خود اپنی آگ میں سارے چراغ جلتے ہیں — آواز: امل خان | شاعر: دلاور علی آزر

خود اپنی آگ میں سارے چراغ جلتے ہیں

خود اپنی آگ میں سارے چراغ جلتے ہیں
یہ کس ہوا سے ہمارے چراغ جلتے ہیں
جہاں اترتا ہے وہ ماہتاب پانی میں
وہیں کنارے کنارے چراغ جلتے ہیں
تمام روشنی سورج سے مستعار نہیں
کہیں کہیں تو ہمارے چراغ جلتے ہیں
تمہارا عکس ہے یا آفتاب کا پرتو
یہ خال و خد ہیں کہ پیارے چراغ جلتے ہیں
عجیب رات اتاری گئی محبت پر
ہماری آنکھیں تمہارے چراغ جلتے ہیں
مری نگاہ سے روشن نگار خانۂ حسن
مرے لہو کے سہارے چراغ جلتے ہیں
نہ جانے کون سی منزل ہے منتظر آزرؔ
کہ رہ گزر میں ستارے چراغ جلتے ہیں

شاعر: دلاور علی آزر

آواز: امل خان