ایک لڑکا — آواز: ایمان | شاعر: اختر الایمان
مقرر / سپیکر
ایک لڑکا
دیار شرق کی آبادیوں کے اونچے ٹیلوں پر
کبھی آموں کے باغوں میں کبھی کھیتوں کی مینڈوں پر
کبھی جھیلوں کے پانی میں کبھی بستی کی گلیوں میں
کبھی کچھ نیم عریاں کم سنوں کی رنگ رلیوں میں
سحر دم جھٹپٹے کے وقت راتوں کے اندھیرے میں
کبھی میلوں میں ناٹک ٹولیوں میں ان کے ڈیرے میں
تعاقب میں کبھی گم تتلیوں کے سونی راہوں میں
کبھی ننھے پرندوں کی نہفتہ خواب گاہوں میں
برہنہ پاؤں جلتی ریت یخ بستہ ہواؤں میں
گریزاں بستیوں سے مدرسوں سے خانقاہوں میں
کبھی ہم سن حسینوں میں بہت خوش کام و دل رفتہ
کبھی پیچاں بگولہ ساں کبھی جیوں چشم خوں بستہ
ہوا میں تیرتا خوابوں میں بادل کی طرح اڑتا
پرندوں کی طرح شاخوں میں چھپ کر جھولتا مڑتا
مجھے اک لڑکا آوارہ منش آزاد سیلانی
مجھے اک لڑکا جیسے تند چشموں کا رواں پانی
نظر آتا ہے یوں لگتا ہے جیسے یہ بلائے جاں
مرا ہم زاد ہے ہر گام پر ہر موڑ پر جولاں
اسے ہم راہ پاتا ہوں یہ سائے کی طرح میرا
تعاقب کر رہا ہے جیسے میں مفرور ملزم ہوں
یہ مجھ سے پوچھتا ہے اخترالایمان تم ہی ہو
خدائے عز و جل کی نعمتوں کا معترف ہوں میں
مجھے اقرار ہے اس نے زمیں کو ایسے پھیلایا
کہ جیسے بستر کم خواب ہو دیبا و مخمل ہو
مجھے اقرار ہے یہ خیمۂ افلاک کا سایہ
اسی کی بخششیں ہیں اس نے سورج چاند تاروں کو
فضاؤں میں سنوارا اک حد فاصل مقرر کی
چٹانیں چیر کر دریا نکالے خاک اسفل سے
مری تخلیق کی مجھ کو جہاں کی پاسبانی دی
سمندر موتیوں مونگوں سے کانیں لعل و گوہر سے
ہوائیں مست کن خوشبوؤں سے معمور کر دی ہیں
وہ حاکم قادر مطلق ہے یکتا اور دانا ہے
اندھیرے کو اجالے سے جدا کرتا ہے خود کو میں
اگر پہچانتا ہوں اس کی رحمت اور سخاوت ہے
اسی نے خسروی دی ہے لئیموں کو مجھے نکبت
اسی نے یاوہ گویوں کو مرا خازن بنایا ہے
تونگر ہرزہ کاروں کو کیا دریوزہ گر مجھ کو
مگر جب جب کسی کے سامنے دامن پسارا ہے
یہ لڑکا پوچھتا ہے اخترالایمان تم ہی ہو
معیشت دوسروں کے ہاتھ میں ہے میرے قبضہ میں
جز اک ذہن رسا کچھ بھی نہیں پھر بھی مگر مجھ کو
خروش عمر کے اتمام تک اک بار اٹھانا ہے
عناصر منتشر ہو جانے نبضیں ڈوب جانے تک
نوائے صبح ہو یا نالۂ شب کچھ بھی گانا ہے
ظفر مندوں کے آگے رزق کی تحصیل کی خاطر
کبھی اپنا ہی نغمہ ان کا کہہ کر مسکرانا ہے
وہ خامہ سوزی شب بیداریوں کا جو نتیجہ ہو
اسے اک کھوٹے سکے کی طرح سب کو دکھانا ہے
کبھی جب سوچتا ہوں اپنے بارے میں تو کہتا ہوں
کہ تو اک آبلہ ہے جس کو آخر پھوٹ جانا ہے
غرض گرداں ہوں باد صبح گاہی کی طرح لیکن
سحر کی آرزو میں شب کا دامن تھامتا ہوں جب
یہ لڑکا پوچھتا ہے اخترالایمان تم ہی ہو
یہ لڑکا پوچھتا ہے جب تو میں جھلا کے کہتا ہوں
وہ آشفتہ مزاج اندوہ پرور اضطراب آسا
جسے تم پوچھتے رہتے ہو کب کا مر چکا ظالم
اسے خود اپنے ہاتھوں سے کفن دے کر فریبوں کا
اسی کی آرزوؤں کی لحد میں پھینک آیا ہوں
میں اس لڑکے سے کہتا ہوں وہ شعلہ مر چکا جس نے
کبھی چاہا تھا اک خاشاک عالم پھونک ڈالے گا
یہ لڑکا مسکراتا ہے یہ آہستہ سے کہتا ہے
یہ کذب و افترا ہے جھوٹ ہے دیکھو میں زندہ ہوں
شاعر: اختر الایمان
آواز: ایمان
Ek Ladka
Dayaar-e-sharq ki aabaadiyon ke oonche teelon par
Kabhi aamon ke baaghon mein kabhi kheton ki mendon par
Kabhi jheelon ke paani mein kabhi basti ki galiyon mein
Kabhi kuch neem uryaan kam sinnon ki rang reliyon mein
Sahar dam jhatpate ke waqt raaton ke andhere mein
Kabhi meelon mein naatak toliyon mein un ke dere mein
