شام کو راستے پر — آواز: افتخار احمد | شاعر: میراجی
مقرر / سپیکر
شام کو راستے پر
رات کے عکس تخیل سے ملاقات ہو جس کا مقصود
کبھی دروازے سے آتا ہے کبھی کھڑکی سے
اور ہر بار نئے بھیس میں در آتا ہے
اس کو اک شخص سمجھنا تو مناسب ہی نہیں
وہ تصور میں مرے عکس ہے ہر شخص کا ہر انساں کا
کبھی بھر لیتا ہے اک بھولی سی محبوبۂ نادان کا بہروپ کبھی
ایک چالاک جہاں دیدہ و بے باک ستمگر بن کر
دھوکا دینے کے لیے آتا ہے بہکاتا ہے
اور جب وقت گزر جائے تو چھپ جاتا ہے
مری آنکھوں میں مگر چھایا ہے بادل بن کر
ایک دیوار کا روزن اسی روزن سے نکل کر کرنیں
مری آنکھوں سے لپٹتی ہیں مچل اٹھتی ہیں
آرزوئیں دل غم دیدہ کے آسودہ نہاں خانے سے
اور میں سوچتا ہوں نور کے اس پردے میں
کون بے باک ہے اور بھولی سی محبوبہ کون
سوچ کو روک ہے دیوار کی وہ کیسے چلے
کیسے جا پہنچے کسی خلوت محجوب کے مخمور صنم خانے میں
وہ صنم خانہ جہاں بیٹھے ہیں دو بت خاموش
اور نگاہوں سے ہر اک بات کہے جاتے ہیں
ذہن کو ان کے دھندلکے نے بنایا ہے اک ایسا عکاس
جو فقط اپنے ہی من مانے مناظر کو گرفتار کرے
میں کھڑا دیکھتا ہوں سوچتا ہوں جب دونوں
چھوڑ کر دل کے صنم خانے کو گھر جائیں گے
صحن میں تلخ حقیقت کو کھڑا پائیں گے
ایک سوچے گا مری جیب یہ دنیا یہ سماج
ایک دیکھے گا وہاں اور ہی تیاری ہے
مجھ کو الجھن ہے یہ کیوں میں تو نہیں ہوں موجود
رات کی خلوت محجوب کے مخمور صنم خانے میں
مری آنکھوں کو نظر آتا ہے روزن کا دھواں
اور دل کہتا ہے یہ دود دل سوختہ ہے
ایک گھنگھور سکوں ایک کڑی تنہائی
میرا اندوختہ ہے
مجھ کو کچھ فکر نہیں آج یہ دنیا مٹ جائے
مجھ کو کچھ فکر نہیں آج یہ بیکار سماج
اپنی پابندی سے دم گھٹ کے فسانہ بن جائے
مری آنکھوں میں تو مرکوز ہے روزن کا سماں
اپنی ہستی کو تباہی سے بچانے کے لیے
میں اسی روزن بے رنگ میں گھس جاؤں گا
لیکن ایسے تو وہی بت نہ کہیں بن جاؤں
جو نگاہوں سے ہر اک بات کہے جاتا ہے
چھوڑ کر جس کو صنم خانے کی محجوب فضا
گھر کے بیباک المناک سیہ خانے میں
آرزوؤں پہ ستم دیکھنا ہے گھلنا ہے
میں تو روزن میں نہیں جاؤں گا دنیا مٹ جائے
اور دم گھٹ کے فسانہ بن جائے
سنگ دل خون سکھاتی ہوئی بیکار سماج
میں تو اک دھیان کی کروٹ لے کر
عشق کے طائر آوارہ کا بہروپ بھروں گا پل میں
اور چلا جاؤں گا اس جنگل میں
جس میں تو چھوڑ کے اک قلب فسردہ کو اکیلے چل دی
راستہ مجھ کو نظر آئے نہ آئے پھر کیا
ان گنت پیڑوں کے میناروں کو
میں تو چھوتا ہی چلا جاؤں گا
اور پھر ختم نہ ہوگی یہ تلاش
جستجو روزن دیوار کی مرہون نہیں ہو سکتی
میں ہوں آزاد مجھے فکر نہیں ہے کوئی
ایک گھنگھور سکوں ایک کڑی تنہائی
مرا اندوختہ ہے
شاعر: میراجی
آواز: افتخار احمد
Shaam ko Raaste Par
Raat ke aks-e-takhayyul se mulaqat ho jis ka maqsood
Kabhi darwaze se aata hai kabhi khidki se
Aur har baar naye bhes mein dar aata hai
Us ko ek shakhs samajhna to munasib hi nahin
Woh tasawwur mein mere aks hai har shakhs ka har insaan ka
