رات سنسان ہے — آواز: ثنا سوئٹ | شاعر: مصطفی زیدی
مقرر / سپیکر
رات سنسان ہے
میز چپ چاپ گھڑی بند کتابیں خاموش
اپنے کمرے کی اداسی پہ ترس آتا ہے
میرا کمرہ جو مرے دل کی ہر اک دھڑکن کو
سالہا سال سے چپ چاپ گنے جاتا ہے
جہد ہستی کی کڑی دھوپ میں تھک جانے پر
جس کی آغوش نے بخشا ہے مجھے ماں کا خلوص
جس کی خاموش عنایت کی سہانی یادیں
لوریاں بن کے مرے دل میں سما جاتی ہیں
میری تنہائی کے احساس کو زائل کرنے
جس کی دیواریں مرے پاس چلی آتی ہیں
سامنے طاق پہ رکھی ہوئی دو تصویریں
اکثر اوقات مجھے پیار سے یوں تکتی ہیں
جیسے میں دور کسی دیس کا شہزادہ ہوں
میرا کمرہ مرے ماضی کا حقیقی مونس
آج ہر فکر ہر احساس سے بیگانہ ہے
اپنے ہم راز کواڑوں کے احاطے کے عوض
آج میں جیسے مزاروں پہ چلا آیا ہوں
گرد آلودہ کلنڈر پہ اجنتا کے نقوش
میرے چہرے کی لکیروں کی طرف دیکھتے ہیں
جیسے اک لاش کی پھیلی ہوئی بے بس آنکھیں
اپنے مجبور عزیزوں کو تکا کرتی ہیں
یہ کتابیں بھی مرا ساتھ نہیں دیتیں آج
کیٹسؔ کی نظم ارسطوؔ کے حکیمانہ قول
سنگ مرمر کی عمارت کی طرح ساکت ہیں
تو ہی کچھ بات کر اے میرے دھڑکتے ہوئے دل
تو ہی اک میرا سہارا ہے مرا مونس ہے
تو ہی اس سرد اندھیرے میں چراغاں کر دے
لکشمی دیوی تو مری بات نہیں سن سکتیں
مجھ کو معلوم ہے کیا بیت چکی ہے تجھ پر
میرے چہرے کے سلگتے ہوئے زخموں کو بھی دیکھ
میری آنکھوں پہ مری فکر پہ پابندی ہے
میں اسے چاہوں بھی تو یاد نہیں کر سکتا
تو اسے کھو کے مچل سکتا ہے رو سکتا ہے
اور میں لٹ کے بھی فریاد نہیں کر سکتا
اسی آئینے نے دیکھے ہیں ہمارے جھگڑے
یہی زینہ ہے جہاں میں نے اسے چوما تھا
ان قمیضوں میں ان الجھے ہوئے رومالوں میں
اس کے بالوں کی مہک آج بھی آسودہ ہے
جو کبھی میری تھی انکار پہ بھی میری تھی
اب فقط بزم تصور میں نظر آتی ہے
رات بھر جاگ کے لکھی ہوئی تحریروں سے
اب بھی ان آنکھوں کی تصویر ابھر آتی ہے
چاندنی کھل کے نکھر آئی ہے دروازے پر
اوس سے بھیگتے جاتے ہیں پرانے گملے
کس قدر نرم ہے کلیوں کا سہانا سایہ
جیسے وہ ہونٹ جنہیں پا کے بھی میں پا نہ سکا
اے تڑپتے ہوئے دل اور سنبھل اور سنبھل
یہ تری چاپ سے جاگ اٹھیں گی تو کیا ہوگا
صبح کیا جانے کہاں ہوتی ہے کب ہوتی ہے
جانے انسان نے کس وقت یہ نعمت پائی
میری قسمت میں بس اک سلسلۂ شام و سحر
میرے کمرے کے مقدر میں فقط تنہائی
شاعر: مصطفی زیدی
آواز: ثنا سوئٹ
Raat Sunsaan Hai
Maiz chup chaap ghadi band kitabein khamosh
Apne kamre ki udasi pe tars aata hai
Mera kamra jo mere dil ki har ek dhadkan ko
Saal ha saal se chup chaap gine jaata hai
Jahd-e-hasti ki kadi dhoop mein thak jaane par
Jis ki aaghosh ne bakhsha hai mujhe maan ka khuloos
Jis ki khamosh inayat ki suhani yadein
Loriyan ban ke mere dil mein sama jaati hain
Meri tanhai ke ehsaas ko zaail karne
Jis ki deewaren mere paas chali aati hain
Samne taaq pe rakhi hui do tasveerein
Aksar auqaat mujhe pyar se yoon takti hain
Jaise main door kisi des ka shehzada hoon
Mera kamra mere maazi ka haqiqi moonis
Aaj har fikr har ehsaas se begana hai
Apne humraaz kuwaron ke ehate ke iwaz
Aaj main jaise mazaron pe chala aaya hoon
Gard-aaloodah calendar pe Ajanta ke naqoosh
Mere chehre ki lakeeron ki taraf dekhte hain
Jaise ek laash ki phaili hui be-bas aankhein
Apne majboor azeezon ko taka karti hain
Yeh kitabein bhi mera saath nahin detin aaj
Keats, ki nazm Aristotle ke hakimaana qaul
Sang-e-marmar ki imarat ki tarah saakit hain
Tu hi kuch baat kar ae mere dhadakte hue dil
Tu hi ek mera sahara hai mera moonis hai
Tu hi is sard andhere mein charagaan kar de
Lakshmi Devi to meri baat nahin sun saktin
Mujh ko maloom hai kya beet chuki hai tujh par
Mere chehre ke sulagte hue zakhmon ko bhi dekh
Meri aankhon pe meri fikr pe pabandi hai
Main use chahoon bhi to yaad nahin kar sakta
Tu use kho ke machal sakta hai ro sakta hai
Aur main lut ke bhi fariyaad nahin kar sakta
Isi aaine ne dekhe hain hamare jhagde
Yehi zeena hai jahan main ne use chooma tha
In qameezon mein in uljhe hue roomalon mein
Us ke balon ki mehak aaj bhi aasooda hai
Jo kabhi meri thi inkaar pe bhi meri thi
Ab faqat bazm-e-tasawwur mein nazar aati hai
Raat bhar jaag ke likhi hui tehreeron se
Ab bhi un aankhon ki tasveer ubhar aati hai
Chandni khul ke nikhar aayi hai darwaze par
Oas se bheegte jaate hain purane gamle
Kis qadar narm hai kaliyon ka suhana saya
Jaise woh honth jinhein paa ke bhi main paa na saka
Aye tadapte hue dil aur sambhal aur sambhal
Yeh teri chaap se jaag uthengi to kya hoga
Subah kya jaane kahan hoti hai kab hoti hai
Jaane insaan ne kis waqt yeh ne'mat paayi
Meri qismat mein bas ek silsila shaam o sehar
Mere kamre ke muqaddar mein faqat tanhai
مقرر کے بارے میں
تُو آسمانِ بخت کو چھوتی ہوئی سحر....! میں دشتِ حادثات میں غُربت کی شام
مکمل سوانح دیکھیں