Ta'aqub mein kabhi gum tittliyon ke sooni raahon mein
Kabhi nanhe parindon ki nihufta khwaab gaahon mein
Barhana paao'n jalti rait yakh basta hawaon mein
Gurezaan bastiyon se madarson se khanqahon mein
Kabhi hum sin haseenon mein bohat khush kaam-o-dil rafta
Kabhi pechaan bagoola saa'n kabhi jeeoon chashm-e-khoon basta
Hawa mein tairta khwaabon mein baadal ki tarah udta
Parindon ki tarah shaakhon mein chhup kar jhoolta mudta
Mujhe ek ladka aawara minish aazaad sailani
Mujhe ek ladka jaise tund chashmon ka rawaan paani
Nazar aata hai yoon lagta hai jaise yeh bala-e-jaan
Mera hum-zaad hai har gaam par har mod par jolaan
Use hum-raah paata hoon yeh saaye ki tarah mera
Ta'aqub kar raha hai jaise main mafroor mulzim hoon
Yeh mujh se poochhta hai Akhtrul Iman tum hi ho
Khuda-e-izz-o-jal ki ne'maton ka mu'tarif hoon main
Mujhe iqraar hai us ne zameen ko aise phailaya
Ke jaise bistar-e-kamkhwaab ho deeba o makhmal ho
Mujhe iqraar hai yeh khaima-e-aflaak ka saaya
Isi ki bakhshishain hain us ne suraj chand taaron ko
Fizaaon mein sanwaara ek hadd-e-faasil muqarrar ki
Chataanein cheer kar darya nikaale khaak-e-asfal se
Meri takhleeque ki mujh ko jahan ki paasbaani di
Samandar motiyon mungon se kaanain la'l-o-gauhar se
Hawaain mast-kun khushboo'on se ma'moor kar di hain
Woh haakim-e-qaadir-e-mutlaq hai yakta aur daana hai
Andhere ko ujaale se juda karta hai khud ko main
Agar pehchanta hoon us ki rehmat aur sakhaawat hai
Isi ne khusravi di hai laeemon ko mujhe nikbat
Isi ne yaawah-goyon ko mera khaazin banaya hai
Tawanagar harza-kaaron ko kya darya-gar mujh ko
Magar jab jab kisi ke saamne daaman pasaara hai
Yeh ladka poochhta hai Akhtrul Iman tum hi ho
Ma'eeshat doosron ke haath mein hai mere qabze mein
Juz ek zehan-e-rasa kuch bhi nahin phir bhi magar mujh ko
Khurosh-e-umr ke itmaam tak ek baar uthana hai
Anasir muntashir ho jaane nabzain doob jaane tak
Nawa-e-subh ho ya naala-e-shab kuch bhi gaana hai
Zafar-mand-on ke aage rizq ki tehseel ki khaatir
Kabhi apna hi naghma un ka keh kar muskuraana hai
Woh khaama-sozi shab-bedariyon ka jo nateeja ho
Use ek khoote sikke ki tarah sab ko dikhana hai
Kabhi jab sochta hoon apne baare mein to kehta hoon
Ke tu ek aabla hai jis ko aakhir phoot jaana hai
Gharz gardaan hoon baad-e-subhgaahi ki tarah lekin
Sahar ki aarzoo mein shab ka daaman thaamta hoon jab
Yeh ladka poochhta hai Akhtrul Iman tum hi ho
Yeh ladka poochhta hai jab to main jhallah ke kehta hoon
Woh aashufta-mizaaj andoh-parwar iztiraab-aasa
Jise tum poochhte rehte ho kab ka mar chuka zaalim
Use khud apne haathon se kafan de kar faraibon ka
Isi ki aarzoo'on ki lahad mein phenk aaya hoon
Main us ladke se kehta hoon woh sho'la mar chuka jis ne
Kabhi chaaha tha ek khashaak-e-aalam phoonk daale ga
Yeh ladka muskuraata hai yeh aahista se kehta hai
Yeh kizb-o-iftira hai jhoot hai dekho main zinda hoon
مقرر کے بارے میں
خود پرستی میں رہوں تو مٹی سے بھی کھیلتی ہوں اناپرستی میں آ جاؤں تو چاند کو بھی نظرانداز کر دوں
مکمل سوانح دیکھیں