راشد ڈوگر
شاعر
اِکّ ای جُسّا، اِکّو میں واں
اِکّ ای جُسّا، اِکّو میں واں
اِکّو جیّاں باہنواں دو نیں
فیر وی سجّی کھبّی دِسّے
جندڑی ڈب کھڑبّی دِسّے
کھبّی دا کَم چُوہڑ صفائیاں
سجّی دی سرداری یارو
کھبّی اوتے زخم نشانی
سجّی سالم ساری یارو
پر میں جد وی شیشا ویکھاں
سجّا کھبّا اُلٹا ویکھاں
دل وچ سوچاں میریا ربّا
تیری حکمت توں ای جانڑیں
تیرے گھر وچ خورے ہووے
کھبّی چنگی، سجّی مندی
راشد ڈوگر