خرد بھی زیر دام ہے، جنوں بھی زیر دام ہے — آواز: امل خان | شاعر: محسن بھوپالی

خرد بھی زیر دام ہے، جنوں بھی زیر دام ہے

خرد بھی زیر دام ہے، جنوں بھی زیر دام ہے
ہوس کا نام عشق ہے، طلب خودی کا نام ہے
نظر اداس، دل ملول، روح تشنہ کام ہے
مگر لبوں پہ نغمۂ حیاتِ شاد کام ہے
رہین عارض حسین، اسیر زلفِ مشکبو!
نگاہ میں لیے ہوئے گھٹی گھٹی سی جستجو
بھٹک رہے ہیں وادیِ خزاں میں بہر رنگ و بو
سحر کے گیت گار ہے ہیں اور وقتِ شام ہے
نظر میں ماہ و کہکشاں ہیں عظمت بشر نہیں
قدم بڑھا رہے ہیں اور راہ معتبر نہیں
فریب خوردۂ چمن ہیں دام پر نظر نہیں
خیالِ نظمِ میکدہ نہیں ہے، فکرِ جام ہے
ملا وہ اختیار جس پہ بے بسی ہے خندہ زن
وہ روشنی ملی کہ جس پر تیرگی ہے خندہ زن
وہ زندگی ملی کہ جس پر موت بھی ہے خندہ زن
بضد ہیں پھر بھی کج نظر حیات شاد کام ہے
نمائش و نمود وننگ و نام پر نگاہ ہے!
جمالِ یار و جوئبار و جام پر نگاہ ہے
بنامِ بندگی، بتانِ بام پر نگاہ ہے
شباب و شعر و شاہد و شراب سے ہی کام ہے
اگر یہی ہے شاعری تو شاعری حرام ہے

شاعر: محسن بھوپالی

آواز: امل خان