چھوڑ دو گے تم ہمیں دشمن کے بہکانے سے کیا — پیر نصیرالدین
شاعر
چھوڑ دو گے تم ہمیں دشمن کے بہکانے سے کیا
چھوڑ دو گے تم ہمیں دشمن کے بہکانے سے کیا
یوں تمہیں مل جائے گا، اپنوں کو تڑپانے سے کیا
لاکھ سمجھاؤ مگر ہوتا ہے سمجھانے سے کیا
ہوش کی باتیں کرو ،الجھو گے دیوانے سے کیا
آپ کی باتیں سنیں واعظ !مگر مانیں نہیں
چوٹ کھاتا، آپ جیسے جانے پہچانے سے کیا
رقص کے عالم میں ہو جیسے سارا میکدہ
آنکھ ساقی نے ملا رکھی ہے پیمانے سے کیا
خیر! ہم نے مان لی جو بات بھی تم نے کہی
تم کہو، تم کو ملا جھوٹی قسم کھانے سے کیا
سامنے جب آ گیے کیسی حیا، کیسا حجاب
فائدہ اب منہ چھپانے اور شرمانے سے کیا
دیکھ زاہد !بادۂ سر جوش کے چھینٹے نہ ہوں
تیرے دامن پر ہیں یہ تسبیح کے ”دانے سے“ کیا
ترکِ الفت اور پھر الفت بھی اس بے مثل کی
میں بہک جاؤں گا واعظ! تیرے بہکانے سے کیا
آگ میں اپنی جلا کر خاک کر ڈالا اسے
شمع! آخر دشمنی ایسی بھی پروانے سے کیا
چارہ سازو! کیوں دوا کرتے ہو، مر جانے بھی دو
بزم ہو جائے گی سونی میرے اٹھ جانے سے کیا
میکشی لازم نہیں ہے بزمِ ساقی میں نصیرؔ
کام جب آنکھوں سے چل جائے تو پیمانے سے کیا
Chhod doge tum humein dushman ke behkane se kya
Chhod doge tum humein dushman ke behkane se kya
Yun tumhein mil jaye ga, apnon ko tadpane se kya
Lakh samjhao magar hota hai samjhane se kya
Hosh ki baaten karo, uljhoge deewane se kya
Aap ki baaten sunen waaiz! magar manen nahin
Chot khata, aap jaise jaane pehchane se kya
Raqs ke aalam mein ho jaise sara maikadah
Aankh saqi ne mila rakhi hai paimane se kya
Khair! hum ne maan li jo baat bhi tum ne kahi
Tum kaho, tum ko mila jhooti qasam khane se kya
Samne jab aa gaye kaisi haya, kaisa hijaab
Faidah ab munh chhupane aur sharmane se kya
Dekh zahid! baada-e-sar josh ke chheente na hon
Tere daaman par hain ye tasbeeh ke “daane se” kya
Tark-e-ulfat aur phir ulfat bhi us be-misl ki
Main behak jaunga waaiz! tere behkane se kya
Aag mein apni jala kar khaak kar dala use
Shama! akhir dushmani aisi bhi parwane se kya
Charah-sazo! kyun dawa karte ho, mar jaane bhi do
Bazm ho jaye gi sooni mere uth jaane se kya
Maikeshi lazim nahin hai bazm-e-saqi mein Naseer!
Kaam jab aankhon se chal jaye to paimane se kya
شاعر کے بارے میں
پیر سید نصیر الدین نصیر گیلانی اردو ادب اور صوفیانہ شاعری کے ممتاز شاعر، عالم اور صوفی بزرگ تھے۔ ان کی ولادت 14 نومبر 1949ء کو گولڑہ شریف، اسلام آب...
مکمل تعارف پڑھیں