بنام وطن — آواز: مرزا جواد | شاعر: مصطفی زیدی

Banam Watan

Kaun hai jo aaj talabgar-e-niyaz o takreem
Wohi har ahd ka jabroot wohi kal ke laeem
Wohi ayyar gharane wohi, farzana hakeem
Wohi tum, laiq-e-sad tazkirah o sad taqveem
Tum wohi dushman-e-ihya-e-sada ho ke nahin
Pas-e-zindan yeh tumhi jalwa numa ho ke nahin
Tum ne har ahd mein naslon se ghaddari ki
Tum ne bazaaron mein aqalon ki khareedari ki
Eent se eent bajadi gayi khud-dari ki
Khauf ko rakh liya khidmat pe kamaan-dari ki
Aaj tum mujh se meri jins-e-giran mangte ho
Halaf-e-zehn o wafadari-e-jaan mangte ho
Jao yeh cheez kisi madh-sara se maango
Taife walon se dholak ki sada se maango
Apne darbano se badtar fuqra se maango
Apne darbar ke goonge shu'ara se maango
Mujh se poochho aye to khanjar se adoo boley ga
Gardanein kaat bhi do ge to lahoo boley ga
Tum ne har daur mein danish pe kayi waar kiye
Jabr ke munh mein dehakte hue alfaz diye
Apni aasayesh-e-yak umr-e-gurezan ke liye
Sab ko taraj kiya tum ne magar tum na jiye
Ilm ne khoon-e-rag-e-jaan diya aur na mara
Ilm ne zehr ka paimana piya aur na mara
Ilm Suqrat ki awaz hai Eesa ka lahoo
Ilm gehwara o sayyara o anjaam o numoo
Ilm Abbas Alamdar ke zakhmi bazoo
Ilm bete ki nayi qabr pe maa ke aansoo
Wadi-e-abr mein qatron ko taras jaye ga
Jo in ashkon pe hanse ga woh jhulas jaye ga
Tum hi batlao ke main kis ka wafadar banun
Ismat-e-harf ka ya daar ka ghamkhwar banun
Mash'alon ka ya andheron ka talabgar banun
Kis ke khirman ke liye shola-e-israr banun
Kaun se dil se tumhein saat-e-farda de doon
Qatilon ko nafs-e-Hazrat-e-Eesa de doon
Subh-e-Kashi ka tarannum meri awaz mein hai
Sindh ki shaam ka aahang mere saaz mein hai
Kohsaron ki salabat mere ejaz mein hai
Baal-e-Jibriel ki aahat meri parwaz mein hai
Yeh jabeen kaun si chaukhat pe jhuke gi bolo
Kis qafas se meri parwaz ruke gi bolo
Kis qafas se gham-e-dil qaid hua hai ab tak
Kis ke farmaan ki paband hai raftaar-e-falak
Kaun si raat ne roki hai sitaron ki chamak
Kis ki deewar se simti hai chambeli ki mehak
Dasht-e-eesaar mein kab aabla pa rukta hai
Kaun se band se sailaab-e-wafa rukta hai
Ba wafadari-e-reh-war o ba takreem-e-ilm
Ba gohar-bari-e-alfaz sana deed-e-ajam
Ba sada-e-jaras qafileh-e-ahl-e-qalam
Mujh ko har qatrah-e-khoon-e-shuhada teri qasam
Manzilein aake pukarein gi safar se pehle
Jhuk pade ga dar-e-zindan mere sar se pehle
Aaj tum Ram ke moonis na Hanuman ke dost
Tum na kafir ke sana khwan na Musalman ke dost
Na tum ilhad ke haami ho na imaan ke dost
Tum na ashlook ke haami ho na Quran ke dost
Tum to sikkon ki lapakti hui jhankaroon mein
Apni maaon ko utha laate ho bazaaron mein
Zehn par khauf ki bunyad uthane walo
Zulm ki fasl ko kheton mein ugaane walo
Geet ke shehr ko bandook se dhane walo
Fikr ki raah mein barood bichhane walo
Kab tak is shakh-e-gulistan ki ragen tootein gi
Konplein aaj na phootein gi to kal phootein gi
Kis pe labbaik kaho ge ke na hogi baham
Johari bomb ki sada aur sada-e-Gautam
Rizq bartar hai ke shola badaman atom
Ghar ke choolhe se utarti hui roti ki qasam
Zakhm achha hai ke nanhi si kali achhi hai
Khauf achha hai ke bachchon ki hansi achhi hai
Ho gaye raakh jo khaliyan unhein dekha hai
Ek ek khosha-e-gandum tumhein kya kehta hai
Ek ek ghaas ki patti ka fasana kya hai
Aag achhi hai ke dastoor-e-numoo achha hai
Mehfilon mein jo yunhi jaam lahoo ke chhalke
Tum ko kya keh ke pukarein ge muarrikh kal ke?