Kabhi bhar leta hai ek bholi si mehbooba nadaan ka bahroop kabhi
Ek chalak jahan deeda o be-baak sitamgar ban kar
Dhoka dene ke liye aata hai behkata hai
Aur jab waqt guzar jaaye to chhup jaata hai
Meri aankhon mein magar chhaya hai badal ban kar
Ek deewar ka rozan isi rozan se nikal kar kirnein
Meri aankhon se lipti hain machal uthti hain
Aarzooein dil-e-gham deeda ke aasooda nihan khane se
Aur main sochta hun noor ke is parde mein
Kaun be-baak hai aur bholi si mehbooba kaun
Soch ko rok hai deewar ki woh kaise chale
Kaise ja pahunche kisi khilwat-e-mehjoob ke makhmur sanamkhane mein
Woh sanamkhana jahan baithe hain do but khamosh
Aur nigahon se har ek baat kahe jaate hain
Zehn ko un ke dhundalke ne banaya hai ek aisa akkas
Jo faqat apne hi man mane manazir ko giraftar kare
Main khada dekhta hun sochta hun jab donon
Chhod kar dil ke sanamkhane ko ghar jaayenge
Sehan mein talkh haqeeqat ko khada paayenge
Ek sochega meri jeb ye duniya ye samaj
Ek dekhega wahan aur hi tayyari hai
Mujh ko uljhan hai ye kyun main to nahin hun maujood
Raat ki khilwat-e-mehjoob ke makhmur sanamkhane mein
Meri aankhon ko nazar aata hai rozan ka dhuan
Aur dil kehta hai ye dood-e-dil sokhta hai
Ek ghanghor sukoon ek kadi tanhai
Mera andukhta hai
Mujh ko kuch fikr nahin aaj ye duniya mit jaaye
Mujh ko kuch fikr nahin aaj ye bekar samaj
Apni pabandi se dam ghut ke fasana ban jaaye
Meri aankhon mein to markooz hai rozan ka samaan
Apni hasti ko tabahi se bachane ke liye
Main isi rozan-e-be-rang mein ghus jaunga
Lekin aise to wahi but na kahin ban jaaun
Jo nigahon se har ek baat kahe jaata hai
Chhod kar jis ko sanamkhane ki mehjoob fiza
Ghar ke be-baak alamnak siyah khane mein
Aarzoon pe sitam dekhna hai ghulna hai
Main to rozan mein nahin jaunga duniya mit jaaye
Aur dam ghut ke fasana ban jaaye
Sangdil khoon sukhlati hui bekar samaj
Main to ek dhyan ki karwat le kar
Ishq ke tair-e-awara ka bahroop bharunga pal mein
Aur chala jaunga is jangal mein
Jis mein tu chhod ke ek qalb-e-fasurda ko akele chal di
Raasta mujh ko nazar aaye na aaye phir kya
An-gint pedon ke minaron ko
Main to chhoota hi chala jaunga
Aur phir khatm na hogi ye talaash
Justujoo rozan-e-deewar ki marhoon nahin ho sakti
Main hun azaad mujhe fikr nahin hai koi
Ek ghanghor sukoon ek kadi tanhai
Mera andukhta hai
مقرر کے بارے میں
صحافی، اسٹیبلشمنٹ کا ناقد، باقاعدگی سے ٹیکس دہندہ اور بائیں بازو سے وابستہ سیاسی کارکن۔ فطرت سے گہرا شغف رکھتا ہوں ۔ اپنے خیالات خود قلم بند کرتا ہوں، ری ٹویٹس کو تائید یا حمایت نہ سمجھا جائے۔
مکمل سوانح دیکھیں