اس کی طرف بس اس لیے تکتا نہیں تھا میں — آواز: امل خان | شاعر: عمیر نجمی

اس کی طرف بس اس لیے تکتا نہیں تھا میں

اس کی طرف بس اس لیے تکتا نہیں تھا میں
سب دیکھتے تھے آنکھ جھپکتا نہیں تھا میں
ایسی دبیز تہ تھی بدن پر ملال کی
جلنے کے باوجود چمکتا نہیں تھا میں
اندر کی ٹوٹ پھوٹ میں ٹوٹے ہیں لفظ بھی
دوران گفتگو یوں اٹکتا نہیں تھا میں
کچھ کچھ شعور ہجر مجھے کمسنی سے تھا
سو ٹہنیوں سے پھول اچکتا نہیں تھا میں
اک عطر ساز لمس نے تکمیل کی مری
ورنہ کھلا ہوا بھی مہکتا نہیں تھا میں
گریہ شروع سے تھا پسندیدہ مشغلہ
گھنٹوں بھی کرتا رہتا تو تھکتا نہیں تھا میں
اچھا ہوا خود اس کی نظر مجھ پہ پڑ گئی
اس کو وہاں پکار تو سکتا نہیں تھا میں

شاعر: عمیر نجمی

آواز: امل خان