں
بدن میں میرے جتنا بھی لہو ہے
وہ تمہاری
لغزشوں ناکامیوں کے ساتھ بہتا ہے
مری آواز میں چھپ کر
تمہارا ذہن رہتا ہے
مری بیماریوں میں تم
مری لاچاریوں میں تم
تمہاری قبر پر جس نے تمہارا نام لکھا ہے
وہ جھوٹا ہے
تمہاری قبر میں میں دفن ہوں
تم مجھ میں زندہ ہو
کبھی فرصت ملے تو فاتحہ پڑھنے چلے آنا
Walid ki wafaat par
Tumhari qabr par
Main fatiha padhne nahin aaya
Mujhe maloom tha
Tum mar nahin sakte
Tumhari maut ki sachchi khabar jis ne udai thi
Woh jhoota tha
Woh tum kab the
Koi sookha hua patta hawa se mil ke toota tha
Meri aankhen
Tumhare manzaron mein qaid hain ab tak
Main jo bhi dekhta hoon
Sochta hoon
Woh wahi hai
Jo tumhari nek naami aur bad naami ki duniya thi
Kahin kuchh bhi nahin badla
Tumhare haath meri ungliyon mein saans lete hain
Main likhne ke liye
Jab bhi qalam kagaz uthata hoon
Tumhein baitha hua main apni hi kursi mein pata hoon
Badan mein mere jitna bhi lahu hai
Woh tumhari
Laghzishon nakamiyon ke saath behta hai
Meri aawaz mein chhup kar
Tumhara zehen rehta hai
Meri bimariyon mein tum
Meri laachariyon mein tum
Tumhari qabr par jis ne tumhara naam likha hai
Woh jhoota hai
Tumhari qabr mein main dafan hoon
Tum mujh mein zinda ho
Kabhi fursat mile to fatiha padhne chale aana
شاعر کے بارے میں
ندا فاضلی جن کا اصل نام مقتدی حسن فاضلی تھا جدید اردو شاعری کے ان نمایاں اور منفرد لہجے کے شاعر تھے جنہوں نے روزمرہ زندگی، انسان کے دکھ اور سماجی ا...
مکمل تعارف پڑھیں