محتاج ہم سفر کی مسافت نہ تھی مری — آواز: ندیم بخاری | شاعر: اعتبارساجد

محتاج ہم سفر کی مسافت نہ تھی مری

محتاج ہم سفر کی مسافت نہ تھی مری
سب ساتھ تھے کسی سے رفاقت نہ تھی مری
حق کس سے مانگتا کہ مکینوں کے ساتھ ساتھ
دیوار و بام و در کو ضرورت نہ تھی مری
سچ بول کے بھی دیکھ لیا ان کے سامنے
لیکن انہیں پسند صداقت نہ تھی مری
میں جن پہ مر مٹا تھا وہ کاغذ کے پھول تھے
رسمی مکالمے تھے محبت نہ تھی مری
جو دوسروں کے دکھ تھے وہی میرے دکھ بھی تھے
کچھ ایسی مختلف بھی حکایت نہ تھی مری
بس کچھ اصول تھے جو بہ ہر حال تھے عزیز
جانم کسی سے ورنہ عداوت نہ تھی مری

شاعر: اعتبارساجد

آواز: ندیم بخاری