عورت — آواز: ایمان | شاعر: کیفی اعظمی
مقرر / سپیکر
عورت
اٹھ مری جان مرے ساتھ ہی چلنا ہے تجھے
قلب ماحول میں لرزاں شرر جنگ ہیں آج
حوصلے وقت کے اور زیست کے یک رنگ ہیں آج
آبگینوں میں تپاں ولولۂ سنگ ہیں آج
حسن اور عشق ہم آواز و ہم آہنگ ہیں آج
جس میں جلتا ہوں اسی آگ میں جلنا ہے تجھے
اٹھ مری جان مرے ساتھ ہی چلنا ہے تجھے
تیرے قدموں میں ہے فردوس تمدن کی بہار
تیری نظروں پہ ہے تہذیب و ترقی کا مدار
تیری آغوش ہے گہوارۂ نفس و کردار
تا بہ کے گرد ترے وہم و تعین کا حصار
کوند کر مجلس خلوت سے نکلنا ہے تجھے
اٹھ مری جان مرے ساتھ ہی چلنا ہے تجھے
تو کہ بے جان کھلونوں سے بہل جاتی ہے
تپتی سانسوں کی حرارت سے پگھل جاتی ہے
پاؤں جس راہ میں رکھتی ہے پھسل جاتی ہے
بن کے سیماب ہر اک ظرف میں ڈھل جاتی ہے
زیست کے آہنی سانچے میں بھی ڈھلنا ہے تجھے
اٹھ مری جان مرے ساتھ ہی چلنا ہے تجھے
زندگی جہد میں ہے صبر کے قابو میں نہیں
نبض ہستی کا لہو کانپتے آنسو میں نہیں
اڑنے کھلنے میں ہے نکہت خم گیسو میں نہیں
جنت اک اور ہے جو مرد کے پہلو میں نہیں
اس کی آزاد روش پر بھی مچلنا ہے تجھے
اٹھ مری جان مرے ساتھ ہی چلنا ہے تجھے
گوشہ گوشہ میں سلگتی ہے چتا تیرے لیے
فرض کا بھیس بدلتی ہے قضا تیرے لیے
قہر ہے تیری ہر اک نرم ادا تیرے لیے
زہر ہی زہر ہے دنیا کی ہوا تیرے لیے
رت بدل ڈال اگر پھولنا پھلنا ہے تجھے
اٹھ مری جان مرے ساتھ ہی چلنا ہے تجھے
قدر اب تک تری تاریخ نے جانی ہی نہیں
تجھ میں شعلے بھی ہیں بس اشک فشانی ہی نہیں
تو حقیقت بھی ہے دلچسپ کہانی ہی نہیں
تیری ہستی بھی ہے اک چیز جوانی ہی نہیں
اپنی تاریخ کا عنوان بدلنا ہے تجھے
اٹھ مری جان مرے ساتھ ہی چلنا ہے تجھے
توڑ کر رسم کا بت بند قدامت سے نکل
ضعف عشرت سے نکل وہم نزاکت سے نکل
نفس کے کھینچے ہوئے حلقۂ عظمت سے نکل
قید بن جائے محبت تو محبت سے نکل
راہ کا خار ہی کیا گل بھی کچلنا ہے تجھے
اٹھ مری جان مرے ساتھ ہی چلنا ہے تجھے
توڑ یہ عزم شکن دغدغۂ پند بھی توڑ
تیری خاطر ہے جو زنجیر وہ سوگند بھی توڑ
طوق یہ بھی ہے زمرد کا گلوبند بھی توڑ
توڑ پیمانۂ مردان خرد مند بھی توڑ
بن کے طوفان چھلکنا ہے ابلنا ہے تجھے
اٹھ مری جان مرے ساتھ ہی چلنا ہے تجھے
تو فلاطون و ارسطو ہے تو زہرا پرویں
تیرے قبضہ میں ہے گردوں تری ٹھوکر میں زمیں
ہاں اٹھا جلد اٹھا پائے مقدر سے جبیں
میں بھی رکنے کا نہیں وقت بھی رکنے کا نہیں
لڑکھڑائے گی کہاں تک کہ سنبھلنا ہے تجھے
اٹھ مری جان مرے ساتھ ہی چلنا ہے تجھے
شاعر: کیفی اعظمی
آواز: ایمان
Aurat
Uth meri jaan mere saath hi chalna hai tujhe
Qalb-e-mahaul mein larzaan sharar-e-jang hain aaj
Hausle waqt ke aur zeest ke yak rang hain aaj
Aabgeenon mein tapaan walwala-e-sang hain aaj
Husn aur ishq ham aawaaz-o-ham aahang hain aaj
Jis mein jalta hoon usi aag mein jalna hai tujhe
