ابلیس کی مجلس شوریٰ — آواز: ایمان | شاعر: علامہ اقبال

Iblees Ki Majlis-e-Shoora

IBLEES
Yeh anasir ka puraana khel, yeh dunya-e-doon
Saakinaan-e-arsh-e-aazam ki tamannaon ka khoon
Iss ki barbaadi pe aaj amada hai woh kaarsaaz
Jis ne iska naam rakha tha jahan-e-kaaf-o-noon
Main ne dikhlaya firangi ko malookiyat ka khwab
Main ne toRaa masjid-o-dair-o-kaleesa ka fasoon
Main ne nadaaron ko sikhlaaya sabaq taqdeer ka
Main ne mun'im ko diya sarmaya-daari ka junoon
Kaun kar sakta hai iski aatish-e-sozaan ko sard
Jis ke hangaamon mein ho Iblees ka soz-e-daroon
Jis ki shaakhein hon humaari aabiyaari se buland
Kaun kar sakta hai us nakhhl-e-kuhan ko sarnigoon
PEHLA MUSHEER
Iss mein kya shak hai ke muhkam hai yeh Ibleesi nizaam
Pokhta-tar is se hue khoo-e-ghulaami mein awaam
Hai azal se in ghareebon ke muqaddar mein sajood
In ki fitrat ka taqaaza hai namaaz-e-be-qiyaam
Aarzoo awwal toh paida ho nahin sakti kahin
Ho kahin paida toh mar jaati hai ya rehti hai khaam
Yeh humaari sa'i-e-paiham ki karaamat hai ke aaj
Soofi-o-Mulla malookiyat ke bande hain tamaam
Tab'a-e-Mashriq ke liye mauzoon yehi afeem thi
Warna qawwali se kuch kam-tar nahin ilm-e-kalaam
Hai tawaaf-o-hajj ka hangaama agar baaqi toh kya
Kund ho kar reh gayi momin ki tegh-e-be-niyaam
Kis ki na-umeedi pe hujjat hai yeh farmaan-e-jadeed
Hai jihad is daur mein mard-e-musalmaan par haraam
DOOSRA MUSHEER
Khair hai sultani-e-jamhoor ka ghogha ke shar
Tu jahaan ke taaza fitnon se nahin hai ba-khabar
PEHLA MUSHEER
Hoon magar meri jahaan-beeni bataati hai mujhe
Jo malookiyat ka ik parda ho kya us se khatar
Hum ne khud shahi ko pehnaya hai jamhoori libaas
Jab zara aadam hua hai khud-shinaas-o-khud-nigar
Kaarobaar-e-shehryari ki haqeeqat aur hai
Yeh wujood-e-meer-o-sultaan par nahin hai munhasir
Majlis-e-millat ho ya Parwez ka darbaar ho
Hai woh sultan ghair ki kheti pe ho jis ki nazar
Tu ne kya dekha nahin Maghrib ka jamhoori nizaam
Chehra roshan andaroon Changez se tareek-tar
TEESRA MUSHEER
Rooh-e-sultani rahe baaqi toh phir kya izteraab
Hai magar kya is Yahoodi ki sharaarat ka jawaab
Woh Kaleem-e-be-tajalli, woh Maseeh-e-be-saleeb
Neest paighambar waleekin dar baghal daarad kitaab
Kya bataaon kya hai kaafir ki nigaah-e-parda-soz
Mashriq-o-Maghrib ki qaumon ke liye roz-e-hisaab
Is se baRh kar aur kya hoga tabiyat ka fasaad
ToR di bandon ne aaqaon ke khemon ki tanaab
CHAUTHA MUSHEER
ToR is ka Rooma-tul-Kubra ke aiwaanon mein dekh
Aal-e-Caesar ko dikhaya hum ne phir Caesar ka khwab
Kaun bahr-e-Room ki maujon se hai lapeTa hua
Gaah baalad chun sanobar gaah naalad chun rabaab
TEESRA MUSHEER
Main toh uski aaqibat-beeni ka kuch qaayal nahin
Jis ne Afrangi siyasat ko kiya yun be-hijaab
PAANCHWAAN MUSHEER (IBLEES KO MUKHATIB KAR KE)
Ay tere soz-e-nafas se kaar-e-aalam ustawaar
Tu ne jab chaaha kiya har parda-gi ko aashkaar
Aab-o-gil teri haraarat se jahan soz-o-saaz
Ableh-e-jannat teri taleem se daana-e-kaar
Tujh se baRh kar fitrat-e-aadam ka woh mahram nahin
Saada-dil bandon mein jo mash-hoor hai Parwardigaar
Kaam tha jin ka faqat taqdees-o-tasbeeh-o-tawaaf
Teri ghairat se abad tak sar nigoon-o-sharmsaar
Garcha hain tere Mureed Afrang ke saahir tamaam
Ab mujhe un ki firaasat par nahin hai aitibaar
Woh Yahoodi fitna-gar, woh rooh-e-Mazdak ka barooz
Har qaba hone ko hai us ke junoon se taar taar
Zaagh-e-dashti ho raha hai hamsar-e-shaheen-o-chargh
Kitni surat se badalta hai mizaaj-e-rozgaar
Chha gayi aashufta ho kar wus'at-e-aflaak par
Jis ko nadaani se hum samjhe the ik musht-e-ghubaar
Fitna-e-fardaa ki haibat ka yeh aalam hai ke aaj
Kaanpte hain kohsaar-o-marghzaar-o-juybaar
Mere aaqa woh jahaan zer-o-zabar hone ko hai
Jis jahaan ka hai faqat teri siyasat par madaar