سسی — آواز: ایمان | شاعر: اردو شعرا

Sassī

Punnūñ ab lauṭnā kaisā?
Muhabbat khānzāde ke haram mein gaṛ gaī ab to
Mere har khwāb pe miṭṭī kī chādar chaṛh gaī ab to
Mere ishve mere ghamze adāeñ mar gaīñ ab to
Sadāeñ mar gaīñ ab to
Punnūñ ab lauṭnā kaisā?
Punnūñ sahrā gavāhī hai
Ye sāñsoñ kī tanāboñ par tanā khaima gavāhī hai
Hathelī kī darāṛoñ par chhupe āñsū gavāhī haiñ
Ki maiñ ne intihā tak intihā se tum ko māñgā hai
Shahar Bhambhor ke mahaloñ ke khasta gharīboñ se
Saṛak par bichh gae du'ā karte faqīroñ se
Yatīmoñ se za'īfoñ se, diloñ ke bādshāhoñ se
Niyāzoñ mein, du'āoñ mein sadāoñ mein pukārā hai
Amāvas rāt mein uṭh kar khalāoñ mein pukārā hai
Punnūñ tum kyuñ nahīñ āye?
Purānī khānqāhoñ mein, shahar ke āstānoñ par
Bāzāroñ masjidoñ mein, marqadoñ mein dekh lo jā kar
Kahīñ ta'wīz haiñ kahīñ dhāge bandhe hoñge
Kahīñ dīvār pe kuchh khoon ke chhīñṭe paṛe hoñge
Kahīñ māthe gaṛe hoñge, kahīñ ghuṭne chhupe hoñge
Punnūñ manzar duhāī hai
Ki maiñ ne be-nishānī se nishāñ tak tum ko māñgā hai
Tumhāre Kīch ke raste pe maiñ har shām rotī thī
Har ik rāhgīr ke pairoñ ko pakaṛ kar iltijā kartī
Ki merā khān luṭā do
Merā īmān luṭā do
Koī hanstā, koī rotā, koī sikka baṛhā detā
Koī tumhāre raste kī masāfat kā pata detā
Vah sāre log jhūṭe the
Sabhī paimān kachche the
Punnūñ tum ek sacche the
Punnūñ tum kyuñ nahīñ āye?
Punnūñ Bhambhor kī galiyāñ
Vah kachī īñṭ kī naliyāñ
Jinhoñ ne khādimāoñ kā kabhī chehra nahīñ dekhā
Inhoñ ne ek shahzādī kā nauha sun liyā ākhar
Bhaṛak jātī haiñ vah aise amāvas rāt mein jaise
Kisī khwāboñ mein lipṭī māñ kā bachcha jāg jātā hai
Vah sargoshī mein kahtī haiñ ki; dekho
Bhūkh se ūñchā bhī koī rog hai dil kā
Sunā karte the ki ye kām hai bas Pīr-e-Kāmil kā
Ki vah ulfat ko miṭṭī se baṛā i'jāz kar ḍāle
Ye kis gandī ne afshāñ zindagī ke rāz kar ḍāle
Punnūñ maiñ gandī mandī ho gaī maiñ yār kī bandī
So merī zāt se pākīzagī kā khojnā kaisā
Punnūñ ab lauṭnā kaisā?
Khudā ke wāste mat do
Khudā ke pās baiṭhī ho
Rangīn khāna-e-karb o balā ke pās baiṭhī ho
Jahāñ se roshnī jaisī du'āeñ lauṭ ātī haiñ
Zamīn sanglākh vīrāna
Jahāñ par jāne wāle lauṭ kar āte nahīñ
Lekin sadāeñ lauṭ ātī haiñ
Punnūñ āwāz mat denā
Ki maiñ ab āwāz kī duniyā se āge kī kahānī huuñ
Maiñ un shahroñ kī rānī huuñ
Jahāñ maiñ soch ke bistar pe zulfeñ khol saktī huuñ
Jahāñ par waqt sākit hai nigāh-e-yār kī sūrat
Jahāñ par āshiqoñ ke jism se anwār kī sūrat
Muhabbat phūṭ kar ik be-karāñ nāle mein raqsāñ hai
Magar āwāz mat denā
Ki har āwāz sadma hai
Punnūñ āwāz mat denā
Kahāñ is lā-makāñ nagrī mein mātam karne āye ho
Punnūñ wāpas chale jāo
Yahāñ koī nahīñ rahtā sivāe reg-e-bismil ke
Punnūñ ye ret ke zarre
Ye khwāhish ke farishte haiñ
Inheñ kyā ilm ki vah pār tere Kīch ke jaisā
Ye ūñṭoñ kī qatāreñ
Mere ashkoñ kī qatāreñ haiñ
Jo mere bāgh ke sahrā ke ṭīle se guzartī haiñ
To mere zehn ke sūkhe kuñeñ
Tak reñg jātī haiñ
Inheñ kyā ilm ki vah sūkhā kuñāñ Bhambhor ke jaisā
Ye ret ke ṭīle ye i'lām-e-haqīqat haiñ
Na jāne kitne ahrāmoñ tale muhabbat hai
Kahāñ is lā-makāñ nagrī mein mātam karne āye ho
Tumhāre ashk aur nauhe yahāñ kuchh kar nahīñ sakte
Inheñ kahnā jo kahte the fasāne mar nahīñ sakte
Inheñ kahnā ki vah Sassī jo Ādam Khānzādī thī
Jise dil ne sadā dī thī jo ashkoñ kī munādī thī
Vah Sassī hijr kī rassī se laṭkī mar gaī kab se
Talāqeñ le ke pardesī suhāgan ghar gaī kab se
Yahāñ koī nahīñ rahtā sivāe reg-e-bismil ke
Punnūñ wāpas chale jāo
Imrān Fīroz