بارش ہوئی تو پھولوں کے تن چاک ہو گئے — پروین شاکر
شاعر
بارش ہوئی تو پھولوں کے تن چاک ہو گئے
بارش ہوئی تو پھولوں کے تن چاک ہو گئے
موسم کے ہاتھ بھیگ کے سفاک ہو گئے
بادل کو کیا خبر ہے کہ بارش کی چاہ میں
کیسے بلند و بالا شجر خاک ہو گئے
جگنو کو دن کے وقت پرکھنے کی ضد کریں
بچے ہمارے عہد کے چالاک ہو گئے
لہرا رہی ہے برف کی چادر ہٹا کے گھاس
سورج کی شہ پہ تنکے بھی بے باک ہو گئے
بستی میں جتنے آب گزیدہ تھے سب کے سب
دریا کے رخ بدلتے ہی تیراک ہو گئے
سورج دماغ لوگ بھی ابلاغ فکر میں
زلف شب فراق کے پیچاک ہو گئے
جب بھی غریب شہر سے کچھ گفتگو ہوئی
لہجے ہوائے شام کے نمناک ہو گئے
Barish hui to phoolon ke tan chaak ho gaye
Bārish huī toh phūloñ ke tan chāk ho gae
Mausam ke haath bheegh ke saffāk ho gae
Bādal ko kyā khabar hai ke bārish kī chāh maiñ
Kaise buland-o-bālā shajar ḳhāk ho gae
Jugnū ko din ke vaqt parkhne kī zid kareñ
Bachche hamāre ahd ke chālāk ho gae
Lehrā rahī hai barf kī chādar haṭā ke ghās
Sūraj kī sheh pe tinke bhī be-bāk ho gae
Bastī maiñ jitne āb-gazeeda the sab ke sab
Daryā ke rukh badalte hī tairāk ho gae
Sūraj-dimāgh log bhī iblāġh-e-fikr maiñ
Zulf-e-shab-e-firāq ke pechāk ho gae
Jab bhī ghareeb-e-shehar se kuchh guftugū huī
Lahje havā-e-shām ke namnāk ho gae
شاعر کے بارے میں
پروین شاکر اردو کی جدید ترین اور مقبول ترین شاعرات میں شمار ہوتی ہیں، جنہوں نے نسائی حسّیت، جذبات کی لطافت اور اظہار کی شگفتگی کو نئی جہت عطا کی۔ 2...
مکمل تعارف پڑھیں