فلسفۂ غم — آواز: ایمان | شاعر: علامہ اقبال

Falsafa-e-Gham

Go sarapa kaif-e-ishrat hai sharab-e-zindagi
Ashk bhi rakhta hai daaman mein sahaaab-e-zindagi
Mauj-e-gham par raqs karta hai habab-e-zindagi
Hai 'Alif-Laam-Meem' ka surah bhi juzv-e-kitab-e-zindagi
Ek bhi patti agar kam ho toh woh gul hi nahin
Jo khizaan naadeeda ho bulbul, woh bulbul hi nahin
Aarzoo ke khoon se rangeen hai dil ki daastaan
Naghma-e-insaniyat kaamil nahin ghair az faghan
Deeda-e-beena mein daagh-e-gham chiragh-e-seena hai
Rooh ko saamaan-e-zeenat aah ka aaiina hai
Haadsaat-e-gham se hai insaan ki fitrat ko kamaal
Ghaaza hai aaiina-e-dil ke liye gard-e-malaal
Gham jawaani ko jaga deta hai lutf-e-khwab se
Saaz yeh bedaar hota hai isi mizraab se
Taa'ir-e-dil ke liye gham shaahpar-e-parwaaz hai
Raaz hai insaan ka dil gham inkishaaf-e-raaz hai
Gham nahin gham, rooh ka ek naghma-e-khaamosh hai
Jo surood-e-barbat-e-hasti se hum aaghosh hai
Shaam jis ki aashna-e-nala-e-'Ya Rab' nahin
Jalwa-paira jis ki shab mein ashk ke kaukab nahin
Jis ka jaam-e-dil shikast-e-gham se hai na-aashna
Jo sada mast-e-sharab-e-aish-o-ishrat hi raha
Haath jis gul-cheen ka hai mehfooz nok-e-khaar se
Ishq jis ka be-khabar hai hijr ke aazaar se
Kulfat-e-gham garcha us ke roz-o-shab se door hai
Zindagi ka raaz us ki aankh se mastoor hai
Ay ke nazm-e-dehr ka idraak hai haasil tujhe
Kyun na aasaan ho gham-o-andooh ki manzil tujhe
Hai abad ke nuskha-e-deereena ki tamheed-e-ishq
Aql-e-insaani hai faani, zinda-e-jaaveed ishq
Ishq ke khursheed se shaam-e-ajal sharminda hai
Ishq soz-e-zindagi hai, ta abad paayenda hai
Rukhsat-e-mehboob ka maqsad fana hota agar
Josh-e-ulfat bhi dil-e-aashiq se kar jaata safar
Ishq kuch mehboob ke marne se mar jaata nahin
Rooh mein gham ban ke rehta hai, magar jaata nahin
Hai baqaa-e-ishq se paida baqaa-e-mehboob ki
Zindagaani hai adam na-aashna mehboob ki
Aati hai nadi jabeen-e-koh se gaati hui
Aasmaan ke taa'iron ko naghma sikhlaati hui
Aaiina roshan hai us ka surat-e-rukhsaar-e-hoor
Gir ke waadi ki chaTaanon par yeh ho jaata hai choor
Nehr jo thi, us ke gauhar pyaare pyaare ban gaye
Ya'ni is aftaad se paani ke taare ban gaye
Joo-e-seemaab rawaan phaT kar pareshaan ho gayi
Muztarib boondon ki ek dunya numaya ho gayi
Hijr, in qatron ko lekin wasl ki ta'leem hai
Do qadam par phir wohi joo misl-e-taar-e-seemaab hai
Ek asliyat mein hai nehr-e-rawan-e-zindagi
Gir ke rif'at se hujoom-e-nau'-e-insaan ban gayi
Pasti-e-aalam mein milne ko juda hote hain hum
Aarzi furqat ko daaim jaan kar rote hain hum
Marnay wale marte hain lekin fana hote nahin
Yih haqeeqat mein kabhi hum se juda hote nahin
Aql jis dam dehr ki aafaat mein mahsoor ho
Ya jawaani ki andheri raat mein mastoor ho
Daaman-e-dil ban gaya ho razm-gah-e-khair-o-shar
Raah ki zulmat se ho mushkil soo-e-manzil safar
Khizr-e-himmat ho gaya ho aarzoo se gosha-geer
Fikr jab aajiz ho aur khaamosh awaaz-e-zameer
Waadi-e-hasti mein koi humsafar tak bhi na ho
Jaada dikhlane ko jugnu ka sharar tak bhi na ho
Marnay walon ki jabeen roshan hai is zulmaat mein
Jis tarah taare chamakte hain andheri raat mein