Uth meri jaan mere saath hi chalna hai tujhe
Tere qadmon mein hai firdaus-e-tamaddun ki bahaar
Teri nazron pe hai tehzeeb-o-taraqqi ka madaar
Teri aaghosh hai gehwara-e-nafs-o-kirdar
Ta ba keh ke gird tere wahm-o-ta'ayyun ka hisaar
Kaund kar majlis-e-khalwat se nikalna hai tujhe
Uth meri jaan mere saath hi chalna hai tujhe
Tu ke be-jaan khilaunon se behal jaati hai
Tapti saanson ki haraarat se pighal jaati hai
Paaon jis raah mein rakhti hai phisal jaati hai
Ban ke seemaab har ek zarf mein dhal jaati hai
Zeest ke aahani saanche mein bhi dhalna hai tujhe
Uth meri jaan mere saath hi chalna hai tujhe
Zindagi jehd mein hai sabr ke qabu mein nahin
Nabz-e-hasti ka lahoo kaanpte aansoo mein nahin
Udne khulne mein hai nikhat kham-e-geesoo mein nahin
Jannat ek aur hai jo mard ke pehlu mein nahin
Is ki aazad rawish par bhi machalna hai tujhe
Uth meri jaan mere saath hi chalna hai tujhe
Gosha gosha mein sulagti hai chita tere liye
Farz ka bhes badalti hai qaza tere liye
Qahr hai teri har ek narm adaa tere liye
Zehr hi zehr hai duniya ki hawa tere liye
Rut badal daal agar phoolna phalna hai tujhe
Uth meri jaan mere saath hi chalna hai tujhe
Qadr ab tak teri tareekh ne jaani hi nahin
Tujh mein shole bhi hain bas ashk fishaani hi nahin
Tu haqeeqat bhi hai dilchasp kahani hi nahin
Teri hasti bhi hai ek cheez jawani hi nahin
Apni tareekh ka unwan badalna hai tujhe
Uth meri jaan mere saath hi chalna hai tujhe
Tod kar rasm ka but band-e-qadamat se nikal
Zaf-e-ishrat se nikal wahm-e-nazaakat se nikal
Nafs ke kheenchte hue halqa-e-azmat se nikal
Qaid ban jaaye mohabbat to mohabbat se nikal
Raah ka khaar hi kya gul bhi kuchalna hai tujhe
Uth meri jaan mere saath hi chalna hai tujhe
Tod ye azm-shikan daghdagha-e-pand bhi tod
Teri khatir hai jo zanjeer wo saugand bhi tod
Tauq ye bhi hai zamurrad ka guluband bhi tod
Tod paimana-e-mardan-e-khiradmand bhi tod
Ban ke toofan chhalkana hai ubalna hai tujhe
Uth meri jaan mere saath hi chalna hai tujhe
Tu Faltun-o-Arastoo hai tu Zehra Parveen
Tere qabza mein hai gardoon teri thokar mein zameen
Haan utha jald utha paaye muqaddar se jabeen
Main bhi rukne ka nahin waqt bhi rukne ka nahin
Ladkhadaegi kahan tak ke sambhalna hai tujhe
Uth meri jaan mere saath hi chalna hai tujhe
مقرر کے بارے میں
خود پرستی میں رہوں تو مٹی سے بھی کھیلتی ہوں اناپرستی میں آ جاؤں تو چاند کو بھی نظرانداز کر دوں
مکمل سوانح دیکھیں