چُپ ہیں کیوں آپ، مِرے غم سے جو دِلگیر نہیں — آواز: مرزا جواد | شاعر: حسرت موہانی

چُپ ہیں کیوں آپ، مِرے غم سے جو دِلگیر نہیں

چُپ ہیں کیوں آپ، مِرے غم سے جو دِلگیر نہیں
اب نہ کہیے گا، تِری آہ میں تاثیر نہیں
کیا وہ یُوں ہم سے ہیں راضی، کہ نہیں ہیں راضی!
کیا یہ وہ خواب ہے، جس خواب کی تعبیر نہیں
وہ بھی چُپ، ہم بھی ہیں خاموش بہ ہنگامِ وصال
کثرتِ شوق بہ اندازۂ تقرِیر نہیں
شوق کو یادِ رُخِ یار نہ ہوگی کافی !
کہ یہ قرآن ہے، قرآن کی تفسِیر نہیں
کون کہتا ہے سِیہ خانۂ غم کو بے نُور
کیا مِرے دِل میں تِرے حُسن کی تصوِیر نہیں
دِل کو بیچارگیِ جوشِ جنُوں کا ہے خیال
ورنہ، کُچھ رنج گراں باریِ زنجیر نہیں
ہم جفا سے بھی ہیں راضی، کہ جفا ہے تیری
غیر کی طرح، ہَمَیں شِکوۂ تقدِیر نہیں
اُن سے مِلنا بھی خُدا ساز ہُوا ہے اپنا
کامیابی مِری، شرمندۂ تعبیر نہیں
ہر ادا، قاتلِ سفّاک ہے، اے شوخ تِری
کیا ہُوا دستِ نزاکت میں جو شمشِیر نہیں
کون قائِل ہو تِرے صِدقِ طَلَب کا، حسرؔت !
محفِلِ یار میں کُچھ بھی تِری توقیر نہیں

شاعر: حسرت موہانی

آواز: مرزا جواد