آزرؔ رہا ہے تیشہ مرے خاندان میں — آواز: ایم سعید | شاعر: دلاور علی آزر

آزرؔ رہا ہے تیشہ مرے خاندان میں

آزرؔ رہا ہے تیشہ مرے خاندان میں
پیکر دکھائی دیتے ہیں مجھ کو چٹان میں
سب اپنے اپنے طاق میں تھرا کے رہ گئے
کچھ تو کہا ہوا نے چراغوں کے کان میں
میں اپنی جستجو میں یہاں تک پہنچ گیا
اب آئنہ ہی رہ گیا ہے درمیان میں
منظر بھٹک رہے تھے در و بام کے قریب
میں سو رہا تھا خواب کے پچھلے مکان میں
لذت ملی ہے مجھ کو اذیت میں اس لیے
احساس کھینچنا تھا بدن کی کمان میں
نکلی نہیں ہے دل سے مرے بد دعا کبھی
رکھے خدا عدو کو بھی اپنی امان میں
آزرؔ اسی کو لوگ نہ کہتے ہوں آفتاب
اک داغ سا چمکتا ہے جو آسمان میں

شاعر: دلاور علی آزر

آواز: ایم سعید