برق کلیسا — آواز: سید جینٹلمین | شاعر: اکبر اللہ آبادی

Barq-e-Kaleesa

Raat us miss se kaleesa mein hua main do chaar
Haaye woh husn woh shokhi woh nazaakat woh ubhaar
Zulf pechaan mein woh saj dhaj ke balaaein bhi mureed
Qadd-e-rana mein woh cham kham ke qayamat bhi shaheed
Aankhein woh fitna-e-dauraan ke gunahgaar karein
Gaal woh subh-e-darakhshaan ke malak pyar karein
Garm taqreer jise sunne ko shoala lapke
Dilkash aawaz ke sun kar jise bulbul jhapke
Dilkashi chaal mein aisi ke sitare ruk jaaein
Sarkashi naaz mein aisi ke governor jhuk jaaein
Aatish-e-husn se taqwe ko jalane wali
Bijliyan lutf-e-tabassum se girane wali
Pahlu-e-husn bayan shokhi-e-taqreer mein gharq
Turkey o Misr o Palestine ke halaat mein barq
Pas gaya loot gaya dil mein saqt hi na rahi
Sar the tamkeen ke jis gat mein woh gat hi na rahi
Zabt ke azm ka is waqt asar kuch na hua
Ya Hafeez ka kiya wird magar kuch na hua
Arz ki main ne ke aye gulshan-e-fitrat ki bahar
Daulat o izzat o imaan tere qadmon pe nisaar
Tu agar ahd-e-wafa baandh ke meri ho jaye
Saari duniya se mere qalb ko seeri ho jaye
Shauq ke josh mein main ne jo zubaan yun kholi
Naaz o andaaz se tewar ko chadha kar boli
Ghair mumkin hai mujhe uns musalmanon se
Boo-e-khoon aati hai is qaum ke insaanon se
Lan taraani ki yeh lete hain namazi ban kar
Hamle sarhad pe kya karte hain ghazi ban kar
Koi banta hai jo Mehdi to bigad jaate hain
Aag mein koodte hain top se lad jaate hain
Gul khilaaye koi maidaan mein to itra jaaein
Paayein samaan-e-iqaamat to qayamat dhaayein
Mutma'in ho koi kyun kar ke yeh hain nek nihaad
Hai hanooz un ki ragon mein asar hukm-e-jihaad
Dushman-e-sabr ki nazron mein lagaawat aayi
Kamyabi ki dil-e-zaar ne aahat paayi
Arz ki main ne ke aye lazzat-e-jaan rahat-e-rooh
Ab zamane pe nahin hai asar Aadam o Nooh
Shajar-e-Toor ka is baagh mein pauda hi nahin
Gesu-e-Hoor ka is daur mein sauda hi nahin
Ab kahan zehan mein baaqi hain Buraq o Rafraf
Tik tiki bandh gayi hai qaum ki engine ki taraf
Hum mein baaqi nahin ab Khalid jaanbaaz ka rang
Dil pe ghaalib hai faqat Hafiz-e-Shiraz ka rang
Yaan na woh naara-e-takbeer na woh josh-e-sipaah
Sab ke sab aap hi padhte rahein Subhan Allah
Jauhar-e-tegh-e-mujaahid tere abroo pe nisaar
Noor-e-imaan ka tere aaina-e-ru pe nisaar
Uth gayi safha-e-khaatir se woh bahs bad o nek
Do-dille ho rahe hain kehte hain Allah ko ek
Mauj-e-Kausar ki kahan ab hai mere baagh ke gird
Main to tehzeeb mein hoon peer-e-mughan ka shaagird
Mujh pe kuch wajah-e-itaab aap ko aye jaan nahin
Naam hi naam hai warna main musalman nahin
Jab kaha saaf yeh main ne ke jo ho sahib-e-fehm
To nikalo dil-e-nazuk se yeh shubha yeh wahm
Mere Islam ko ek qissa-e-maazi samjho
Hans ke boli ke tu phir mujh ko bhi raazi samjho