Boot ki nok se qabron ko girane walo
Tamgha-e-makr se seenon ko sajaane walo
Kashtiyan dekh ke toofan uthane walo
Barchhiyon walo, kamaan walo, nishane walo
Dil ki dargah mein pindaar mita kar aao
Apni awaz ki palkon ko jhuka kar aao
Kya qayamat hai ke zarron ki zaban jalti hai
Misr mein jalwa-e-Yusuf ki dukan jalti hai
Ismat-e-daman-e-Maryam ki fughan jalti hai
Bheem ka gurz aur Arjun ki kamaan jalti hai
Chooriyan roti hain piyaron ki judai ki tarah
Zindagi nangi hai bewa ki kalai ki tarah
Sahiban-e-shab-e-dejoor sahar mangte hain
Pet ke zamzama khwan dard-e-jigar mangte hain
Koor dil khair se shaheen ki nazar mangte hain
Oxygen ke tale umr-e-Khizr mangte hain
Apne kashkol mein aiwan-e-gohar dhoondte hain
Apne shano par kisi aur ka sar dhoondte hain
Tu hi bol aye dar-e-zindan, shab-e-gham tu hi bata
Kya yehi hai mere be-naam shaheedon ka pata
Kya yehi hai mere miyar-e-junoon ka rasta
Dil dehalte hain jo girta hai sadak par patta
Ek na ek shorish-e-zanjeer hai jhankar ke saath
Ek na ek khauf laga baitha hai deewar ke saath
Itni veeran to kabhi subh-e-bayaban bhi na thi
Itni purkhar kabhi rah-e-mughilan bhi na thi
Koyi saa'at kabhi is darja gurezan bhi na thi
Itni pur haul kabhi sham-e-ghareeban bhi na thi
Aye watan kaise yeh dhabbe dar o deewar pe hain
Kis shaqi ke yeh tamache tere rukhsar pe hain
Aye watan yeh tera utra hua chehra kyun hai
Ghurfa o baam-e-shabistan mein andhera kyun hai
Dard palkon se lahoo ban ke chhalkta kyun hai
Ek ek saans pe tanqeed ka pahra kyun hai
Kis ne maa baap ki si aankh utha li tujh se
Chheen li kis ne tere kaan ki baali tujh se
Rood-e-Ravi tere mamnoon-e-karam kaise hain
San'atein kaisi hain tehzeeb ke kham kaise hain
Aye Harappa tere majboor qadam kaise hain
Bol aye Taxila tere sanam kaise hain
Zehn mein kaun se miyar hain barnai ke
Manchester ke libade hain ke Harnai ke
Askariyat badi shai hai ke mohabbat ke usool
Bolahab ka gharana hai ke dargah-e-Rasool
Tabl o lashkar mutabarrak hain ke tatheer-e-batool
Masjidein ilm ka ghar hain ke mission ke school
Aaj jo beeti hai kya kal bhi yehi beetegi
Band jeetega ya shayar ki ghazal jeetegi